ភ្នំពេញ៖ ក្នុងពេលដែលសមត្ថកិច្ចចាប់ផ្ដើមអនុវត្តការផាកពិន័យធ្ងន់ធ្ងរ ចំពោះបទល្មើសចរាចរណ៍ ប្រជាពលរដ្ឋជាច្រើនមកពីរាជធានីភ្នំពេញ និងបណ្តាខេត្តនានា បានសម្រុកទៅពន្យារប័ណ្ណបើកបរ ឬប្តូរប័ណ្ណបើកបរថ្មី និងយករថយន្តរបស់ពួកគេទៅត្រួតពិនិត្យបច្ចេកទេសឆៀក ក្នុងរយៈពេលប៉ុន្មានថ្ងៃចុងខែមេសានេះ។
ក្រុមពលរដ្ឋទាំងនោះ បានប្រាប់ថា ពួកគេព្រួយបារម្ភពីការឆ្លងវីរុសកូរ៉ូណា ប៉ុន្តែ ពួកគេបានឈររង់ចាំ ពីគ្នាយ៉ាងតិច ១ម៉ែត្រ តាមការណែនាំរបស់ក្រសួងសុខាភិបាល ដើម្បីបង្ការការឆ្លងវីរុសកូរ៉ូណា។
ចំណែកក្រសួងសាធារណការនិងដឹកជញ្ជូន បានលើកឡើងថា សូមកោតសសើរបងប្អូនប្រជាពលរដ្ឋដែលទៅធ្វើប័ណ្ណបើកបរយ៉ាងច្រើនកុះករ នៅផ្សារទំនើបអ៊ីអនទី១ និងទី២ ដោយរក្សាគម្លាត និងអនាម័យ ដើម្បីចូលរួមការពារការរីករាលដាលជំងឺផ្លូវដង្ហើមបានយ៉ាងល្អ សម្រាប់នៅថ្ងៃទី១ ខែឧសភានេះ។
ក្រសួងសាធារណការ និងដឹកជញ្ជូន សូមជូនដំណឹងដល់បងប្អូនប្រជាពលរដ្ឋមេត្តាជ្រាបថា មណ្ឌលផ្តល់ប័ណ្ណបើកបរយានយន្ត ផ្សារទំនើបអ៊ីអន១ បានផ្លាស់ប្តូរម៉ោងធ្វើការ ទៅ០៩:០០ ព្រឹក ដល់ម៉ោង ០៨:០០យប់ ចាប់ពីថ្ងៃជូនដំណឹងនេះទៅ ដោយយោងការផ្លាស់ប្តូរគោលការណ៍ផ្សារទំនើបអ៊ីអន១។
ចំណែកឯមណ្ឌលផ្តល់ប័ណ្ណបើកបរយានយន្តផ្សារទំនើបអ៊ីអន២ គឺធ្វើការងារធម្មតាចពីម៉ោង០៩:០០ ព្រឹក ដល់ម៉ោង ១០:០០យប់ ។ មណ្ឌលទាំងពីរនេះ បន្តការផ្តល់សេវាជារៀងរាល់ថ្ងៃ ចាប់ពីថ្ងៃចន្ទ ដល់ថ្ងៃអាទិត្យ។
ទន្ទឹមនឹងនេះដែរ ក្រសួងសូមថ្លែងអំណរគុណ ដល់បងប្អូនប្រជាពលរដ្ឋ ដែលបានគោរពអនុវត្តតាមការណែនាំ ក្នុងការរក្សាគម្លាត គោលការណ៍អនាម័យ និងពាក់ម៉ាសត្រឹមត្រូវ តាមការចាំបាច់ ពេលមកទទួលសេវាប្រឡង ប្តូរ និងពន្យារប័ណ្ណបើកបរ នៅអ៊ីអនទី១ និងទី២។
សូមបន្តចូលរួមប្រកាន់ភ្ជាប់គោលការណ៍ តាមការណែនាំខាងលើ ដើម្បីទប់ស្កាត់ការរីករាលដាល នៃជំងឺកូវីដ១៩ ទាំងអស់គ្នា។
ប្រជាពលរដ្ឋដែលទៅទទួលសេវានៅមណ្ឌលផ្ដល់ប័ណ្ណបើកបរ ទាំងក្នុងផ្សារទំនើបអ៊ីអន១ និងអ៊ីអន២ ចូលរួមរក្សាគម្លាតសុវត្ថិភាពបុគ្គល និងពាក់ម៉ាសទាំងអស់គ្នា ដើម្បីការពារជំងឺ COVID-19 ក្រោយមានការណែនាំពីក្រសួងសុខាភិបាល និងមានការសម្របសម្រួល ពីមន្ត្រីនាយកដ្ឋានដឹកជញ្ជូនផ្លូវគោក ក្រសួងសាធារណការ និងដឹកជញ្ជូន និងសមត្ថកិច្ច ប្រចាំការនៅទីតាំង មណ្ឌលផ្ដល់ប័ណ្ណបើកបរ។
ជាការកត់សម្គាល់ កាលពីប៉ុន្មានថ្ងៃមុន គេសង្កេតឃើញថា ប្រជាពលរដ្ឋដែលទៅទទួលសេវានៅមណ្ឌលផ្ដល់ប័ណ្ណបើកបរ ក្នុងផ្សារទំនើបអ៊ីអន១-២ ហាក់មានការធ្វេសប្រហែសភ្លេចការពារ សុវត្ថិភាពផ្ទាល់ខ្លួន ដោយពួកគាត់មិនបានរក្សាគម្លាតសុវត្ថិភាពបុគ្គល និងមិនបានចូលរួមពាក់ម៉ាសការពារត្រឹមត្រូវ តាមអ្វីដែលជាការណែនាំរបស់ក្រសួងសុខាភិបាលនោះឡើយ។
ក្រោយឃើញសកម្មភាពបែបនេះ លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានអំពាវនាវដល់ប្រជាពលរដ្ឋ សូមចូលរួមអនុវត្ដគម្លាតសុវត្ថិភាពសង្គម និង និងគម្លាតសុវត្ថិភាពសង្គមដើម្បីចូលរួមការពារជំងឺកូវីដ-១៩។
កញ្ញា ម៉ែន ច័ន្ទសុកុល ប្រធាននាយកដ្ឋានដឹកជញ្ជូនផ្លូវគោក បានប្រាប់បណ្តាញព័ត៌មានក្នុងស្រុកនៅរសៀលថ្ងៃទី១ ខែឧសភា ឆ្នាំ២០២០នេះថា ក្រោយឃើញស្ថានភាពបែនេះ ក្នុងរយៈប៉ុន្មានថ្ងៃមកនេះ មន្ដ្រីរបស់យើង សហការជាមួយសមត្ថកិច្ច ដែលទទួលបន្ទុករៀបចំនៅមណ្ឌលផ្ដល់ប័ណ្ណបើកបរ បានរៀបចំសណ្ដាប់ធ្នាប់ឡើងវិញ ដោយមានគូសជាគំនូសសម្រាប់ ឲ្យប្រជាពលរដ្ឋ ដែលមកទទួលសេវាឈរឃ្លាតពីគ្នាជាង ១ម៉ែត្រ និងតម្រូវឲ្យពាក់ម៉ាសគ្រប់ៗគ្នា ដើម្បីរក្សាសុវត្ថិភាព ចូលរួមការពារ COVID-19។
ប្រធាននាយករដ្ឋព័ត៌មានវិទ្យា និងទំនាក់ទំនងសាធារណៈនៃក្រសួងសាធារណការ និងដឹកជញ្ជូន លោក ហ៊ាង សុទ្ធាយុត្តិ បានប្រាប់សារព័ត៌មានក្នុងស្រុកថា គិតត្រឹមថ្ងៃសុក្រនេះ ចំនួនពលរដ្ឋដែលបានទៅស្នើសុំប័ណ្ណបើកបរថ្មី ពន្យារប័ណ្ណបើកបរ ឬក៏ត្រួតពិនិត្យបច្ចេកទេសយានយន្ត បានកើនឡើងទ្វេដងនៅក្នុងរយៈពេលពីរសប្ដាហ៍ចុងក្រោយមកនេះ ដែលទាមទារឱ្យមន្ត្រីរបស់ក្រសួងបង្កើនម៉ោងធ្វើការងារ ដើម្បីផ្ដល់សេវារហូតដល់ម៉ោង ១១យប់ និងនៅថ្ងៃឈប់សម្រាក។ ក្រសួងបានចេញប័ណ្ណបើកបរសរុបដល់ទៅ ៣.៤០៣សន្លឹក និងបានផ្ដល់ការត្រួតពិនិត្យបច្ចេកទេសរថយន្តចំនួន ៨.៥៤៨គ្រឿង នៅក្នុងរយៈពេល ២ថ្ងៃចុងក្រោយនៃខែមេសាកន្លងមកនេះ។ ការស្នើសុំប័ណ្ណបើកបរ និងការត្រួតពិនិត្យបច្ចេកទេសយានយន្ត បានកើនឡើងយ៉ាងគំហុកដល់ទៅជាង ២០០ភាគរយ បើធៀបនឹងតួលេខនៅថ្ងៃធម្មតា ដែលមានចំនួនត្រឹមតែជាង ២ពាន់គ្រឿងប៉ុណ្ណោះ៕
ដោយ៖កូឡាប
