បាត់ដំបង ៖ ប្រជាពលរដ្ឋនៅក្នុងខេត្តបាត់ដំបង បានបង្ហាញនូវការគាំទ្រ និងប្ដេជ្ញានឹងគោរពតាមច្បាប់ចរាចរណ៍ថ្មី និងស្នើឲ្យអនុវត្តស្មើភាពគ្នា នៅពេលមានអ្នកប្រព្រឹត្តខុស ចំពោះការធ្វើវិសោធនកម្មច្បាប់ចរាចរណ៍ផ្លូវគោក ត្រង់មាត្រាមួយចំនួន ពិសេសចំណុចការផាកពិន័យ។
ប្រជាពលរដ្ឋនៅបាត់ដំបង បានប្រាប់ឲ្យដឹងថា ពួកគាត់មិនបានប្រតិកម្មអ្វី ទៅនឹងការធ្វើវិសោធនកម្មច្បាប់ចរាចរណ៍ផ្លូវគោក របស់រាជរដ្ឋាភិបាល ព្រោះកាលណាប្រជាពលរដ្ឋ បានអនុវត្តបានត្រឹមត្រូវ នឹងជួយកាត់បន្ថយគ្រោះថ្នាក់ចរាចរណ៍ នៅកម្ពុជា។ មួយវិញទៀត នៅពេលកម្ពុជា មានការថយចុះ នៃការគ្រោះថ្នាក់ចរាចរណ៍នេះ គឺបានបង្ហាញពីការយល់ដឹងរបស់ពលរដ្ឋកាន់តែល្អប្រសើរ ហើយសម្រាប់ពួកគាត់ និងពលរដ្ឋនៅក្នុងសហគមន៍របស់ពួកគាត់ គឺបានយល់ដឹងច្រើន ពីច្បាប់ចរាចរណ៍ផ្លូវគោកថ្មីនេះផងដែរ។
លោក សាត គឹមសាន ស្នងការរងនគរបាលខេត្តបាត់ដំបង ទទួលបន្ទុកការងារចរាចរណ៍ បានមានប្រសាសន៍ថា សម្រាប់ខេត្តបាត់ដំបង ចំពោះច្បាប់ចរាចរណ៍ផ្លូវគោកថ្មីនេះ គឺត្រូវបានអាជ្ញាធរធ្វើការផ្សព្វផ្សាយ អស់រយៈពេលជាង១ខែហើយ ទៅដល់ពលរដ្ឋ ឲ្យពួកគាត់បានយល់ដឹង មុននឹងត្រូវអនុវត្តនៅថ្ងៃទី១ ខែឧសភា ឆ្នាំ២០២០នេះ ។ ចាប់ពីពេលអនុវត្តច្បាប់ចរាចរណ៍ផ្លូវគោកថ្មីទៅ កម្លាំងនគរបាលចរាចរណ៍ខេត្តបាត់ដំបង ដោយនៅតាមស្រុកនីមួយៗ មានការដាក់សមត្ថកិច្ចជាប្រចាំ ដើម្បីរឹតបន្តឹងច្បាប់នេះ មានកម្លាំងចាំត្រួតពិនិត្យនៅលើផ្លូវជាតិលេខ៥ សម្រាប់នៅក្នុងក្រុងបាត់ដំបង នឹងមានកម្លាំងសមត្ថកិច្ចចរាចរណ៍ចល័តចំនួន ៣ក្រុម និងមានកម្លាំងនៅចំណុចដើមទីផងដែរ៕ ដោយ ៖ អ៊ុងសារុំ