ភ្នំពេញ៖ រដ្ឋបាលខេត្តបន្ទាយមានជ័យថា នៅដំបូងៗនេះ បាននិងកំពុងជំរុញបង្កើតសហគមន៍កសិកម្ម ទាក់ទាញកសិករឲ្យចូលរួម ពង្រីកពង្រឹងសមាជិក ការដាំដុះ ការចិញ្ចឹម ។ បន្ទាប់មកទើបខិតខំរកនិងធានាទីផ្សារគាំទ្រផលិតផលកសិកម្ម នៅគ្រប់ភូមិ ឃុំ សង្កាត់ ស្រុកក្រុងនៃទូទាំងខេត្តបន្ទាយមានជ័យ ក្នុងអំឡុងសម័យអន្តរកាលនៃការរីករាលដាលជំងឺកូវីដ១៩នេះ ។
សមាសភាពកសិករទាំងនោះ បើយោងមន្ត្រីបានថ្លែងថា រួមមាន ទី១ កសិករនៅតាមសហគមន៍ស្រាប ។ ទី២ ពលករខ្មែរដែលត្រឡប់មកពីប្រទេសថៃ និងប្រទេសផ្សេងទៀត។ ទី៣ កម្មករកម្មការិនី ពីបណ្តារោងចក្រក្នុងប្រទេស ដែលត្រូវព្យួរការងារ ត្រូវបាត់បង់ការងារពេលរោងចក្រត្រូវបិទ នាពេលខាងមុខ ។
លោកលី សារី អភិបាលរងខេត្តបន្ទាយមានជ័យ បានដឹកនាំកិច្ចប្រជុំលើខ្លឹមសារនោះ ហើយបានឲ្យដឹងកាលពីថ្ងទី២ ខែឧសភា ឆ្នាំ២០២០ ក្រោយបានចូលរួមជាមួយមន្ត្រី បានចុះពិនិត្យទីតាំង ដែលកសិករបាននិងកំពុង អនុវត្តការងារនេះ ហើយស្រេច និងទីតាំងថ្មីៗដែលគ្រោងបង្កើត ព្រមទាំងធាតុសម្រាប់ជួយដល់គម្រោងដូចជាប្រភពទឹក ពូជជី ទុន កម្ចី អ្នកសម្របសម្រួល ជាដើម ។
លោកប៊ុក ឡយជី ប្រធានមន្ទីរពាណិជ្ជកម្មខេត្តបន្ទាយមានជ័យ បាននិយាយថា៖ មន្ទីរនិងមន្ត្រីពាក់ព័ន្ធរបស់លោកកំពុងអនុវត្ត គម្រោងជំរុញទីផ្សារសម្រាប់កសិកម្មខ្នាតតូច ប្រកបដោយតម្លាភាព និងគណនេយ្យភាព ដើម្បីទាក់ទាញទំនុកចិត្តពីដៃគូអភិវឌ្ឍន៍ និងបង្កើនប្រាក់ចំណូល ជូនដល់ប្រជាកសិករក្រីក្រ នៅក្នុងខេត្ត។
ឯការបង្កើតសហគមន៍ដាំដុះបន្លែបង្ការ ចិញ្ចឹមសត្វ គឺនៅលើជំនាញកសិកម្មនិងអាជ្ញាធរ កសិករនិងផ្នែកពាក់ព័ន្ធផ្សេងទៀត ។
ពោលគឺគម្រោងជំនាញលោក បានផ្តោតសំខាន់លើការអភិវឌ្ឍ លើការវាយតម្លៃផលិតផល មានដូចជា ស្រូវ ដំឡូងមី មាន់ស្រែ បន្លែ ដោយតភ្ជាប់ជាមួយផលិតកម្ម ជាមួយទីផ្សារទាំងអស់ ។
លោកបានបន្តថា ៖ ការដាំដុះដំណាំ និងចិញ្ចឹមសត្វក្នុងស្រុកនោះ ដើម្បីផ្គត់ផ្គង់លើការហូបចុកប្រចាំថ្ងៃ របស់ប្រជាកសិករ ក្នុងកាលៈទេសៈធម្មតានិង នៅក្នុងសម័យអន្តរកាល នៃការរីករាលដាលនៃជំងឺកូវីដ១៩នេះ ព្រោះរាជរដ្ឋាភិបាលមានការណែនាំថា កម្ពុជាមិនត្រូវរំពឹង លើការនាំចូលពីក្រៅប្រទេសទៀតទេ ។
លោកលឿង សុភក្តិ អភិបាលស្រុកស្វាយចេក បាននិយាយថា៖ ចំពោះមុខ គឺត្រូវបង្កើតសហគមន៍កសិកម្មឲ្យបានសិន ។ បន្ទាប់មកត្រូវគៀរគរកសិករឲ្យចូលរួមអនុវត្ត ។ នោះបើតាមការចង់បានរបស់ថ្នាក់លើ ហើយសភាពការណ៍ បានចាប់បង្ខំឲ្យថ្នាក់ក្រោមត្រូវអនុវត្ត ។
លោកឈឿង ឈីវអៀន ប្រធានសាខាធនាគារABA ខេត្តបន្ទាយមានជ័យឲ្យដឹងថា ៖ធនាគារមួយនេះ មិនខ្វះទុនអីសម្រាប់កសិករនិងសហគ្រិនខ្ចីនោះទេ សំខានគឺត្រូវចេះលើកគម្រោង ការពារគម្រោង ហើយឲ្យត្រូវគោលការណ៍កម្ចី ។
សម្រាប់មូលនិធិដែលប្រែមកជាស្ថាប័នមីក្រូហិរញ្ញវត្ថុមួយ ឈ្មោះវ៉ាយអិលភី (YLP Microfinance ) របស់លោកឧបនាយករដ្ឋមន្ត្រីកែ គឹមយ៉ាន និងក្រុមគ្រួសារ លោកក៏កំពុងព្រាងបែបបទ គម្រោងសម្រាប់ដំណើរការ នៃស្ថាប័នគ្រឹះស្ថានមីក្រូហិរញ្ញវត្ថុថ្មីនេះ ព្រោះស្ថាប័ននេះថា នឹងឲ្យប្រាក់កម្ចីក្នុងអត្រាការប្រាក់ទាបជាង ធនាគារ និងស្ថាប័នមីក្រូហិរញ្ញវត្ថុដទៃទៀតផង ។
នេះសម្រាប់កសិករខ្ចីយកទៅបង្កើត និងពង្រីករបរដាំដុះនិងចិញ្ចឹម ។
ចំណែកមន្ត្រីមន្ទីរកសិកម្មខេត្តបន្ទាយមានជ័យ បានឲ្យដឹងថា ៖ ការពង្រីកពង្រឹងបន្ថែមលើគម្រោងដាំដុះដំណាំបន្លែបង្ការ ឈើហូបផ្លែ ស្រូវ ការចិញ្ចឹមសត្វជាការចាំបាច់ សម្រាប់ទ្រោលការទទួលខុសត្រូវឆ្លើយតប នឹងការរីករាលដាលនៃជំងឺកូវីដ១៩ នេះ ។
ប៉ុន្តែ ជាក់ស្តែងការអនុវត្តន៍នេះ កសិករនិងមន្ត្រីជំនាញបានធ្វើច្រើនហើយៗ ។ ហេតុនេះ គួរមន្ត្រីនិងអ្នកពាក់ព័ន្ធ ទទួលស្គាល់និងលើកទឹកចិត្ត ហើយដាក់ក្នុងរបាយការណ៍និងផែនការជាក់លាក់ ធ្វើជានិរន្តរ៍ មិនមែនតាមអារម្មណ៍ នឹកឃើញពេលមានសភាពការណ៍ជំរុញមកដូច្នេះទេ ។
ដោយមើលឃើញពីបញ្ហាប្រឈមនេះ មន្ទីរពាណិជ្ជកម្ម និងផ្នែកពាក់ព័ន្ធ មានគម្រោងជំរុញទីផ្សារសម្រាប់កសិកម្មខ្នាតតូច ឬហៅកាត់ថា(AIMS) ដូចជាបានអភិវឌ្ឍជាអាងស្តុកទឹកសម្រាប់ដោះស្រាយ បញ្ហាកង្វះទឹកស្រោចស្រពដល់ប្រជាកសិករ ។
មន្ត្រីបានបន្ត គម្រោងជំរុញទីផ្សារសម្រាប់កសិកម្មខ្នាតតូច ធ្វើអន្តរគមន៍លើខ្សែសង្វាក់តម្លៃស្រូវ ដោយផ្តួចផ្តើមឱ្យមានកិច្ចពិភាក្សា ពីបណ្តាភាគីពាក់ព័ន្ធនានា និងអាជ្ញាធរមូលដ្ឋាន រហូតសម្រេចបានការសហការ វិនិយោគ ពីក្រុមហ៊ុនវិនិយោគ។
លោកលី សារី អភិបាលរងខេត្តបន្ទាយមានជ័យ បាននិយាយថា៖ ការជំរុញបង្កើតសហគមន៍កសិកម្ម ការដាំដុះ ការចិញ្ចឹមនិងទីផ្សារគាំទ្រផលិតផល គឺក្នុងបំណងចង់ឲ្យប្រជាកសិករមានប្រាក់ចំណូល ក្នុងមុខរបរដាំដុះបន្លែ ចិញ្ចឹមសត្វ គឺពិនិត្យ គាំពារប្រជាកសិករលើដាំដុះ ចិញ្ចឹមសត្វ ការកំណត់នូវបញ្ហាប្រឈម ប្រតិបត្តិការបច្ចេកទេស និងហានិភ័យ៕ ដោយ ៖ បន្ទាយ
