ខេត្តប៉ៃលិន់ ៖ កម្លាំងសមត្ថកិច្ចចម្រុះខេត្តប៉ៃលិន បានចាប់ឃាត់បងប្អូនប្រជាពលរដ្ឋណា ដែលល្មើសនឹងច្បាប់ចរាចរណ៍៍ និងធ្វើការផាកពិន័យទៅតាមអនុក្រត្យថ្មី កាលពីព្រឹកថ្ងៃទី១ ខែឧសភា ឆ្នាំ២០២០ ដែលគេសង្កេតឃើញកម្លាំងសមត្ថកិច្ចចម្រុះ នៃស្នងការនគរបាលខេត្តប៉ៃលិនជាច្រើននាក់ កំពង់ដាក់ពង្រាយទៅតាមគោលដៅ ក្នុងក្រុងប៉ៃលិន និងស្រុកសាលាក្រៅ ដើម្បីរឹតបន្តឹងច្បាប់ចរាចរណ៍ផ្លូវគោក ព្រមទាំងឱ្យបងប្អូន ចូលរួមការគោរពច្បាប់ចរាចរណ៍ផងដែរ។
លោកឧត្តមសេនីយ៍ទោ សេង សុគន្ធ ស្នងការនគរបាលខេត្តប៉ៃលិន បានមានប្រសាសន៍ឲ្យដឹងថា ដោយអនុវត្តន៍ តាមផែនការ របស់ប្រមុខរាជរដ្ឋាភិបាល ក៏ដូចជាបទបញ្ជា របស់ក្រសួងមហាផ្ទៃ នៅព្រឹកថ្ងៃទី១ ខែឧសភា ឆ្នាំ២០២០នេះ សមត្ថកិច្ចចម្រុះនៃស្នងការដ្ឋាននគរបាលខេត្តប៉ៃលិន បានចុះដាក់ពង្រាយទៅតាមគោលដៅក្នុងខេត្តប៉ៃលិន ដើម្បីពង្រឹងច្បាប់ចរាចរណ៍ សុវត្ថិភាពផ្លូវគោក ដើម្បីឲ្យកាន់តែមានប្រសិទ្ធភាព។ នៅក្នុងខេត្តប៉ៃលិន មានតែ២គោលដៅ គឺនៅក្រុងប៉ៃលិន និងស្រុកសាលាក្រៅ ជាមួយគ្នានេះក៏មានកម្លាំងសមត្ថកិច្ចចល័តផងដែរ។ ចំពោះបងប្អូនប្រជាពលរដ្ឋណា ដែលល្មើសនឹងច្បាប់ចរាចរណ៍៍ គឺសមត្ថកិច្ចនិងធ្វើការចាប់ឃាត់ ហើយធ្វើការផាកពិន័យ ទៅតាមអនុក្រត្យថ្មី ដែលបានចែងក្នុងច្បាប់។ ការផាកពិន័យនេះ មិនមែនជាការ ជម្រិតទារប្រាក់នោះទេ ប៉ុន្តែជាការផាកពិន័យ ដើម្បីឱ្យបងប្អូនគោរពច្បាប់ចរាចរណ៍ ព្រោះថាអាយុជីវិតរបស់បងប្អូនមានតម្លៃណាស់។ ប្រសិនបងប្អូន ប្រជាពលរដ្ឋ បានឃើញកម្លាំងនគរបាល ធ្វើការផាកពិន័យមិនត្រឹមត្រូវ តាមច្បាប់ឬក៏យកលើសពីច្បាប់កំណត់ ការផាកពិន័យយកប្រាក់តែ មិនចេញវិក្កយបត្រ ត្រូវប្រញ៉ាប់រាយការណ៍ មកកាន់ស្នងការនគរបាលខេត្តប៉ៃលិន ជាបន្ទាន់។
លោកឧត្តមសេនីយ៍ទោ សេង សុគន្ធ បានណែនាំដល់មន្ត្រីអនុវត្តច្បាប់ចរាចរណ៍ផ្លូវគោក នៅតាមគោលដៅ ត្រូវពង្រឹងច្បាប់ចរាចរណ៍ ឲ្យបានម៉ឺងម៉ាត់និងពិន័យឲ្យបានត្រឹមត្រូវ មិនត្រូវផាកពិន័យលើសច្បាប់កំណត់ឡើយ ហើយការផាកពិន័យ គឺមិនមានភាពយោគយល់ ប្រកាន់អ្នកតូច អ្នកធំឡើយគឺមានតម្លាភាព ស្មើភាពគ្នាផងដែរ៕ ដោយ ៖ អ៊ុងសារុំ