បន្ទាយមានជ័យ៖ នគរបាលការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តបន្ទាយមានជ័យ កាលពី ថ្ងៃទី១ ខែឧសភា ឆ្នាំ២០២០ បានបញ្ជូនជនសង្ស័យជួញដូរ និងប្រើប្រាស់គ្រឿងញៀនមួយសម្បុកស្មើនឹងចំនួន៦នាក់ ស្រី១នាក់ ដែលប្រព្រឹត្តសំំញ៉ែង ទៅសាលាដំបូងខេត្តបន្ទាយមានជ័យ ។
លោកវរសេនីយ៍ទោ ស្រី សារ៉ុម នាយការិយាល័យស្តីទី ប្រឆាំងការជួញដូរគ្រឿងញៀន បានឲ្យដឹងថា៖ នៅវេលាម៉ោង១០និង៣០នាទីព្រឹក ថ្ងៃទី២៩ ខែមេសា ឆ្នាំ២០២០ លោកបានដឹកនាំកម្លាំងចេញល្បាត ត្រួតពិនិត្យតាមបណ្តោយផ្លូវជាតិលេខ៦ ចំណុចមុខទីក្រុងកម្សាន្ត ហ៊ុយឡេងជោគជ័យ ស្ថិតក្នុងភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ បានប្រទះឃើញមុខសញ្ញាជួញ ដូរនិងប្រើប្រាស់គ្រឿងញៀន១នាក់ ឈ្មោះ ហ៊ុយ ឆៃយន់ហៅយន់ ភេទប្រុស អាយុ២៤ឆ្នាំ រស់នៅភូមិកំពង់ស្វាយ ។
សមត្ថកិច្ចបានចាប់ឃាត់ខ្លួន ឆែកឆេររកឃើញវត្ថុតាង ម្សៅក្រាមពណ៌សថ្លាចំនួន៥ថង់តូច ទម្ងន់២,៣៣ក្រាម (ថ្លឹងទាំងសម្បក) ទូរស័ព្ទដៃ១គ្រឿង។
ចម្លើយរបស់របស់ឈ្មោះហ៊ុយ ឆៃយន់ហៅយន់ នាំឲ្យកម្កាំងនគរបាលជំនាញ នៅថ្ងៃដដែល និងថ្ងៃទី១ឧសភា បានបន្តចាប់ឃាត់ខ្លួន ជនសង្ស័យប្រើប្រាស់គ្រឿងញៀន ចំនួន៥នាក់បន្ថែមទៀត ជាបន្តបន្ទាប់ នៅចំណុចបន្ទប់ជួលលេខ៣ មុខទីក្រុងកម្សាន្តហ៊ុយឡេង និងកន្លែងផ្សេងទៀត ក្នុងនៅក្នុងខេត្ត ដែលបានហៅទូរស័ព្ទមកកុម្ម៉ងទិញថ្នាំញៀន ។
អ្នក៥នាក់នោះ រួមមានឈ្មោះ១-ឃូ កយ ហៅ គ ភេទប្រុស អាយុ៣១ឆ្នាំ នៅភូមិគោកលុន ឃុំជប់វារី ស្រុកព្រះនេត្រព្រះ ខេត្តបន្ទាយមានជ័យ។ ២-ឆឺត ចេះ ភេទប្រុស អាយុ២៩ឆ្នាំ នៅភូមិខ្វាវ ឃុំបុស្បូវ ស្រុកព្រះនេត្រព្រះ មុខរបរសន្តិសុខ ។ ៣-គៀន វីរ៉ាហៅរ៉ា ភេទប្រុស អាយុ២៥ឆ្នាំ មុខរបរកម្មករ នៅភូមិនៅភូមិគោកលុន ឃុំជប់វារី ស្រុកព្រះនេត្រព្រះ។ ៤-អ៊ី ទុយហៅ ឌិត ភេទប្រុស៣៥ឆ្នាំ មុខរបរបមិនពិតប្រាកដ នៅភូមិបារាយណ៍ ឃុំតាផូ ស្រុកស្វាយចេក ខេត្តបន្ទាយមានជ័យ ។ ៥-ជួន ស្រីពៅ ហៅអាយ៉ា អានី ភេទស្រី អាយុ២៩ឆ្នាំមុខរបរគ្មាន ស្នាក់នៅបន្ទប់ជួលលេខ៣ នៅភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ ។
ក្នុងការចាប់ឃាត់ខ្លួន ជនសង្ស័យប្រើប្រាស់នូវសារធាតុញៀន ទាំង៥នាក់ ដកហូតបានវត្ថុតាងម៉ូតូ១គ្រឿង ទូរស័ព្ទដៃ៣គ្រឿង លុយខ្មែរចំនួន១២៥.០០០រៀល លុយថៃចំនួន៧៦០បាត ខ្សែដៃធ្វើពីលោហធាតុពណ៌លឿង១ខ្សែ ខ្សែក ធ្វើពីលោកហធាតុពណ៌លឿង១ខ្សែ(កាឡៃ) ក្រវិលធ្វើពីលោហធាតុ១គូ អត្តសញ្ញាប័ណ្ណសញ្ជាតិខ្មែរ១សន្លឹក ប័ណ្ណពលករកម្ពុជាទៅធ្វើការនៅប្រទេសថៃ១សន្លឹក ប័ណ្ណស៊ីជម្ពូថៃ១សន្លឹក កាតធនាគារ១សន្លឹក លិខិតធ្វើដំណើរពលករកម្ពុជាធ្វើការនៅបរទេស១ក្បាល សៀវភៅពានាថៃ១ក្បាល។
មន្ត្រីនគរបាលប្រឆាំងគ្រឿងញៀនខេត្ត បន្តថា ៖យោងបទបញ្ជារបស់លោកឧត្តមសេនីយ៍ទោអាត់ ខែម ស្នងការនគរបាលខេត្ត និងមានការសម្របសម្រួល ពីលោកព្រះរាជអាជ្ញាធរ នៃអយ្យការអមសាលាដំបូងខេត្ត បច្ចុប្បន្នជនសង្ស័យទាំង៦នាក់ និងវត្ថុតាងត្រូវបានបញ្ជូន ទៅសាលាដំបូងចាត់ការបន្តតាមនីតិវិធី៕ ដោយ ៖ បន្ទាយ
