ខេត្តស្វាយរៀង៖ បុរសម្នាក់បានរងរបួសធ្ងន់ នៅក្នុងករណីគ្រោះថ្នាក់ចរាចរណ៍មួយ រវាងម៉ូតូនិងគោយន្តកន្ត្រៃ កាលពីវេលាម៉ោង១៨និង៣០នាទីព្រលប់ នៅថ្ងៃទី១ ខែឧសភា ឆ្នាំ២០២០ ក្នុងដំណើរស្របទិសគ្នា លើផ្លូវជាតិលេខ១៣ ក្រាលកៅស៊ូ ចន្លោះគីឡូម៉ែត្រលេខ54-55 ត្រង់ចំណុចភូមិត្រពាំងស្មាច់ ឃុំអណ្តូងត្របែក ស្រុករមាសហែក ខេត្តស្វាយរៀង។
សមត្ថកិច្ចបានឱ្យដឹងថា អ្នកបើកគោយន្តកន្ត្រៃ ឈ្មោះ សៅ សាភាន់ អាយុ៣៥ឆ្នាំមាន មុខរបរជាគ្រូបង្រៀន រស់នៅភូមិត្រពាំងស្មាច់ ឃុំអណ្តូងត្របែក ស្រុករមាសហែក ខេត្តស្វាយរៀង ជាអ្នកបើកបរគោយន្តកន្ត្រៃម៉ាកគូប៊ូតា ពណ៌ក្រហម បើកពីទិសខាងជើង មកត្បូង។ ចំណែកអ្នកបើកម៉ូតូឈ្មោះ គង់ ពុទ្ធា អាយុ២១ឆ្នាំ មុខរបរកសិករ រស់នៅភូមិពពេល ឃុំត្រស់ ស្រុករមាសហែក ខេត្តស្វាយរៀង ជាអ្នកបើកម៉ូតូម៉ាកYAMAHA អ៊ិចសិនធើរ C150 ពណ៌ខ្មៅ ពាក់ផ្លាកលេខភ្នំពេញ1AP.5826 បើកពីទិសខាងជើង មកត្បូង (ពាក់មួកសុវត្ថិភាព)។
ប្រភពដដែលបានបន្តថា ករណីនេះគ្រោះថ្នាក់មនុស្ស១នាក់ ប្រុស ធ្ងន់ គឺឈ្មោះ គង់ ពុទ្ធា ត្រូវបានបងប្អូនបញ្ជូនទៅ ព្យាបាលនៅមន្ទីរពេទ្យបង្អែកស្រុករមាសហែក ក្នុងនោះហេតុការណ៍នេះ បានបណ្តាលឱ្យខូចគោយន្តកន្ត្រៃ១គ្រឿង ស្រាល ម៉ូតូ១គ្រឿង ធ្ងន់។ បច្ចុប្បន្នវត្ថុតាងបានយករក្សាទុក នៅប៉ុស្តិ៍នគរបាលរដ្ឋបាលអណ្តូងត្របែក ហើយមូលហេតុ គឺបណ្តាលមកពីម៉ូតូប្រើប្រាស់ល្បឿនលឿន បុកគោយន្តកន្ត្រៃពីក្រោយ៕ដោយ៖ វ៉ៃកូ