ភ្នំពេញ៖ កម្លាំងនគរបាលចរាចរណ៍ទទួលបទបញ្ជាឲ្យនៅភូមិសាស្ត្រស្រុកសន្ទុក ខេត្តកំពង់ធំ បានឃាត់រថយន្តមួយគ្រឿង ម៉ាក Prius ហើយផាកពិន័យចំនួនទឹកប្រាក់ ១៥០,០០០រៀល ចំពោះករណីល្មើស “បើកបរដោយមិនដំណើរការភ្លើងហ្វាកូត ឬភ្លើងសញ្ញានៃយានយន្ត”។ ពេលចាកចេញពីគោលដៅត្រួតពិនិត្យ មានស្ត្រីម្នាក់ទៀតជាអ្នករួមដំណើរជាមួយបានធ្វើការ Live តាម គណនីឈ្មោះ Ravy Khmer ដោយបានប្រើពាក្យសម្តីប្រមាថ និងសរសេរលើ Caption ថា “ចោរស្របច្បាប់ មិនបាច់និយាយក៏គេដឹង”។ នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ សូមឲ្យសាមីខ្លួនដែលបាន Live វីឌីអូខាងលើចូលខ្លួនមកដោះស្រាយជាមួយសមត្ថកិច្ចជាបន្ទាន់ មិនដូច្នេះទេ នាយកដ្ឋាន និងសមត្ថកិច្ចពាក់ព័ន្ធនឹងចាត់វិធានការតាមផ្លូវច្បាប់ជាធរមាន។
នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៅថ្ងៃទី៤ ខែឧសភា ឆ្នាំ២០២០ សូមជម្រាបជូនសារណជនជ្រាបថា ៖
កាលយប់ថ្ងៃទី០២ ខែឧសភា ឆ្នាំ២០២០ កម្លាំងនគរបាលចរាចរណ៍នៃនាយកដ្ឋាននគរបាលចរាចរណ៍និងសណ្តាប់ធ្នាប់សាធារណៈ ដែលទទួលបទបញ្ជាអោយប្រចាំការនៅភូមិសាស្ត្រស្រុកសន្ទុក ខេត្តកំពង់ធំ បានឃាត់រថយន្តមួយគ្រឿ ម៉ាក Prius ធ្វើការពិន័យតាមអនុក្រឹត្យលេខ៣៩ ស្តីពីការកែសម្រួលអនុក្រឹត្យលេខ៤៤ អនក្រ.បក ចុះថ្ងៃទី២១ ខែមីនា ឆ្នាំ២០១៧ សី្តពីការពិន័យអន្តរការណ៍ចំពោះអំពើល្មើសនឹងច្បាប់ស្តីពីចរាចរណ៍ផ្លូវគោក ចំនួនទឹកប្រាក់ ១៥០០០០រៀល ចំពោះករណីល្មើស “បើកបរដោយមិនដំណើរការភ្លើងហ្វាកូត ឬភ្លើងសញ្ញានៃយានយន្ត”។
ពេលឃាត់រថយន្ត សមត្ថកិច្ចបានណែនាំ និងប្រាប់អំពីកំហុសពាក់ព័ន្ធនឹងករណីមិនដំណើរការនៃភ្លើងរថយន្ត(ដាច់ភ្លើងបំភ្លឺខាងមុខ និងភ្លើងសញ្ញាខាងក្រោយ) ដែលអាចមានហានិភ័យគ្រោះថ្នាក់ចរាចរណ៍ដល់អ្នកបើកបរ និងអ្នករួមដំណើរ ព្រមទាំងបានស្នើឲ្យផ្អាកបើកបររថយន្តនេះបន្តដំណើរទៅមុខទៀត រងចាំព្រឹកស្អែកដើម្បីយកទៅជួសជុល។ ក្រោយស្តាប់ការណែនាំ អ្នកបើកបរព្រមទទួលស្គាល់កំហុស និងស្ម័គ្រចិត្តបង់ប្រាក់ពិន័យចំនួន ១៥០០០០រៀល។
ប៉ុន្តែ ដោយសារអ្នកបើកបរស្នើសុំដោយទទូចធ្វើដំណើរទាំងយប់ ទៅខេត្តសៀមរាប ព្រោះមានកិច្ចការបន្ទាន់ សមត្ថកិច្ចគ្រាន់តែពិន័យ និងបានអនុញ្ញាតអោយបើកបរបន្តដំណើរទៅមុខទៀតដោយប្រុងប្រយ័ត្នខ្ពស់ ។
ពេលចាកចេញពីគោលដៅត្រួតពិនិត្យ មានស្ត្រីម្នាក់ទៀតជាអ្នករួមដំណើរជាមួយបានធ្វើការ Live តាម គណនីឈ្មោះ Ravy Khmer ដោយបានប្រើពាក្យសម្តីប្រមាថ និងសរសេរលើ Caption ថា “ចោរស្របច្បាប់ មិនបាច់និយាយក៏គេដឹង” ដែលនេះជាការប្រព្រឹត្តិល្មើសនឹងមាត្រា៧៣ ការរំលោភលើរាងកាយ កិត្ដិយស សេចក្ដីថ្លៃថ្នូរ របស់មន្ត្រីអនុវត្តច្បាប់ចរាចរណ៍ផ្លូវគោកដែលកំពុងបំពេញភារកិច្ច ត្រូវផ្តន្ទាទោសតាមក្រមព្រហ្មទណ្ឌជាធរមាន(មាត្រា៥០២ បទប្រមាថ ត្រូវផ្ដន្ទាទោសដាក់ពន្ធនាគារពី ១ថ្ងៃ ទៅ ៦ថ្ងៃ )។
នៅពេលទៅដល់ចំណុចគោលត្រួតពិនិត្យមួយទៀត របស់សមត្ថកិច្ចខេត្តកំពង់ធំ អ្នកបើកបរមិនបានសហការជាមួយសមត្ថកិច្ចឡើយ ព្រមទាំងបើករថយន្តគេច ពីការត្រួតពិនិត្យរបស់សមត្ថកិច្ចទៀងផង ដែលនេះជាការប្រព្រឹត្តល្មើសនឹងមាត្រា៧៦ នៃច្បាប់ស្តីពីចរាចរណ៍ផ្លូវគោក “អ្នកបើកបរណាដែលមិនព្រមឲ្យធ្វើការត្រួតពិនិត្យផ្ទៀងផ្ទាត់យាន ត្រូវផ្ដន្ទាទោសដាក់ពន្ធនាគារពី ៦ ថ្ងៃ ទៅ ១ខែ និងពិន័យជាប្រាក់ពី១០០ ០០០រៀល ទៅ៨០០ ០០០រៀល”។
នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ សូមឲ្យសាមីខ្លួនដែលបាន Live វីឌីអូខាងលើចូលខ្លួន មកដោះស្រាយជាមួយសមត្ថកិច្ចជាបន្ទាន់ មិនដូច្នេះទេ នាយកដ្ឋាន និងសមត្ថកិច្ចពាក់ព័ន្ធនឹងចាត់វិធានការតាមផ្លូវច្បាប់ជាធរមាន។
ជាថ្មីម្តងទៀត នាយកដ្ឋាននគរបាលចរាចរណ៍និងសណ្តាប់ធ្នាប់សាធារណៈ សូមអំពាវនាវដល់អ្នកបើកបរគ្រប់រូប ត្រូវចូលរួមគោរពច្បាប់ទាំងអស់គ្នា និងត្រូវសហការជាមួយសមត្ថកិច្ចក្នុងត្រួតពិនិត្យផ្ទៀងផ្ទាត់យាន និងឯកសារពាក់ព័ន្ធ៕
ដោយ កូឡាប