ភ្នំពេញ៖ ក្នុងកិច្ចប្រជុំពិគ្រោះយោបល់ ស្តីពី “ស្ថានភាពអាជីវកម្មនាពេលបច្ចុប្បន្ន និង វិធានការចាំបាច់នានា” ក្នុងពេលនៃការរីករាលដាលនៃជំងឺកូវីដ១៩ ដែលវិស័យឯកជនកំពុងជួបប្រទះ ក្នុងវិស័យសំខាន់ៗ សហព័ន្ធស្រូវអង្ករកម្ពុជា ក៏បានលើកអំពីវឌ្ឍនភាព នៃការនាំចេញអង្ករក្នុងត្រីមាសទី១ នៃឆ្នាំ២០២០ និងសំណូមពរដែលជាវិធានសម្រាប់ស្តារ និងជំរុញសេដ្ឋកិច្ចក្នុងវិស័យស្រូវអង្ករ។
ឧកញ៉ា សុង សារ៉ន ប្រធានសហព័ន្ធស្រូវអង្ករកម្ពុជា បានចូលរួមក្នុងកិច្ចប្រជុំដ៏មានសារសំខាន់នេះ បានសំណូមពរដែលជាវិធានសម្រាប់ស្តារ និងជំរុញសេដ្ឋកិច្ចក្នុងវិស័យស្រូវអង្កររួមមាន៖
ក- អនុញ្ញាតឱ្យនាំចេញអង្ករសឡើងវិញ ឱ្យបានឆាប់បំផុត ដើម្បីឱ្យរោងម៉ាស៊ីនកិនស្រូវអាចជម្រះសន្និធិស្តុកចាស់ និងសងកិច្ចសន្យាដែលជំពាក់អតិថិជន ដែលជំពាក់មុនបំរាមហាមនាំចេញអង្ករសមួយរយៈ ហើយបង្វិលដើមសងធនាគារ និង ត្រៀមទិញស្រូវនារដូវប្រមូលផល ក្នុងដើមខែ៧ ។
ខ- ត្រៀមថវិកាបន្ថែម ប្រមាណជា ៣០លានដុល្លារអាមេរិក បន្ថែមលើថវិកាចំនួន ៥០លានដុល្លារអាមេរិកដែលមានស្រាប់ រួមជាមួយថវិការបស់ វិស័យឯកជន ដែលមាន និង ធនាគារពាណិជ្ជផ្សេងៗ សរុបប្រមាណជា ២០០លានដុល្លារអាមេរិក ដែលអាចទិញស្រូវប្រមាណជា ៨០ម៉ឺនតោន។ សមត្ថភាពឃ្លាំង ស្តុកស្រូវ របស់រោងម៉ាស៊ីនកិនស្រូវនៅកម្ពុជា នាពេលបច្ចុប្បន្នគឺ អាចមានលទ្ធភាពស្តុកក្នុងមួយគ្រា ១,៩លានតោន ហើយសមត្ថភាពសម្ងួតប្រមាណជា ៤,៥ម៉ឺនតោនក្នុងមួយថ្ងៃ។
គ- ដោយស្ថានការណ៍កូវីដ១៩ អនុផលចេញពីអង្ករមួយចំនួនត្រូវបានរាំងស្ទះ ដូចជាកន្ទក់ កញ្ចុងអង្ករ…ជាដើមមិនត្រូវបាននាំចេញ សូមស្នើដល់រដ្ឋាភិបាល ផ្តល់ការលើកលែងលើពន្ធកាត់ទុកលើការដឹកជញ្ជូនស្រូវ និងអង្ករទាំងស្រុង ជាពិសេសពន្ធកាត់ទុកលើការជួលឃ្លាំង និងការដឹកជញ្ជូនដោយរថយន្តឯកជន ព្រោះកន្លងមកជាបន្ទុករោងម៉ាស៊ីនកិនស្រូវ។
ឃ- ផ្តល់លទ្ធភាព ឬ ជាគោលនយោបាយពិសេសដល់រោងម៉ាស៊ីនកិនស្រូវ ក្នុងការបំពាក់ថាមពលករកើតឡើងវិញដូចជាសូឡា ដែលជំរុញឱ្យថ្លៃដើមផលិតកម្ម កិនកែច្នៃអង្ករ សម្ងួតស្រូវ កាន់តែមានភាពប្រកួតប្រជែង ព្រោះថា គោលនយោបាយអគ្គិសនីនាពេលបច្ចុប្បន្ន មិនបានលើកទឹកចិត្តដល់រោងម៉ាស៊ីននីមួយៗភ្ជាប់ ឬវិនិយោគលើថាមពលប្រភេទនេះឡើយ គឺតម្រូវឱ្យចំណាយអានុភាព បូកនិងចំណាយថាមពល ផងដែរ បើសិនមានភ្ជាប់ ឬវិនិយោគលើសូឡានសម្រាប់រោងម៉ាស៊ីនកិនស្រូវ។ ការធ្វើឱ្យថ្លៃដើមទាបគឺបង្កើនភាពប្រកួតប្រជែងជាពិសេសអង្ករ ស ដែលមានលទ្ធភាព និងសក្តានុពលដាំដុះខ្ពស់ និងច្រើនដង។
ង- ការជំរុញ និងការវិនិយោគជាមួយសហគមន៍កសិករ តាមរយៈយន្តការកិច្ចសន្យាកសិកម្ម ភាពជាដៃគូរវាងរដ្ឋ វិស័យឯកជន និងកសិករ (PPPP-Public Private and Producer Partnership)។
សូមបញ្ជាក់ថា នាថ្ងៃព្រហស្បតិ៍ទី៣០ ខែមេសា ឆ្នាំ២០២០ វេលាម៉ោង ៩:០០នាទីព្រឹក នៅបន្ទប់ប្រជុំធំនៃអាគារ “ឃ” នៅទីស្តីការក្រសួងសេដ្ឋកិច្ច និងហិរញ្ញវត្ថុ មានរៀបចំកិច្ចប្រជុំពិគ្រោះយោបល់ ស្តីពី “ស្ថានភាពអាជីវកម្មនាពេលបច្ចុប្បន្ន និង វិធានការចាំបាច់នានា” ។
ឧកញ៉ា សុង សារ៉ន ប្រធានសហព័ន្ធស្រូវអង្ករកម្ពុជា បានចូលរួមក្នុងកិច្ចប្រជុំដ៏មានសារសំខាន់នេះដែលកិច្ចប្រជុំពិគ្រោះយោបល់នេះ ដឹកនាំដ៏ខ្ពង់ខ្ពស់ដោយ ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ព្រមទាំងមានវត្តមានឯកឧត្តមរដ្ឋលេខាធិការសំខាន់ៗមួយចំនួន។ នៅក្នុងកិច្ចប្រជុំនេះផងដែរ ក៏មានវត្តមានចូលរួមពី អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា ព្រមទាំងធុរជនសំខាន់ៗក្នុងព្រះរាជាណាចក្រកម្ពុជាមួយចំនួនផងដែរ។
កិច្ចប្រជុំពិគ្រោះយោបល់នេះ ធ្វើឡើងក្នុងគោលបំណងដើម្បីឱ្យផ្នែកឯកជនដែលជាធុរជនកំពុងធ្វើធុរកិច្ច ឬប្រតិបត្តិការពាណិជ្ជកម្ម វិនិយោគនានាក្នុងព្រះរាជាណាចក្រកម្ពុជា ផ្តល់ជាធាតុចូល ក៏ដូចជាវិស័យឯកជនកំពុងជួបប្រទះក្នុងវិស័យសំខាន់ៗរបស់ខ្លួន ជូនដល់ផ្នែករដ្ឋាភិបាល ស្វែងយល់បន្ថែមនូវបញ្ហាប្រឈមជាក់ស្តែងពី ការរីករាលដាលនៃជំងឺកូវីដ១៩ និងរួមគ្នាធ្វើយ៉ាងណាពិគ្រោះយោបល់លើវិធានការដោះស្រាយបញ្ហាចំពោះមុខ ក៏ដូចជាវិធានការស្តារសេដ្ឋកិច្ចឡើងវិញបន្ទាប់ពីជំងឺកូវីដ១៩ សាបរលាប។ កិច្ចប្រជុំពិគ្រោះយោបល់នេះ ផ្តោតសំខាន់លើប្រធានបទដូចខាងក្រោម៖
១. វិធានការដែលរាជរដ្ឋាភិបាលគួរដាក់ចេញក្នុងការស្តារសេដ្ឋកិច្ច និងជំរុញកំណើន។
២. លទ្ធភាពនៃការចូលរួមរបស់វិស័យឯកជនក្នុងការដោះស្រាយបញ្ហាចំពោះមុខ ក៏ដូចជាការស្តារ និងជំរុញកំណើនសេដ្ឋកិច្ច។
បន្ទាប់ពីបានធ្វើការពិគ្រោះយោបល់ និងការលើកឡើងរបស់ធុរជនសំខាន់ៗពីវិស័យឯកជនរួចមក ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានវាយតម្លៃខ្ពស់ ថ្លែងអំណរអរគុណចំពោះវិស័យឯកជន ដែលបានចូលរួមកិច្ចប្រជុំពិគ្រោះយោបល់នាព្រឹកនេះ ហើយបានផ្តល់ជាធាតុចូល យោបល់ល្អសំខាន់ៗ ប្រហាក់ប្រហែលនឹងរាជរដ្ឋាភិបាលកំពុងគិតគូរផងដែរ ហើយរាជរដ្ឋាភិបាលនឹងរៀបចំវិធានការបន្ថែមទៀត សម្រាប់ដោះស្រាយចំពោះផលប៉ះពាល់ក្នុងវិស័យសំខាន់ៗមួយចំនួនរួមមាន ១. វិស័យស្រូវអង្ករ ២. វិស័យកាត់ដេរ ៣. វិស័យធនាគារ ៤. វិស័យទេសចរណ៍ និង ៥. វិស័យផ្សេងៗទៀតដែលនឹងរងផលប៉ះពាល់ផងដែរ ក្នុងអំឡុងការរីករាលដាលនៃជំងឺកូវីដ១៩ នេះ៕
ដោយ៖កូឡាប