ភ្នំពេញ៖នៅលើបណ្តាញសង្គមពេលនេះ គេសង្កេតឃើញថា មានការជជែកវែកដ៏ចម្រូងចម្រាស់ ជុំវិញការអនុវត្តរឹតបន្តឹងច្បាប់ចរារណ៍ផ្លូវគោករបស់សមត្ថកិច្ច ក្នុងរយៈពេល២ថ្ងៃជាប់ៗគ្នានេះ ។ ដោយក្នុងនោះ ក៏មានការរិះគន់ទៅលើតម្លៃផាកពិន័យ ដែលមើលទៅហាក់ដូចជាធ្ងន់ធ្ងរពេកហើយ ទៅលើករណីខ្លះដែលមិនស័ក្តិសមនឹងត្រូវផាកដល់ម្ល៉ឹងៗ។ ទោះជាយ៉ាងណា ការដាក់កម្រិតទម្ងន់ផាកពិន័យរបស់សមត្ថកិច្ចនៅពេលនេះ គឺដើម្បីឲ្យប្រជាពលរដ្ឋទាំងអស់ត្រូវតែចូលរួមគោរពច្បាប់ ដែលមិនអាចខ្វះបាន ខណៈពេលកំពុងបើកបរយានយន្តនៅលើដងផ្លូវ ដើម្បីកាត់បន្ថយគ្រោះថ្នាក់ចរាចណ៍ដែលកំពុងកើតមានជារៀងរាល់ថ្ងៃ។
ជាការពិតណាស់ ភាពខ្វះចន្លោះ ឬ ប្រការលើសលោះខុសទំនងរបស់សមត្ថកិច្ចមួយចំនួនតូច បានបង្កឲ្យមានការរិះគន់ជាខ្លាំងផងដែរ ។ តួយ៉ាងដូចជាករណីភាន់ច្រឡំប័ណ្ណបើកបរហ្ស៊ីន បែរជាខំប្រកែកថាជាប័ណ្ណ Copy ដោយគណនីមួយឈ្មោះមួយឈ្មោះ To Tal បានសម្តែងនូវការហួសចិត្តយ៉ាងដូច្នេះថា៖ ឱ! លោកប៉ូលិសអើយ ខំយកប័ណ្ណបើកបរច្បាប់ដើមបង្ហាញ បែរជាគាត់ចោទថាយកប័ណ្ណបើកបរថតចម្លងមកបង្ហាញគាត់ ហើយគាត់សួររកច្បាប់ដើម ខ្ញុំសួរគាត់វិញថា លោកប៉ូលិសមើលយ៉ាងម៉េចបានជាថាប័ណ្ណបើករបស់ខ្ញុំថតចម្លង គាត់ឆ្លើយថារូបថតមិនច្បាស់ មានត្រាពណ៌ខ្មៅ ពេលគាត់ឆ្លើយបែបនេះ ខ្ញុំគិតថាគាត់មិនដែលស្គាល់ប័ណ្ណបើកបរផង។វាជារឿងពិតរបស់ខ្ញុំជួបពេលថ្ងៃមិញនេះ»។
ភ្ជាប់នឹងរឿងរ៉ាវខាងលើនេះផងដែរ ក៏មានអ្នកលេងហ្វេសប៊ុកមួយចំនួន បានបង្ហាញប័ណ្ណបើកបរហ្ស៊ីន ដែលមានលក្ខណៈដូច Copy ដូចគ្នានេះដែរ ឲ្យគ្រប់គ្នាបានឃើញ ហើយក៏រិះគន់ប៉ូលិសថា «ប្រហែលជាគាត់មិនដែលមានរថយន្តបើកផងមិនដឹង បានជាមិនស្គាល់ប័ណ្ណពិតប្រាកដអ៊ីចឹង…»៕ ដោយ៖ លឹម ហុង