ភ្នំពេញ៖ ស្របពេលដែលនគរបាលចរាចរណ៍នឹងចុះអនុវត្តអនុក្រឹត្យស្ដីពីការកែសម្រួលអនុក្រឹត្យលេខ ៤៤ អនក្រ.បក ចុះថ្ងៃទី២១ ខែមីនា ឆ្នាំ២០១៧ ស្តីពីការពិន័យអន្តរការចំពោះបទល្មើសនឹងច្បាប់ចរណ៍ផ្លូវគោក ម្ចាស់រថយន្តរាប់សិបគ្រឿង បានសម្រុករថយន្តរបស់ខ្លួន ទៅឆៀករថយន្តឲ្យបានត្រឹមត្រូវតាមច្បាប់។ ជាមួយនឹងម្ចាស់រថយន្តជាច្រើនសម្រុកឆៀករថយន្តនោះ មន្ត្រីនាយកដ្ឋានដឹកជញ្ជូនផ្លូវគោក នៃក្រសួងសាធារណៈការនិងដឹកជញ្ជូន បានចេញប្រកាសបន្តធ្វើការឆៀករថយន្តរហូតដល់ អាទិត្យ ដោយសារសង្កេតឃើញថា មានម្ចាស់រថយន្ត បន្តគ្នាយករថយន្តទៅឆៀកមានការកើនឡើងច្រើន។
នៅថ្ងៃទី៣០មេសានេះ មន្ត្រីនាយកដ្ឋាន បានឲ្យដឹងថា ខាងនាយកដ្ឋានដឹកជញ្ជូន បើកការធ្វើឆៀករថយន្ត រហូតដល់ថ្ងៃអាទិត្យ ដែលអនុវត្តនៅក្នុងសប្តាហ៍នេះ រហូតដល់មានស្ថានភាពអន់ថយវិញ ទើបឈប់ធ្វើការនៅថ្ងៃសៅរ៍ និងអាទិត្យ។ មន្ត្រីដដែលនេះបញ្ជាក់ថា ការអនុវត្តធ្វើការងារឆៀក គឺគ្រប់មណ្ឌលឆៀក ទូទាំង២៥ រាជធាន ខេត្ត។
សម្រាប់សេវាការប្តូរប័ណ្ណបើកបររថយន្ត នៅផ្សារទំនើបអ៊ីអន១ និង២ ចាប់ថ្ងៃទី១ ខែឧសភា នេះ ចាប់ពីម៉ោង ៩ព្រឹក ដល់ម៉ោង១០យប់ ពីថ្ងៃច័ន្ទដល់ថ្ងៃអាទិត្យ។ ចំពោះការប្តូរប័ណ្ណបើកបរ នៅតាមមន្ទីរទាំង២៥ រាជធានី ខេត្ត គឺចាប់ម៉ោង ៨ព្រឹក ដល់ម៉ោង៥ល្ងាច ពីថ្ងៃចន្ទ ដល់ថ្ងៃសុក្រ។
សូមបញ្ជាក់ថា បច្ចុប្បន្ននេះមានមណ្ឌលឆៀកយានយន្តសរុបចំនួន១៣កន្លែង និងឆៀកចល័ត៣គ្រឿង ក្នុងនោះរាជធានីភ្នំពេញមាន៤កន្លែង និង៩កន្លែងនៅតាមខេត្តចំនួន៩ដូចជា៖ ខេត្តបាត់ដំបង កំពង់ចាម សៀមរាប ព្រះសីហនុ កំពង់ស្ពឺ កំពង់ឆ្នាំង ក្រចេះ រតនគិរី និងខេត្តព្រះវិហារ ដោយឡែកឆៀកចល័ត៣គ្រឿង កំពុងធ្វើប្រតិបត្តិការឆៀករបស់ខ្លួន នៅតាមខេត្តឆ្ងាយៗមួយចំនួនមិនទាន់មានមណ្ឌលឆៀក។
គួរកត់សម្គាល់ផងដែរថា៖ នៅក្នុងឆ្នាំ២០១៧ បរិមាណឆៀកយានយន្តមានចំនួន ២២៩.៤៤៤ គ្រឿង ឆ្នាំ២០១៨ មានចំនួន ៣១៨.៣៩៤គ្រឿង ឆ្នាំ២០១៩ មានចំនួន ៣១៦.៩៥៨ គ្រឿង និងយានយន្តអស់សុពលភាពត្រូវយកមកឆៀកឡើងវិញមានចំនួន ៣០២.៨៤០គ្រឿង។ ដោយឡែករថយន្តដែលបានចុះបញ្ជីគិតត្រឹមថ្ងៃទី៣០ ខែវិច្ឆិកា ឆ្នាំ២០១៩ មានចំនួន ៧៩០.៣៤២ គ្រឿង។
ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន នាពេលកន្លងមក ធ្លាប់បានគូសបញ្ជាក់ អំពីគោលនយោបាយដ៏ត្រឹមត្រូវរបស់ រាជរដ្ឋាភិបាលក្នុងការផ្តល់សេវាសាធារណៈ សេវាចាំបាច់ ប្រកបដោយតម្លាភាព ប្រសិទ្ធភាព និងឆាប់ រហ័សជូនបងប្អូនប្រជាពលរដ្ឋ និងការផ្តល់សេវាផ្សេងៗទៀតដូចជា៖ ការដាក់ឱ្យដំណើរការមណ្ឌលប្តូរប័ណ្ណបើកបរនៅផ្សារទំនើបអ៊ីអន១ និងអ៊ីអន២ ដើម្បីផ្តល់ភាពងាយស្រួល ដល់បងប្អូនប្រជាពលរដ្ឋដែល មានបំណងចង់ប្តូរ ឬពន្យាបណ្ណបើកបរ ការដាក់ឱ្យប្រើប្រាស់ប្រព័ន្ធអនឡាញចុះបញ្ជីយានយន្ត ការស្នើសុំឆៀករថយន្តតាមប្រព័ន្ធអនឡាញអាចឱ្យប្រជាពលរដ្ឋស្នើសុំពេលវេលា ថ្ងៃខែដើម្បីទទួលសេវាឆៀក។ ក្រសួងនឹងបន្តខិតខំរកនីតិវិធីផ្សេងទៀតដើម្បី ផ្តល់សេវាងាយស្រួលជូនបងប្អូនប្រជាពលរដ្ឋ និងបន្តសាងសង់ប្រព័ន្ធហេដ្ឋារចនាសម្ព័ន្ធបន្ថែមទៀត ដូចជា៖ ការពង្រីកនិងពង្រឹងគុណភាពផ្លូវ ការសាងសង់ស្ពាន និងកំពង់ផែជាដើម ដើម្បីឱ្យប្រព័ន្ធដឹកជញ្ជូនមានភាពប្រកួតប្រជែង អាចដឹកជញ្ជូនបានក្នុងតម្លៃថោក និងអាចទាក់ទាញវិនិយោគិនបង្កើតការងារធ្វើ បង្កើនប្រាក់ចំណូលរបស់ប្រជាពលរដ្ឋផងដែរ។
ឯកឧត្តមទេសរដ្ឋមន្ត្រីបានអំពាវនាវដល់ក្រុមហ៊ុនដឹកជញ្ជូនឱ្យគោរពច្បាប់ មិនត្រូវដឹកជញ្ជូនទំនិញលើសទម្ងន់កម្រិតកំណត់ និងសូមឱ្យប្រជាពលរដ្ឋដែលប្រើប្រាស់ផ្លូវ ត្រូវគោរព ច្បាប់ចរាចរណ៍ទាំងអស់គ្នា មិនត្រូវបើកបរលើសល្បឿនកំណត់ មិនត្រូវប្រើគ្រឿងស្រវឹងនិង ទូរស័ព្ទពេល កំពុងបើកបរ និងយករថយន្តរបស់ខ្លួនទៅឆៀកឱ្យបានទៀងទាត់តាមច្បាប់ ដើម្បីកាត់បន្ថយគ្រោះថ្នាក់ចរា ចរណ៍នៅតាមដងផ្លូវ។
លើសពីនេះទៀត ឯកឧត្តមទេសរដ្ឋមន្ត្រី ក៏បានសំណូមពរឱ្យក្រុមហ៊ុន CMVIC ខិតខំប្រឹងប្រែងផ្តល់សេវា ឱ្យបានល្អជូនបងប្អូនប្រជាពលរដ្ឋ មានតម្លាភាព ប្រសិទ្ធភាព ស្មើភាពគ្នា និងខិតខំស្វែងរកបង្កើតមណ្ឌល ឆៀកបន្ថែមទៀតនៅតាមខេត្ត ដើម្បីបង្វិតសេវានេះទៅកៀកនឹងប្រជាពលរដ្ឋ និងបានជំរុញឱ្យមន្ត្រីក្រសួង សហការជិតស្និទ្ធជាមួយដៃគូផ្នែកឯកជន ដើម្បីពង្រឹងនិងពង្រីកសេវាសាធារណៈនេះឱ្យបានល្អជូនប្រជាពលរដ្ឋ តាមអនុសាសន៍ដ៏ថ្លៃថ្លារបស់សម្តេចតេជោនាយករដ្ឋមន្ត្រី៕ដោយ៖កូឡាប
