ភ្នំពេញ៖ បញ្ហាប្រឈមចំពោះការប្រើប្រាស់ ប័ណ្ណសម្គាល់យានយន្ត ( កាតគ្រី ) ថតចម្លង គ្មានការបញ្ជាក់ពី អាជ្ញាធរ រងការផាកពិន័យនោះ ឯកឧត្ដមនាយឧត្ដមសេនីយ៍ ហ៊ឹម យ៉ាន បានណែនាំមិនឲ្យនគរបាលចរាចរណ៍ទូទាំងរាជធានី-ខេត្ត ធ្វើការផាកពិន័យចំពោះ ប្រជាពលរដ្ឋ ទេចំពោះករណីនេះ ។ នាយឧត្តមសេនីយ៍ ហ៊ឹម យ៉ាន បានបញ្ជាក់ថា ករណីយានយន្តទិញបង់រំលោះ អាចប្រើប្រាស់ប័ណ្ណសម្គាល់យានយន្តថតចម្លងបាន ដែលបញ្ជាក់ដោយក្រុមហ៊ុន។
ឯកឧត្តមខៀវ កាញារីទ្ធ រដ្ឋមន្ត្រី ក្រសួងព័ត៌មាន បានចេញផ្សាយព័ត៌មានថា សូមជម្រាបជូនបងប្អូនប្រជាពលរដ្ឋដែលទិញ រថយន្ត ម៉ូតូ និង ម៉ូតូកង់៣ ( PassApp ) បង់រំលស់ ។
ឯកឧត្តម បន្តថា ដើម្បីដោះស្រាយនូវបញ្ហាប្រឈមចំពោះការប្រើប្រាស់ ប័ណ្ណសម្គាល់យានយន្ត ( កាតគ្រី ) ថតចម្លង គ្មានការបញ្ជាក់ពី អាជ្ញាធរ រងការផាកពិន័យនោះ នៅព្រឹកថ្ងៃទី ២ ខែ ឧសភា ឆ្នាំ ២០២០ ឯកឧត្ដមនាយឧត្ដមសេនីយ៍ ហ៊ឹម យ៉ាន អគ្គស្នងការរងនគរបាលជាតិ បានណែនាំមិនឲ្យនគរបាលចរាចរណ៍ទូទាំងរាជធានី-ខេត្ត ធ្វើការផាកពិន័យចំពោះ ប្រជាពលរដ្ឋ ដែលប្រើប្រាស់ ប័ណ្ណសម្គាល់យានយន្ត ( កាតគ្រី ) ថតចម្លង ទេ ។ ប៉ុន្តែ បងប្អូនប្រជាពលរដ្ឋដែលទិញ រថយន្ត ម៉ូតូ និង ម៉ូតូកង់៣ បង់រំលស់ ត្រូវភ្ជាប់ កិច្ចសន្យាទិញលក់ ដាក់ជាប់មកជាមួយដើម្បីទុកបង្ហាញសមត្ថកិច្ចនៅពេលដែល សមត្ថកិច្ចត្រួតពិនិត្យ ។
ឯកឧត្តម នាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ បានឱ្យដឹងនៅព្រឹកថ្ងៃទី២ ខែឧសភា ឆ្នាំ២០២០នេះថា ចំពោះយានយន្តទិញបង់រំលោះក្នុង ជំហានដំបូងនេះស្នើអនុញ្ញាតឲ្យប្រើ ប្រាស់ប័ណ្ណសម្គាល់យានយន្តថត ចម្លងដែលបញ្ជាក់ដោយក្រុមហ៊ុន សិន។ នាពេលខាងមុខ នឹងតម្រូវឲ្យប្រើប្រាស់ប័ណ្ណសម្គាល់យានយន្តថតចម្លងដែលមានប្រថាប់ត្រាអាជ្ញាធរ មូលដ្ឋាន ។ ការអនុវត្តតាមការតម្រូវនេះ រង់ចាំការណែនាំជាថ្មី ។
ឯកឧត្តម នាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ បានជម្រាបជូនលោកស្នងការរង និងលោកនាយការិយាល័យ ទាំង២៥រាជធានី.ខេត្ត សូមអនុវត្តតាមការណែនាំដូចខាងក្រោម៖
១. ករណីយានយន្តមានបំពាក់ផ្លាកលេខ សូមកុំឃាត់ត្រួតពិនិត្យរកករណីល្មើសផ្សេងៗ ដោយអនុញ្ញាតឲ្យបន្តដំណើរជាធម្មតា ។
២. ករណីឆៀកផុតសុពលភាព សូមកុំឃាត់ពិន័យ ដោយអនុញ្ញាតឲ្យបន្តដំណើរជាធម្មតា ដើម្បីទុកពេលទៅធ្វើឆៀក ។
៣. ករណីមានប្រតិកម្មកើតនៅរាជធានី.ខេត្តណា សូមរាជធានី.ខេត្តនោះ ប្រតិកម្មឆ្លើយតបឲ្យបានទាន់ពេល ។
ដូច្នេះសូមបងប្អូនប្រជាពលរដ្ឋដែលទិញ រថយន្ត ម៉ូតូ និង ម៉ូតូកង់៣ បង់រំលស់ ត្រូវយក ឯកសារកិច្ចសន្យាទិញលក់ នៅកន្លែងបង់រំលស់ និង ប័ណ្ណសំគាល់យានយន្ត ( កាតគ្រី ) ថតចម្លង ដាក់ជាប់ខ្លួនផង ៕ ដោយ៖កូឡាប
