ភ្នំពេញ៖ ដូចដែលប្រិយមិត្តបានដឹងហើយ ការរឹតបន្តឹងច្បាប់ចរាចរណ៍ផ្លូវគោក ដែលចាប់អនុវត្តចាប់ពីថ្ងៃទី១ ខែឧសភា ឆ្នាំ២០២០ គឺសមត្ថកិច្ចចាប់ផាកពិន័យគ្មានការយោគយល់ មិនថាអ្នកតូច ឬអ្នកធំឡើយ គឺចាប់ទាំងអស់ ឲ្យតែរកឃើញថាល្មើសនឹងច្បាប់ចរាចរណ៍ផ្លូវគោក។
ចំពោះការផាកពិន័យយ៉ាងចាស់ៗដៃនេះ ដោយក្នុងនោះគ្រាន់តែអត់ពាក់មួកសុវត្ថិភាព ត្រូវបង់ពិន័យអស់ ៦ ម៉ឺនរៀល គឺត្រូវបានធ្វើឡើងក្នុងគោលបំណងដើម្បីឲ្យប្រជាពលរដ្ឋម្នាក់ៗត្រូវចងចាំ ប្រុងប្រយ័ត្នជានិច្ចក្នុងការបើកបរ ដើម្បីជៀសផុតពីគ្រោះថ្នាក់ដែលបានកើតមានឡើងជារៀងរាល់ថ្ងៃនេះ។
ចំណាត់ការរបស់សមត្ថកិច្ចនៅពេលនេះ ឃើញថាមានការគាំទ្រយ៉ាងច្រើន បើទោះជាតម្លៃផាកពិន័យហាក់រាងចាស់ដៃក៏ដោយ។ ទោះយ៉ាងណា ប្រជាពលរដ្ឋក៏បានសំណូមពរឲ្យសមត្ថកិច្ចមានការយល់យោគខ្លះផង ចំពោះករណីមួយចំនួនតូចដែលម្ចាស់យានយន្ត មិនអាចធ្វើបាន ព្រោះតែបញ្ហាមួយចំនួន ។ ដែលក្នុងនោះ ដូចជាករណីដែលគួរលើកលែង ខណៈដែលម្ចាស់ម៉ូតូកំពុងជួបប្រទះក្នុងកាលៈទេសៈបង់រំលស់ មិនទាន់ដាច់គ្មានប័ណ្ណសម្គាល់ (ពាក់មី) ហើយមានតែកាតគ្រី Copy ជាដើម ។
ជាក់ស្តែង ដូចជាករណីបុរសម្នាក់ ដែលគណនីហ្វេសប៊ុកឈ្មោះ Alex Piano បានត្អូញត្អែរក្រោយសមត្ថកិច្ច ចាប់ម៉ូតូរបស់គាត់ កំពុងជាប់បង់រំលោះមិនទាន់ដាច់ ស្តាប់ហើយពិតជាគួរឲ្យអាណិតជាខ្លាំង ។ ក្នុងនោះគាត់បាននិយាយរៀបរាប់ ស្ទើរស្រក់ទឹកភ្នែកថា៖ «មួកមាន កញ្ចក់មាន ផ្លាកលេខមាន ម៉ាសក៏ពាក់ ហើយអត់មានជិះបញ្ច្រាសទេ ដល់ពេលសួរគាត់ បងប្អូនខុសអីបង គាត់ថាមកពីម៉ូតូអាអូនឯងបង់រំលោះមិនទាន់ដាច់ អេលោកហើយលោកមានចឹងទៀត ហើយភ្នែកគាត់មើលពីចម្ងាយដឹងទៀត ។ ខ្ញុំអាណិតម៉ូតូណាស់លោកអើយលោក មិនហ៊ានឲ្យត្រូវថ្ងៃត្រូវភ្លៀងផង ឥឡូវសុទ្ធតែលើកបោះៗចឹងម៉ង ។ គាត់សួររកកាត់គ្រីយើងតើមានមកពីណាបើបង់រំលោះម៉ូតូ មិនទាន់ដាច់ផងកាតគ្រីនៅធនាគារនឹង កាត់គ្រី Copy គាត់មិនយកទេ ហើយឥឡូវអត់ការងារ ២ខែហើយ ហើយនៅត្រូវបង់ធនាគារម៉ូតូនឹងរាល់ខែទៀត ហើយឥឡូវមានតែ20$ ដាច់ប៉ាត់ទៀត។ ចង់តវ៉ាអ្វីក៏គាត់រកមូលហេតុចាប់កំហុសយើងដែរ ពិបាកជាងគេនោះគឺយើងនិយាយមួយគាត់ពីរោះគោរពគាត់ តែគាត់ហៅយើងសុទ្ធតែហែងៗដាច់សាច់ម៉ង។ អ្នកណាក៏គេស្រឡាញ់ម៉ូតូគេដែរ ថ្មីក៏ដោយចាស់ក៏ដោយ ញើសឈាមគេ តែនេះសុទ្ធតែលើកបោះៗចឹងម៉ង អាណិតម៉ូតូណាស់បានត្រឹមតែឈរមើល។ ម៉ូតូ១នេះខ្ញុំប្រើ ១គ្រួសារ ជូនម៉ាក់ទៅផ្សារ ជូនប៉ាទៅធ្វើការ ជូនប្អូនទៅរៀនលូវចប់ តែយ៉ាងណាខ្ញុំមិនខឹងគាត់ទេ ខ្ញុំខុស កុំជឿខ្ញុំអី តែបើអ្នកទាំងអស់គ្នាជួបចាំជឿខ្ញុំចុះ សំខាន់ឥឡូវឲ្យតែបានម៉ូតូមកវិញ ហើយម៉ូតូក៏បានមកវិញហើយដែរ នៅសល់តែអារម្មណ៍បាត់បង់ការជឿជាក់តែប៉ុណ្ណោះ» ៕ ដោយ៖ លឹម ហុង
