ខេត្តស្វាយរៀង៖ គ្រោះថ្នាក់ចរាចរណ៍ដ៏រន្ធត់មួយ បង្កដោយរថយន្ត១គ្រឿង បានកិនក្មេងស្រី២នាក់ បងប្អូនបណ្តាលឲ្យស្លាប់ភ្លាមៗនៅនឹងកន្លែងនៅលើកំណាត់ផ្លូវជាតិលេខ១ ត្រង់ចំណុចលើស្ពានហាយវ៉េ ចន្លោះគីឡូម៉ែត្រលេខ១២៥/១២៦ ស្ថិតនៅភូមិសាលាស្រុកចាស់ សង្កាត់ព្រៃឆ្លាក់ ក្រុងស្វាយរៀង ខេត្តស្វាយរៀង ដែលករណីនេះ បានកើតឡើងកាលពីវេលាម៉ោ៥និង ៤៥ នាទីល្ងាច ថ្ងៃទី៣០ ខែមេសា ឆ្នាំ២០២០។
បើតាមបុរសម្នាក់ ឈ្មោះសុខ វ៉ាន អាយុ៥៤ឆ្នាំ ត្រូវជាតារបស់កុមារីរងគ្រោះ បានឲ្យដឹងថា គាត់និងប្អូនប្រុស រស់នៅភូមិស្វាយចេក ឃុំសំឡី ស្រុកកំពង់រោទិ៍ ខេត្តស្វាយរៀង ហើយចៅស្រីដែលត្រូវរថយន្តកិនស្លាប់នោះ ទី១.ឈ្មោះវរៈ អាយ៉ា អាយុ១០ឆ្នាំ និងទី២.ឈ្មោះវ៉ាន ស្រីវ៉ា អាយុ៨ឆ្នាំ មានទីលំនៅភូមិស្វាយចេក ឃុំសំឡី ស្រុកកំពង់រោទិ៍។
ប្រភពដដែលបន្តទៀតថា ចៅស្រីឈ្មោះវរៈ អាយ៉ា គឺមានឳពុកឈ្មោះកែន ដារ៉ា អាយុ២៨ឆ្នាំ បានស្លាប់ដោយសារគ្រោះថ្នាក់ចរាចរណ៍ (រថយន្តបុកស្លាប់) កាលពី៧ឆ្នាំមុន ឥឡូវកូនស្រីត្រូវរថយន្តកិនស្លាប់ទៀត។
ជីតា សុខវ៉ាន បានឲ្យដឹងទៀតថា មុនពេលកើតហេតុ ប្អូនប្រុសគាត់ឈ្មោះប្រាក់ សុគន្ធារី អាយុ៥០ឆ្នាំ បានជិះមូតូម៉ាក្សលែត Let,s ពណ៌សលាយខៀវពាក់ផ្លាកលេខស្វាយរៀង 1-N6468 ឌុបចៅស្រី២នាក់ខាងលើ ពីទិសខាងកើតទៅលិច ក្នុងគោលបំណងទៅការក្មួយនៅស្រុកស្វាយជ្រំ ដែលចូលរោងនៅថ្ងៃ៣០ ខែមេសា ឆ្នាំ២០២០ ហើយត្រូវការនៅថ្ងៃទី១ ខែឧសភា ឆ្នាំ២០២០នេះ ហើយរូបគាត់ជាបងជិះម៉ូតូតាមក្រោយលុះមកដល់លើស្ពានហាយវ៉េ កន្លែងកើតហេតុ មានរថយន្តមួយគ្រឿងពណ៌ស មិនចាំម៉ាក និងកលេខ បានបើកស្របទឹសគ្នាពីកើតមកលិចក៏បើកយ៉ាងលឿន វ៉ាជែងម៉ូតូ ហើយបានកៀរប៉ះដៃម៉ូតូជនរងគ្រោះ តា និងចៅ បណ្តាលឲ្យដួលម៉ូតូ តាដួលក្បាលទៅខាងជើង រីឯចៅស្រីទាំងពីរដួលបោកក្បាល មកត្បូងចំកង់រថយន្តខាងក្រោយ កិនចំពីលើក្បាល (ពាក់មួកសុវត្ថិភាពទាំងពីនាក់) កិនបែកក្បាលបែកទាំងមួកសុវត្ថិភាព ស្លាប់ភ្លាមៗមួយរំពេច រីឯជីតារបួសស្រាល ចំណែកម៉ូតូគ្មានខូចអ្វីទេ។
រីឯរថយន្តបង្កបានបន្ថែមល្បឿន បើកគេចទៅទិសខាងលិចបាត់ស្រមោល បន្សល់ទុកសពកុមារីរងគ្រោះ២នាក់ បងប្អូននិងតា នៅនឹងកន្លែងកើតហេតុ។ បន្ទាប់មកសមត្ថកិច្ចនគរបាលក្រុង និងនគរបាលចរាចរណ៍ខេត្តស្វាយរៀង បានហៅរថយន្តសាមុយ ដឹកសពជនរងគ្រោះយកទៅស្រុកកំណើត ដើម្បីធ្វើបុណ្យតាមប្រពៃណី ចំពោះម៉ូតូសមត្ថកិច្ចយកទៅរក្សាទុក នៅការិយាល័យនគរបាលចរាចរណ៍ ស្នងការដ្ឋាននគរបាលខេត្តស្វាយរៀង។ មូលហេតុរថយន្តបង្កបើកវ៉ាជែងលើស្ពានហើយកៀរម៉ូតូជនរងគ្រោះ៕ ដោយ៖វ៉ៃកូ