បរទេស៖ ខណៈពេលដែលមនុស្សមួយចំនួននៅតែអាចមានអ្វីៗគ្រប់គ្រាន់ ក្នុងការស្តុកទុកមានដូចជាអាហារបម្រុងផ្សេងៗ នៅក្នុងផ្ទះ ក្នុងអំឡុងនៃការហាមឃាត់ដើរហើរ ដើម្បីទប់ស្កាត់ការរីករាលដាលនៃវីរុសកូរ៉ូណា ឬ Covid-19 នោះមិនមានគ្រប់គ្នាដទៃទៀត អាចមានលទ្ធភាពធ្វើបានដូចគ្នានេះបានទេ ។
ថ្មីៗនេះ អ្នកប្រើប្រាស់បណ្តាញសង្គមម្នាក់ដែលមានឈ្មោះថា YB Kasthuri Patto បានចែករំលែករូបភាពដ៏រំជួលចិត្តមួយ បង្ហាញឲ្យឃើញពលករបរទេសម្នាក់ ដើររើសគ្រាប់អង្ករដែលកំពប់រាយប៉ាយនៅលើដងផ្លូវ យកមកលាងសម្អាតដាំបាយហូប ដើម្បីបានរស់មួយពេល ដែលឃើញហើយពិតជាគួរឲ្យសង្វេកខ្លាំងណាស់។
ម្ចាស់គណនីខាងលើបានសរសេររៀបរាប់ថា៖ «ខ្ញុំពិតជារំជួលចិត្តខ្លាំងណាស់ នៅពេលដែលឃើញពលករបរទេសម្នាក់ ដែលបាត់បង់ប្រាក់ចំណូល បានដើររើសប្រមូលគ្រាប់អង្គរដែលកំពប់នៅលើដងផ្លូវបែបនេះ!» ។ នាងបានរៀបរាប់បន្តថា៖ «មិនថាពលករបរទេស ឬ ពលរដ្ឋ អ្នកក្រ ឬ អ្នកមានទេ សេចក្តីស្រេកឃ្លានបាននិងកំពុងវាយប្រហារយើងទាំងអស់គ្នា នៅក្នុងស្ថានភាពដូចគ្នានេះ» ។
ទន្ទឹមនេះផងដែរ អ្នកលេងអ៊ីនធឺណិតជាច្រើន បានបង្ហាញក្តីអាណិតអាសូរយ៉ាងខ្លាំង ចំពោះស្ថានភាពរបស់បុរសក្រីក្រនេះ ។ ក្នុងនោះ អ្នកលេងហ្វេសប៊ុកម្នាក់ថែមទាំងបានចង្អុលបង្ហាញថា តើប្រជាជនក្នុងតំបន់ប៉ុន្មាននាក់ទៀតទៅ ដែលក៏កំពុងរងគ្រោះពីភាពអត់ការងារធ្វើនេះ? ៕
ប្រែសម្រួល៖ លឹម ហុង (ប្រភព៖ worldofbuzz)