ភ្នំពេញ៖ សមត្ថកិច្ចជំនាញ មន្ទីរប្រឆាំងគ្រឿងញៀន នៃអគ្គស្នងការដ្ឋាននគរបាលជាតិ បង្ក្រាបបទល្មើសកែច្នៃ ជួញដូរគ្រឿងញៀន និងរឹបអូសថ្នាំញៀន ជិត ៦០គីឡូក្រាម នៅខណ្ឌពោធិ៍សែនជ័យ រាជធានីភ្នំពេញ ។ នគរបាលជំនាញ បានធ្វើសន្និសីទកាសែត បង្ហាញមុខជនល្មើស២នាក់ ជាសាធារណៈ ហើយបញ្ជូនទៅតុលាការដើម្បីបន្តនីតិវិធីច្បាប់។
អនុវត្តបញ្ជាដឹកនាំដ៏ខ្ពង់ខ្ពស់របស់ ឯកឧត្ដម នាយឧត្ដមសេនិយ៍ សន្តិបណ្ឌិត អគ្គស្នងការនគរបាលជាតិ និងតាមការបញ្ជាដឹកនាំដោយផ្ទាល់ របស់ ឯកឧត្ដម នាយឧត្ដមសេនិយ៍ ម៉ក់ ជីតូ អគ្គស្នងការរងនគរបាលជាតិ និង ឯកឧត្ដម ឧត្ដមសេនិយ៍ឯក ឡឹក វណ្ណៈ នាយកមន្ទីរប្រឆាំងគ្រឿងញៀន នៅវេលាម៉ោង ១៤និង៤០នាទី ថ្ងៃទី ២៩ ខែមេសា ឆ្នាំ ២០២០ កម្លាំងជំនាញ(ក១១) នៃមន្ទីរប្រឆាំងបទល្មើសគ្រឿងញៀន ដឹកនាំដោយលោកឧត្ដមសេនិយ៍ត្រី ស៊ី ផល្លា នាយករងមន្ទីរ និងលោកវរសេនីយ៍ឯក សេង ឃុនណាង នាយការិយាល័យ មានការដឹកនាំសម្របសម្រួលពីលោក សាយ ណូរ៉ា ព្រះរាជអជ្ញារង បានស្រាវជ្រាវ និងបង្ក្រាបករណីកែច្នៃ ជួញដូរគ្រឿងញៀន នៅចំណុចផ្ទះគ្មានលេខ ភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ជាលទ្ធផល : ឃាត់២នាក់(ស្រី១): – ឈ្មោះ LEE KWAN FUK ភេទប្រុស ជនជាតិចិន(ហុងកុង) កាន់លិខិតឆ្លង ដែនលេខKJ06288571 – ឈ្មោះ THET THET HLAING ភេទស្រី ជនជាតិមីយ៉ាន់ម៉ា កាន់លិខិតឆ្លងដែនលេខ MA 030746។ វត្ថុតាងចាប់យក: – អ៊ិចស្តាស៊ី(MDMA) ប្រភេទគ្រាប់ ទម្ងន់ ៥៣,០៤៥.៥៧ក្រាម ។ – អ៊ិចស្តាស៊ី(MDMA) ប្រភេទម្សៅ ទម្ងន់ ៤,៨៦៦.០៨ ក្រាម ។ សរុបទម្ងន់: ៥៧.៩១១,៦៥ក្រាម(ហាសិបប្រាំពីរគីឡូក្រាម ប្រាំបួនរយដប់មួយក្រាម ហុកសិបប្រាំ)។
– ម៉ាស៊ីនកែច្នៃ ៣គ្រឿង ។
បច្ចុប្បន្ន ជនសង្ស័យ និងវត្ថុតាង បានបញ្ជូនមកមន្ទីរប្រឆាំងគ្រឿងញៀន ដើម្បីបន្តការស៊ើបអង្កេត តាមចាប់មេខ្លោង និងអ្នកពាក់ព័ន្ធ ៕ដោយ៖កូឡាប
