ភ្នំពេញ៖ ក្នុងរយៈពេលប៉ុន្មានថ្ងៃនៃការចាប់ផ្តើមអនុវត្តរឹតបន្តឹងច្បាប់ចរាចរណ៍ផ្លូវគោក មានគណនីហ្វេសប៊ុកមួយចំនួនតូច បានធ្វើការវាយប្រហារមកលើសមត្ថកិច្ចថាមិនបានធ្វើការផ្សព្វផ្សាយ ណែនាំអប់រំ ដល់ប្រជាពលរដ្ឋអំពីច្បាប់នេះ ជាពិសេសមានហ្វេសប៊ុកមួយបានចុះផ្សាយថា ស្រុកខ្មែរចាប់ពិន័យប្រជាពលរដ្ឋ ឯស្រុកថៃផ្តល់មួកដោយមិនធ្វើការពិន័យ។
ពាក់ព័ន្ធនឹងករណីខាងលើនេះ ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ នៅថ្ងៃទី៣ខែឧសភាឆ្នាំ២០២០ បានចេញសេចក្តីបកស្រាយបំភ្លឺថា ដោយក្នុងរយៈពេលប៉ុន្មានថ្ងៃនៃការចាប់ផ្តើមអនុវត្តរឹតបន្តឹងច្បាប់ចរាចរណ៍ផ្លូវគោក មានគណនីហ្វេសប៊ុកមួយចំនួនតូចបានធ្វើការវាយប្រហារមកលើសមត្ថកិច្ចថាមិនបានធ្វើការផ្សព្វផ្សាយ ណែនាំអប់រំ ដល់ប្រជាពលរដ្ឋអំពីច្បាប់នេះ ជាពិសេសមានហ្វេសប៊ុកមួយបានចុះផ្សាយថា ស្រុកខ្មែរចាប់ពិន័យប្រជាពលរដ្ឋ ឯស្រុកថៃផ្តល់មួកដោយមិនធ្វើការពិន័យ តាមពិតការណែនាំ អប់រំ ទាក់ទងករណីច្បាប់ចរាចរណ៍នេះត្រូវបានធ្វើឡើងជាយូរមកហើយ ។
ជាក់ស្តែងកិច្ចការទាំងអស់នេះត្រូវបានសមត្ថកិច្ចពាក់ព័ន្ធបានចុះធ្វើការអនុវត្តតាមគោលដៅ ធ្វើការណែនាំអប់រំ ដោយមិនមានការផាកពិន័យរយៈពេលមួយខែ តាំងពីកក្កដាឆ្នាំ២០១៩ មកម្ល៉េះ ជាមួយនោះដែរ ក្នុងឆ្នាំ២០១៩ នៃយុទ្ធនាការចុះណែនាំអប់រំប្រជាពលរដ្ឋឲ្យ ចូលរួមគោរពច្បាប់ចរាចរណ៍ផ្លូវគោក ឯកឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ ក៏បានចុះដោយផ្ទាល់ទាំងយប់ ទាំងថ្ងៃ ដើម្បីត្រួតពិនិត្យការងារនេះ ក្នុងឱកាសនោះដែរ ឯកឧត្តមស្នងការ ក៏ដូចជាក្រុមការងារ ក៏បានចែកជូនមួកសុវត្ថិភាពជាច្រើនដល់ប្រជាពលរដ្ឋដោយឥតគិតថ្លៃ ដែលបើកបរដោយមិនពាក់មួកសុវត្ថិភាព ។
ខាងក្រោមជារូបភាព និងសកម្មភាព របស់ឯកឧត្តមស្នងការ ចុះតាមគោលដៅ កាលពីខែកក្កដា ឆ្នាំ២០១៩ ដើម្បីធ្វើការណែនាំអប់រំ និងផ្តល់មួកដោយមិនថ្លៃជូនប្រជាពលរដ្ឋ ។
បញ្ជាក់បន្ថែមថា ក្នុងយុទ្ធនាការខែកក្កដា ឆ្នាំ២០១៩ មួកសុវត្ថិភាពជាច្រើនពាន់មួកត្រូវបានចែកដោយមិនថ្លៃ ៕ដោយ៖កូឡាប
