ភ្នំពេញ៖ នៅថ្ងៃទី៣០ ខែមេសា ឆ្នាំ២០២០ ក្រុមហ៊ុន អ អិម អេ (ខេមបូឌា) និងផ្សារមូលបត្រកម្ពុជាបានប្រារព្ធពិធីចុះបញ្ជីលក់សញ្ញាបណ្ណសាជីវកម្ម របស់ក្រុមហ៊ុន អ អិមអេ ដែលមានឈ្មោះថា សញ្ញាបណ្ណសាជីវកម្ម អ អិម អេ ខេមបូឌា ជាសញ្ញាបណ្ណមានបុគ្គលធនា ដែលមានទំហំសរុប ចំនួន ៨០ប៊ីលានរៀល ឬ ២០លានដល្លារអាមេរិក ជាមួយអត្រាគូប៉ុង ៥,៥ភាគរយ ក្នុងមួយឆ្នាំ និងមានឥណប្រតិទាន រយៈពេល ៥ឆ្នាំ គិតចាប់ពីថ្ងៃទី៩ ខែមេសា ឆ្នាំ២០២០ រហូតដល់ថ្ងៃទី៩ ខែមេសា ឆ្នាំ ២០២៥។
លោក ស៊ូ សុជាតិ បានលើកឡើងថា ក្រុមហ៊ុន អអិមអេ គឺជាក្រុមហ៊ុន ឯកជនទីមួយ ដែលមិនស្ថិតក្នុងវិស័យហិរញ្ញវត្ថុនៅកម្ពុជា ដែលធ្វើការបោះផ្សាយលក់មូលបត្របំណុល ជាសាធារណៈ។
លោកបន្ថែមថា ដោយសារកាលៈទេសៈនៃការរីករាលដាលនៃជំងឺកូវីដ១៩ នេះធ្វើឲ្យក្រុមហ៊ុនយល់ថា ការធ្វើពិពិធកម្មប្រភពទុនគឺជារឿងសំខាន់ ដោយហេតុតែក្រុមហ៊ុន ដែលមានប្រភពទុនតែមួយ នឹងធ្វើឲ្យក្រុមហ៊ុនជួបនឹងបញ្ហាប្រឈម។ ដូច្នេះក្នុងសា្ថនភាពលំបាកនេះ ការធ្វើពិពិធកម្មប្រភពទុនពីទីផ្សារមូលបត្រជាជម្រើសដ៏ល្អបំផុត។
លោក ហុង សុហួរ អគ្គនាយកនៃក្រុមហ៊ុនផ្សារមូលបត្រកម្ពុជា បានលើកឡើងពី កំណើននៃទីផ្សារមូលបត្រក្នុងឆ្នាំ ២០១៩ ជាមួយនឹងការកើនឡើងនៃចំនួនក្រុមហ៊ុន ចុះបញ្ជី ទំហំជួញដូរប្រចាំថ្ងៃ និងតម្លៃនៃភាគហ៊ុន ដែលកត្តាទាំងនេះ នឹងជួយប្រែក្លាយទីផ្សារមូលប្តរទៅជាប្រភពទុន ដ៏គួរឲ្យទុកចិត្តបាននៃទីផ្សារមូលបត្រ និងឧបករណ៍វិនិយោគដ៏គួរឲ្យចាប់អារម្មណ៍ របស់សាធារណជន។
លោក ងន សាំង អគ្គនាយកនៃក្រុមហ៊ុន អ អិម អេ ខេមបូឌា ក៏បានលើកឡើងដែរថា ការបោះផ្សាយនិងចុះបញ្ជីលក់មូលបត្របំណុលនេះ មិនត្រឹមតែជាប្រយោជន៍សម្រាប់ក្រុមហ៊ុនផ្ទាល់នោះទេ ប៉ុន្តែវាបានលើកកម្ពស់ និងពង្រីកទីផ្សារមូលបត្រកម្ពុជាផដែរ។ ការណ៍មនេះនឹងញ៉ាំងឲ្យមានជំនឿទុកចិត្ត និងភាពកក់ក្តៅក្នុងការប្រកបធុរកិច្ច នៅកម្ពុជាដោយមានទីផ្សារមូលធនអាចផ្តល់ប្រភពទុន និងជាចលករជំរុញដល់ការអភិវឌ្ឍសេដ្ឋកិច្ចជាតិ៕ដោយ៖សម្ផស្ស