កូរ៉េខាងត្បូង បានប្រកាសនៅថ្ងៃព្រហស្បតិ៍នេះថា គ្មានការឆ្លងវីរុស COVID-19ក្នុងស្រុកជាលើកដំបូង ចាប់តាំងពីមានការផ្ទុះខ្លាំងកាលពីថ្ងៃទី ២៩ ខែកុម្ភៈ។ នេះបើតាមការបញ្ជាក់របស់មជ្ឈមណ្ឌលបង្ការ និងគ្រប់គ្រងជំងឺរបស់ប្រទេសនេះ។
ស្ថានប័នខាងលើរាយការណ៍ថា មានអ្នកឆ្លងថ្មីចំនួន ៤នាក់ ប៉ុន្តែវាជាករណីឆ្លងនាំចូលពីក្រៅប្រទេស ហើយរហូតមកដល់ពេលនេះ តួលេខនៃអ្នកឆ្លងសរុបកើនដល់ ១០.៧៦៥នាក់។
ចំនួនអ្នកស្លាប់កើនឡើងម្នាក់ បណ្តាលឲ្យតួលេខនៃអ្នកឆ្លងសរុបកើនដល់ ២៤៧នាក់។
កាលពីថ្ងៃអាទិត្យកន្លងទៅនេះ ព្រះវិហារធំៗនៅក្នុងប្រទេសបានបើកដំណើរការវិញ ក្រោយពេលរដ្ឋាភិបាលបានបន្ធូរការរឹតបន្តឹង លើការប្រមូលផ្តុំបែបសាសានា ចំពេលដែលការឆ្លងវីរុស COVID-19 មានភាពធូរស្រាល។
កូរ៉េខាងត្បូង មានការឆ្លងផ្ទុះខ្លាំងចេញពីព្រះវិហារគ្រឹស្តសាសនាឈ្មោះ Shincheonji។ ការផ្ទុះឆ្លងក្នុងវិហារនោះស្មើនឹងចំនួនប្រហែលពាក់កណ្តាល នៃតួលេខឆ្លងសរុបទូទាំងប្រទេស។
ប្រទេសដែលមានប្រជាជន ៥១លាននាក់នេះ ក៏បន្ថែមពេលអនុវត្តគម្លាតសង្គមផងដែររហូតដល់ថ្ងៃទី ៥ ខែឧសភាខាងមុខ ប៉ុន្តែក៏មានការបន្ធូរបន្ថយផងដែរ សម្រាប់ការប្រមូលផ្តុំបែបសាសនា និងកីឡាជាដើម៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia