ភ្នំពេញ៖ ឯកឧត្តមស្នងការនគរបាលក្រុងភ្នំពេញ បានផ្តល់មតិណែនាំដល់មន្ត្រី ដែលត្រូវចុះអនុវត្តរឹតបន្តឹងច្បាប់ចរាចរណ៍ផ្លូវគោក ដែលចាប់ផ្តើមពីថ្ងៃ ទី១ ខែឧសភា ឆ្នាំ២០២០ គឺ ត្រូវរៀបចំខ្លួនឲ្យបានស្អាត ស្លៀកពាក់ឲ្យបានសមរម្យ និងកាត់សក់ខ្លីជានិច្ច ត្រូវមានសីលធម៌ គុណធម៌ អាកប្បកិរិយា និងប្រើប្រាស់សំដីឲ្យបានសមរម្យ ជាពិសេសគ្រប់ពេលត្រួតពិនិត្យត្រូវធ្វើការគោរពជានិច្ច ។
ឯកឧត្តម នាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ និងឯកឧត្តម ឧត្តមសេនីយ៍ឯក ស ថេត អគ្គស្នងការរង និង ជាស្នងការនគរបាលរាជធានីភ្នំពេញ បានបន្តអញ្ជើញចូលរួមដឹកនាំកិច្ចប្រជុំ ផ្សព្វផ្សាយស្តីពីការអនុវត្តរឹតបន្តឹងច្បាប់ចរាចរណ៍ផ្លូវគោក ដល់មន្ត្រីពាក់ព័ន្ធទាំងអស់ ដែលត្រូវចូលរួមផ្ទាល់ក្នុងការចាប់ផ្តើមរឹតបន្តឹងអនុវត្តចរាចរណ៍ ចាប់ពីថ្ងៃទី១ ខែឧសភា ឆ្នាំ២០២០ ដែល ធ្វើឡើងនៅព្រឹកថ្ងៃទី២៩ ខែមេសា ឆ្នាំ២០២០ ។
ឯកឧត្តម នាយឧត្តមសេនីយ៍ អគ្គស្នងការរង និងឯកឧត្តម ឧត្តមសេនីយ៍ឯក អគ្គស្នងការរង និងជាស្នងការដ្ឋាននគរបាលរាជធានីភ្នំពេញ បានផ្តល់ជាមតិណែនាំល្អៗជាច្រើនដល់អង្គពិធីទាំងមូល ដើម្បីយកទៅអនុវត្តកិច្ចការរឹតបន្តឹងនេះឲ្យមានលក្ខណៈរលូន និងប្រកបដោយការជោគជ័យខ្ពស់ ។
ក្នុងឱកាសនោះដែរ ឯកឧត្តមស្នងការ បានផ្តល់មតិណែនាំជាមតិល្អជាច្រើនដល់មន្ត្រី ដែលត្រូវចុះអនុវត្តរឹតបន្តឹងច្បាប់ចរាចរណ៍ផ្លូវគោក ដែលចាប់ផ្តើមពីថ្ងៃ ទី១ ខែឧសភា ឆ្នាំ២០២០ :
១. ត្រូវរៀបចំខ្លួនឲ្យបានស្អាត ស្លៀកពាក់ឲ្យបានសមរម្យ និងកាត់សក់ខ្លីជានិច្ច ។
២. ត្រូវមានសីលធម៌ គុណធម៌ អាកប្បកិរិយា និងប្រើប្រាស់សំដីឲ្យបានសមរម្យ ជាពិសេសគ្រប់ពេលត្រួតពិនិត្យត្រូវធ្វើការគោរពជានិច្ច ។
៣. ត្រូវពាក់អាវពន្លឺ ពាក់ភ្លើងបំភ្លឺនៅលើស្មា និងពិល ។ ល ។
៤. ត្រូវពាក់ម៉ាស់ ស្រោមដៃ និងលាងដៃជាមួយទឹកអាល់កុលជាប្រចាំ ។
៥. តាមគោលដៅអនុវត្តរឹតបន្តឹងច្បាប់ចរាចរណ៍ នឹងមានក្រុមគ្រូពេទ្យការិយាល័យសុខាភិបាលនៃស្នងការដ្ឋាននគរបាលរាជធានីភ្នំពេញ ដើម្បីចុះត្រួតពិនិត្យ និងតាមដានជាប្រចាំរបស់សុខភាពមន្ត្រីដែលចុះអនុវត្តច្បាប់នេះ ។
ឯកឧត្តម អគ្គស្នងការរង និងជាស្នងការនគរបាលរាជធានីភ្នំពេញ បានសង្កត់ធ្ងន់ថា ដោយក្នុងឆ្នាំ២០១៩ កំណើនគ្រោះថ្នាក់ចរាចរណ៍ដែលបណ្តាលឲ្យរងរបួស ស្លាប់ មានការកើនឡើងខ្ពស់គួរឲ្យបារម្មណ៍ ។
ម្យ៉ាងវិញទៀតដោយក្នុងឆ្នាំ២០១៩ សមត្ថកិច្ចតែងតែមានការយោគយល់ច្រើន ដោយតែងតែធ្វើការណែនាំ អប់រំ ប៉ុន្តែដោយកំណើនគ្រោះថ្នាក់នៅឆ្នាំ២០១៩ ដូច្នេះហើយក្នុងគោលបំណងដើម្បីកាត់បន្ថយគ្រោះថ្នាក់ចរាចរណ៍ ក៏ដូចជាកាត់បន្ថយការរងរបួស ការស្លាប់ និងខូចខាតទ្រព្យសម្បត្តិ របស់ប្រជាពលរដ្ឋ ។
គោលបំណងសំខាន់ក្នុងការអនុវត្តរឹតបន្តឹងច្បាប់ចរាចរណ៍នេះ គឺដើម្បី ការពារអាយុជីវិត និងទ្រព្យសម្បត្តិរបស់ប្រជាពលរដ្ឋ កាត់បន្ថយការស្លាប់ ការរងរបួស ពិការ ….។ល។
ឯកឧត្តមស្នងការ ក៏បានធ្វើការបញ្ជាក់យ៉ាងច្បាស់ថា ការអនុវត្តរឹតបន្តឹងច្បាប់ចរាចរណ៍នេះ ត្រូវតែអនុវត្តឲ្យបានស្មើភាពគ្នា ទាំងប្រជាពលរដ្ឋសាមញ្ញ អ្នកធំ អ្នកក្រ អ្នកមាន ឲ្យតែខុសច្បាប់ត្រូវអនុវត្តដូចៗគ្នា ។
ពិធីប្រជុំផ្សព្វផ្សាយការអនុវត្តរឹតបន្តឹងច្បាប់ចរាចរណ៍ផ្លូវគោករយ:ពេល២ថ្ងៃចាប់ពីថ្ងៃទី២៨ ដល់ថ្ងៃទី២៩ ខែមេសា ឆ្នាំ២០២០ នៅសាលប្រជុំនៃស្នងការដ្ឋាននគរបាលរាជធានីភ្នំពេញ ក្រោមអធិបតីភាព ឯកឧត្តម នាយឧត្តមសេនីយ៍ ហ៊ឹម យ៉ាន អគ្គស្នងការរង ជាតំណាងដ៏ខ្ពង់ខ្ពស់ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងឯឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ ត្រូវបានបិទបញ្ចប់នៅរសៀលថ្ងៃទី២៩ ខែមេសា ឆ្នាំ២០២០ ដោយមានការចូលរួមពីមន្ត្រីដែលត្រូវចុះអនុវត្តរឹតបន្តឹងច្បាប់ចរាចរណ៍ចាប់ពីថ្ងៃទី០១ ខែឧសភា ឆ្នាំ២០២០ ។
ក្នុងរយ:ពេល២ថ្ងៃនេះ ចែកចេញជា៤វេន ដើម្បីធ្វើការផ្សព្វផ្សាយនេះ ដោយមានមន្ត្រីចូលរួមសរុប ៦២១ នាក់ (មន្ត្រីចរាចរណ៍ ៤០០នាក់ មន្ត្រីអធិការខណ្ឌទាំង១៤ ចំនួន ១១២ នាក់ និងមន្ត្រីការិយាល័យជំនាញ ចំនួន ១០៩នាក់) ។
ក្នុងឱកាសបិទការផ្សព្វផ្សាយការអនុវត្តរឹតបន្តឹងច្បាប់ចរាចរណ៍នេះ ឯកឧត្តម នាយឧត្តមសេនីយ៍ អគ្គស្នងការរង និងឯកឧត្តម ឧត្តមសេនីយ៍ឯក អគ្គស្នងការរង និងជាស្នងការនគរបាលរាជធានីភ្នំពេញ បានផ្តល់មតិណែនាំល្អៗជាច្រើនដល់មន្ត្រីទាំងអស់ដែលបានចូលរួមក្នុងការផ្សព្វផ្សាយ ដើម្បីយកទៅអនុវត្តឲ្យបានរលូន និងទទួលបានជោគជ័យ ៕
ដោយ៖កូឡាប
