ភ្នំពេញ៖ ជនសង្ស័យម្នាក់ ត្រូវបានប៉ុស្តិ៍នគរបាលចាក់អង្រែលើធ្វើការឃាត់ខ្លួន ដោយយកដែកគាស់ពិតានផ្ទះ ចូលគាស់បំបែកកញ្ចក់រថយន្ត ប៉ុនប៉ងយកទ្រព្យសម្បតិ្ត កើតហេតុ ថ្ងៃទី២៩ ខែមេសា ឆ្នាំ២០២០ វេលាម៉ោង១រំលងអធ្រាត្រ នៅចំណុចផ្ទះលេខ១២២៧ ផ្លូវជាតិលេខ២ ភូមិព្រែកតាគង់៣ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
ជនសង្ស័យឈ្មោះ មាស ចាន់ថៃ ហៅ ស្វិត ភេទប្រុស អាយុ ៣០ ឆ្នាំ ជនជាតិខ្មែរ ទីលំនៅ និងមុខរបរ មិនពិតប្រាកដ (ឃាត់ខ្លួន មានផ្ទុកសារធាតុញៀន)។ ចំណែកជនរងគ្រោះឈ្មោះ ឈីវ ស៊ឺស្រ៊ុន ភេទប្រុស អាយុ ២៧ឆ្នាំ ជនជាតិខ្មែរ ទីលំនៅផ្ទះលេខ៤៤ ផ្លូវជាតិលេខ២ ភូមិព្រែកតាគង់៣ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ មុខរបរ លក់ដូរ ។ សម្ភារខូចខាត ៖ បែកកញ្ចក់ទ្វារមុខរថយន្តចំនួន ៣ គ្រឿង ។
កាលពីថ្ងៃទី២៨ ខែមេសា ឆ្នាំ២០២០ វេលាម៉ោង១៨និង០០នាទី ជនរងគ្រោះឈ្មោះ ឈីវ ស៊ឺស្រ៊ុន បានយករថយន្តចំនួន៣គ្រឿង មកចតទុកក្នុងផ្ទះលេខ១២២៧ ផ្លូវជាតិលេខ២ ភូមិព្រែកតាគង់៣ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ (ចំណុចកើតហេតុ) រួចទៅសម្រាកនៅផ្ទះមួយផ្សេងទៀត ។ លុះមកដល់ថ្ងៃទី២៩ ខែមេសា ឆ្នាំ២០២០ វេលាម៉ោង៨និង០០នាទី ជនរងគ្រោះឈ្មោះ ឈីវ ស៊ឺស្រ៊ុន បានមកមើលផ្ទះដែលទុករថយន្តវិញ ស្រាប់តែឃើញសម្ភារក្នុងផ្ទះរាយប៉ាយ ហើយនៅលើពិតានផ្ទះមានស្នាមគាស់ និងមានស្នាមបែកកញ្ចក់ទ្វារមុខរថយន្តទាំង៣គ្រឿង (តែពុំមានបាត់សម្ភារអ្វីផ្សេងទៀតទេ) ភ្លាមនោះជនរងគ្រោះឈ្មោះ ឈីវ ស៊ឺស្រ៊ុន បានពិនិត្យមើលកាមេរ៉ាសុវត្ថិភាពក្នុងផ្ទះ ឃើញស្គាល់ជនសង្ស័យឈ្មោះ មាស ចាន់ថៃ ហៅ ស្វិត ជាអ្នកមកធ្វើសកម្មកភាពយកដែកមកគាស់ពិតានផ្ទះ ចូលមកគាស់បំបែកទ្វារកញ្ចក់មុខរថយន្តរបស់គាត់ ប៉ុនប៉ងលួចយកទ្រព្យសម្បត្តិ កាលពីវេលាម៉ោង១និង០០នាទី រំលងអធ្រាត្រ ថ្ងៃទី២៩ ខែមេសា ឆ្នាំ២០២០។ ឃើញដូចនោះ ជនរងគ្រោះឈ្មោះ ឈីវ ស៊ឺស្រ៊ុន និង ក្រុមគ្រួសារ ក៏បានតាមរកជនសង្ស័យឈ្មោះ មាស ចាន់ថៃ ហៅ ស្វិត រហូតដល់វេលាម៉ោង១២និង៣០នាទីថ្ងៃទី២៩ ខែ មេសា ឆ្នាំ២០២០ ទើបប្រទះឃើញជនសង្ស័យឈ្មោះ មាស ចាន់ថៃ ហៅ ស្វិត កំពុងឈរនៅចំណុចផ្លូវលំ (សំណង់មិនរៀបរយ) ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ ក៏ឃាត់ខ្លួនយកមកប្រគល់ឲ្យនគរបាលប៉ុស្តិ៍ចាក់អង្រែលើ ធ្វើការសាកសួរ និងដាក់ពាក្យបណ្តឹងឲ្យចាត់ការតាមច្បាប់តែម្តង ។
បច្ចុប្បន្នជនសង្ស័យឈ្មោះ មាស ចាន់ថៃ ហៅ ស្វិត ឃាត់ខ្លួន នៅអធិការដ្ឋាននគរបាលខណ្ឌមានជ័យ ដើម្បីកសាងសំណុំរឿងចាត់តាមនីតិវិធី៕ដោយ៖CEN
