ភ្នាក់ងារសារព័ត៌មានរដ្ឋកូរ៉េខាងជើង នៅថ្ងៃសៅរ៍នេះបានចុះផ្សាយថា មេដឹកនាំកូរ៉េខាងជើងគីម ជុងអ៊ុនបានចូលរួមក្នុងពិធីបញ្ចប់ការសាងសង់ រោងចក្រផលិតជី នៅតំបន់ភាគខាងជើង ទីក្រុងសេអ៊ូល។ នេះគឺជាការលេចមុខជាសាធារណៈលើកដំបូង បន្ទាប់ពីលាក់ខ្លួនចាប់តាំងពីថ្ងៃទី ១១ ខែមេសាមក។
សារព័ត៌មាន KCNA ផ្សាយថា លោក គីម “បានចូលរួមក្នុងពិធី” នៅថ្ងៃសុក្រ ហើយអ្នកចូលរួមទាំងអស់ បានស្រែកអបអរនូវវត្តមានរបស់គាត់។
លោកក៏បានធ្វើការពិនិត្យរោងចក្រនោះផងដែរ និងត្រូវបានគេរៀបរាប់ប្រាប់សង្ខេប ពីដំណើរនៃការផលិតក្នុងរោងចក្រ។
សូមបញ្ជាក់ថា មុនពេលមានការចុះផ្សាយ ពីការលេចមុខជាសាធារណៈនេះ មានការប៉ាន់ស្មានជាច្រើនអំពីសុខភាព របស់មេដឹកនាំផ្តាច់ការរូបនោះ ក្រោយពេលរូបលោកខកខាន ការប្រារព្ធខួបកំណើតរបស់លោកតាលោកឈ្មោះ Kim II Sung កាលពីថ្ងៃទី ១៥ ខែមេសា។ ពិធីនោះជាព្រឹត្តិការណ៍ដ៏សំខាន់ នៅក្នុងប្រទេសកូរ៉េខាងជើង ហើយក្នុងនាមជាមេដឹកនាំ លោក គីម ជុងអ៊ុនជារឿយៗ បានធ្វើដំណើរទៅកាន់វិហារកន្លែងដែលគេតម្កល់ជីតាលោក។
គីម ជុងអ៊ុន មិនបានលេចមុខជាសាធារណៈ ចាប់តាំងពីលោកបានចូលរួមក្នុងកិច្ចប្រជុំនយោបាយ របស់បក្សពលករកូរ៉េខាងជើងកាលពីថ្ងៃទី ១១ ខែមេសាមក។ មានការចុះផ្សាយជាច្រើនថា លោក បានស្លាប់បាត់បង់ជីវិត ក្រោយពេលធ្វើការវះកាត់បេះដូងរួច។
ប៉ុន្តែ ទីប្រឹក្សាសន្តិសុខរបស់ប្រធានាធិបតីកូរ៉េខាងត្បូង Moon Jae-in បាននិយាយកាលពីជិត ១សប្តាហ៍មុនថា គីម ជុងអ៊ុន នៅមានជីវិត និងមានសុខភាពល្អធម្មតា។
ទីប្រឹក្សាឈ្មោះ Moon Chung-in បានថ្លែងប្រាប់ CNN ថា លោកគីម ជុងអ៊ុនបានស្នាក់នៅតំបន់ Wonsan ចាប់តាំងពីថ្ងៃទី ១៣មក។
លោកប្រធានាធិបតីដូណាល់ ត្រាំ ក៏បានបញ្ជាក់កាលពីដើមសប្តាហ៍ផងដែរថា លោក គីម ជុងអ៊ុននៅមានជីវិត៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
