ភ្នំពេញ៖ អំពើចោរឆក់ ប្លន់ គាស់ផ្ទះ និងសកម្មភាពគ្រឿងញៀន គឺនៅតែបង្កជាបញ្ហាគួរឲ្យព្រួយបារម្ភនៅក្នុងសង្គមបច្ចុប្បន្ន បើទោះជាគោលនយោបាយជាតិ ភូមិឃុំមានសុវត្ថិភាព កំពុងត្រូវបានអនុវត្តនៅទូទាំងប្រទេសក្តី។
យ៉ាងណាមិញ មួយរយៈចុងក្រោយនេះ គេក៏សង្កេតឃើញថា នៅក្នុងសង្កាត់ចោមចៅ ខណ្ឌពោធិ៍សែនជ័យ បានកើតមានឡើងករណីដូចជា គ្រឿងញៀន រំលោភ និងសកម្មភាពគាស់ផ្ទះជាដើម ។
ជាក់ស្តែង កាលពីថ្ងៃទី៣០ ខែមេសា ស្រាប់តែមានករណីចោរលួចគាស់កញ្ចក់រថយន្តស៊េរីទំនើប១គ្រឿងអស់មួយចំហៀង នៅក្នុងភូមិគ្រឹះភូមិគ្រឹះសុភមង្គល ដែលមានសន្តិសុខយាមកាម ២៤ ម៉ោង ។ ភូមិគ្រឹះភូមិគ្រឹះសុភមង្គល ស្ថិតនៅក្នុងសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
បើតាមតៃកុងឡាន បានប្រាប់អ្នកសារព័ត៌មានយើងឲ្យដឹងថា កញ្ចក់រថយន្ត១ចំហៀងដែលត្រូវបានចោរយកទៅបាត់នេះ គឺមានតម្លៃប្រមាណ 400$ ទៅ 500$ ឯណោះ ។ គាត់បានបន្តថា នៅយប់ថ្ងៃកើតហេតុ សន្តិសុខបានប្រាប់ថា មានក្មេងស្ទាវៗបានជិះម៉ូតូចំនួន២គ្រឿងចូលមកក្នុងភូមិគ្រឹះខាងលើ ហើយបានជិះចេញទៅវិញ ដោយមិនថាមករកអ្វីដែរ ។ នេះសបញ្ជាក់ឲ្យឃើញថា ជាការធ្វេសប្រហែសដ៏ធំមួយរបស់សន្តិសុខ ដែលមិនគួរណាអនុញ្ញាតឲ្យអ្នកមិនស្គាល់ ចេញចូលក្នុងភូមិគ្រឹះ ដោយសេរីពុំបានសួរនាំអ្វីសោះនោះ។
ករណីខាងលើនេះ បុរសម្នាក់ដែលជាតៃកុងរថយន្តនោះ បាននិយាយថា “នៅពេលកើតហេតុ គេឃើញមានក្មេងទំនើង២នាក់ បានជិះម៉ូតូឆ្វែលចូលក្នុងបុរីនេះ ហើយស្រាប់តែមួយសន្ទុះក្រោយមក ស្រាប់បាត់កញ្ចក់រថយន្តតែម្តង។ ក្មេងទំនើងនោះ គេមិនដែលឃើញមានវត្តមាននៅក្នុងបុរីនោះទេ គឺជាមនុស្សចំណូលថ្មី។ នៅក្នុងបុរីនេះ ម្ចាស់ផ្ទះបានបង់លុយឲ្យសន្តិសុខ”។
នៅពេលដែលភ្នាក់ងារស៊ីអ៊ីអិន បានជួបសម្ភាសន៍ផ្ទាល់ជាមួយតៃកុងរថយន្តនោះ បានលើកឡើងថា ជាធម្មតាសន្តិសុខក្នុងហាក់ពុំដែលដើរល្បាតក្នុងបរិវេនបុរីនេះទេ គឺពួកគាត់នៅតែនៅផ្នែកខ្លោងទ្វាខាងមុខ ហើយល្ងាចឡើងពួកគាត់ បានកៀរគរជុំគ្នាផឹកស៊ីយ៉ាងសប្បាយ ដោយមិនគិតយាមកាមក្នុងបុរីនោះទេ គឺពួកគាត់ស្រវឹងដេកលក់បាត់អស់ ដូច្នេះហើយទើបបានជាផ្តល់ឱកាសឲ្យក្មេងទំនើប អាចចូលមកលួចកាច់កញ្ចក់រថយន្តបានយ៉ាងស្រួល ដោយមិនរំខានសន្តិសុខនោះឡើយ។
តៃកុងរថយន្តរូបនោះ ក៏បានស្នើសុំទៅដល់សន្តិសុខក្នុងបុរី សូមមេត្តាយាមកាមឲ្យបានហ្មត់ចត់ផង ព្រោះប្រជាពលរដ្ឋដែលរស់នៅក្នុងបុរីនេះ ពឹងលើសន្តិសុខទាំងស្រុង ជាអ្នកជួយមើលថែទ្រព្យដូចជារថយន្ត ម៉ូតូ ជាដើម។ ជាពិសេសស្នើសុំដល់អាជ្ញាធរមូលដ្ឋាន នគរបាល មេត្តាជួយដើរល្បាតក្នុងមូលដ្ឋានផង កុំឲ្យចោរបានដៃខ្លាំងពេក ព្រោះថាអាងតែបុរីមានសន្តិសុខការពារ ទើបទុករថយន្តនៅខាងក្រៅផ្ទះ ។
ចំណែកម្ចាស់រថយន្ត បានពោលពាក្យយ៉ាងខ្លីថា “លុយវាសំខាន់ហើយតែសុវត្ថិភាពមិនល្អ”។
តៃកុងរថយន្ត បានសំណូមពរដល់សន្តិសុខក្នុងបុរី ឲ្យសួរនាំអ្នកដែលចេញចូលក្នុងបុរីនេះផង “ថាទៅណាមកណាផង” ដើម្បីឲ្យបានដឹងគោលដៅអ្នកចូលក្នុងបុរី ។
អ្វីដែលគួរឲ្យកត់សម្គាល់ទៀតនោះ កាលពីថ្ងៃទី២៩ ខែមេសា ឆ្នាំ២០២០ នៅជាប់ម្ចាស់ផ្ទះរងគ្រោះ ព្រោះត្រូវចោរកាត់កញ្ចក់រថយន្តទៅបាត់ គេបានឃើញមានក្មេងស្ទាវៗ បានជួបជុំគ្នាផឹកស៊ីវ៉ៃសោលាន់ឮខ្លាំងៗបង្កការរំខានយ៉ាងខ្លាំង នៅក្នុងភូមិគ្រឹះសុភមង្គល សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។
តាមរយៈនេះផងដែរ ម្ចាស់ផ្ទះរងគ្រោះ និងក៏ដូចជាប្រជាពលរដ្ឋជិតខាង បានសំណូមពរដល់អាជ្ញាធរមូលដ្ឋាន ជាពិសេសសន្តិសុខនៅក្នុងភូមិគ្រឹះសុភមង្គល សូមចុះពិនិត្យពង្រឹងសន្តិសុខឡើងវិញផង ព្រោះថា គេសង្កេតឃើញសន្តិសុខតែងតែជុំគ្នាផឹក ជំនួសឲ្យការមិនដើរល្បាតក្នុងភូមិគ្រឹះសោះឡើយ៕ ដោយ៖ លឹម ហុង