តាកែវៈ សុទ្ធតែជាមន្ត្រីបម្រើការងារឲ្យរដ្ឋ រស់នៅចាំនៅលើដីរបស់ខ្លួន ជាង៤០ឆ្នាំមកហើយ តែមកត្រូវអាជ្ញារធរខេត្ត សម្រេចកាត់ដីរបស់ពួកគាត់ ឲ្យទៅបុគ្គលដែលមានទឹកប្រាក់ទៅវិញ ពួកគាត់លើកដៃម្រាមដៃ១០ស្នើសុំឲ្យសម្តេចតេជោ ជួយក្រោយគេដាំបង្គោល ចូលក្នុងសំយាបផ្ទះទៅហើយ ។
ការឈឺចាប់កាន់តែកើតមាន សេចក្តីទុកចិត្តទៅលើអាជ្ញាធរខេត្តតាកែវ កាន់តែបាត់បង់ ចំពោះប្រជាពលរដ្ឋរស់នៅក្នុងភូមិចក សង្កាត់រកាក្នុង ក្រុងដូនកែវ ខេត្តតាកែវ ដោយសារតែ ពួកគាត់មករស់នៅលើទឹកដីនេះ ជាយូរមកហើយជាង៤០ឆ្នាំ កាន់កាប់លើដីនៅក្នុងភូមិឃុំខាងលើ រស់នៅទល់មុខត្រពាំងទឹកសាធារណៈមួយ តែមកដល់ថ្ងៃទី២៩ ខែមេសា ឆ្នាំ២០២០នេះ បែរជាអាជ្ញាធរខេត្តតាកែវ ដែលដឹកនាំដោយលោក ម៉ឹង វុធី អភិបាលរងខេត្ត រួមជាមួយនិងក្រុមការងារ កាន់លិខិតបញ្ជាបេសកកម្ម មកអនុវត្ត ស្នើសុំអន្តរាគមន៍ដកវិញ្ញាបនបត្រសម្គាល់ម្ចាស់អចលនវត្ថុ និងឲ្យមន្ត្រីភូមិបាលបោះបង្គោល កំណត់ព្រំក្បាលដីលេខ ៩១៦ និង ៩២១ ចុះថ្ងៃទី ២១ខែកុម្ភៈ ឆ្នាំ២០២០ របស់ឈ្មោះ សុខ ទូច និងប្រពន្ធឈ្មោះ ធុន សាម៉ន ទៅវិញ ។
អុំប្រុស សុខ កុសល អាយុ៦៤ឆ្នាំ អតីតយោធា និងអុំស្រីទឹម អូន អាយុ ៥៣ឆ្នាំ បាននិយាយរៀបរាប់ទាំងក្តុកក្តួលក្នុងចិត្ត និងអស់ជំនឿទៅលើអាជ្ញាធរ ខណៈដែលចំណាត់ការនេះ បានធ្វើឲ្យពួកគាត់សឹងតែក្អួតឈាម ព្រោះត្រូវបាត់បង់ដីរបស់ខ្លួនដែលរស់នៅជាង ៤០ឆ្នាំ មកឲ្យបុគ្គលដែលមានលុយទៅវិញ ។ ពួកគាត់បាននាំគ្នា និយាយទៀតថា បើកាត់ប្លង់យករបៀបនឹងបាន តើឲ្យពួកគាត់ ទៅដើរលើផ្លូវណាទៀត បើបិទមុខផ្ទះជិតអស់ហើយ និងដល់ក្នុងសំយាបផ្ទះរបស់ពួកគាត់បែបនេះ តើនេះជាមន្ត្រីបម្រើរាស្ត្រដូចដែលសម្តេចតេជោ ហ៊ុន សែន បានលើកឡើងក៏ពិតមែនដែរឬទេ ឬមួយបម្រើតែអ្នកមានលុយ មានអំណាច គាបសង្កត់យកដីប្រជាពលរដ្ឋស្រេចតែអំពើចិត្តបែបនេះ ។ ពួកគាត់បន្ថែមទៀតថា នៅខាងមុខផ្ទះ របស់ពួកគាត់មិនមានផ្លូវនោះទេ មានតែត្រពាំងទឹកសាធារណៈ តាំងពីយូរមកហើយជារបស់រដ្ឋ តែដោយរដ្ឋគ្រោងនិងធ្វើផ្លូវមានទទឹង ៦ម៉ែត្រ ស្រាប់តែក្នុងឆ្នាំ ២០១២ មានគំនូសប្លង់ជាប្រព័ន្ធមួយដែលបិទផ្សព្វផ្សាយ មានក្បាលដីលេខ ៩១៦ និងលេខ ៩២១ គូសនៅលើដីរបស់ពួកគាត់ទៅវិញ ពេលនោះពួកគាត់បានប្តឹងជំទាស់ ទៅអាជ្ញាធរ ជាច្រើនលើកច្រើនសារ តែមិនមានប្រសិទ្ធភាព ឡើយ លុះមកដល់ថ្ងៃទី ២៩ ខែមេសា ឆ្នាំ២០២០នេះ ស្រាប់តែអាជ្ញាធរខេត្ត មានកម្លាំងប្រដាប់អាវុធ អាជ្ញាធរក្រុង សង្កាត់ និងភូមិ ចុះមកអនុវត្តបញ្ជាដាំបង្គោលដីព្រំនេះ និងឲ្យខាងភូមិបាលស្រុកចេញប្លង់កាន់កាប់ ជាកម្មសិទ្ធិដល់បុគ្គល ដែលមានទំនាស់នោះទៅវិញ ទាំងដែលពួកគាត់ជាម្ចាស់ព្រំសងខាង នៅតែដាក់ពាក្យប្តឹងជំទាស់ ។ ពួកគាត់បានលើកថា សកម្មភាពនេះ គឺជាសកម្មភាពមួយ ធ្វើឲ្យពួកគាត់អស់ជំនឿលើអាជ្ញាធរតទៅទៀត មានតែសម្តេចតេជោ ហ៊ុន សែន ទេទើបអាចជួយពួកគាត់បាន ៕ដោយ៖ តាកែវ