ប្រធានាធិបតីអាមេរិច ដូណាល់ ត្រាំ កាលពីថ្ងៃអាទិត្យបាននិយាយថា អាមេរិចនឹងមានវ៉ាក់សាំង COVID-19 នៅចុងឆ្នាំនេះ។
លោកថ្លែងប្រាប់ Fox News ដូច្នេះថា “ពួកយើងមានទំនុកចិត្តថា ពួកយើងនឹងមានវ៉ាក់សាំងនៅចុងឆ្នាំនេះ។
លោកក៏បាននិយាយថា លោកនឹងជំរុញឲ្យមានការបើកសាលា និងសកលវិទ្យាល័យវិញនៅខែសីហាខាងមុខ ព្រោះលោកចង់ឲ្យសិស្សានុសិស្សត្រឡប់ទៅរៀនវិញ។
ការព្យាករណ៍ពីពេលវេលានៃការចេញវ៉ាក់សាំង ត្រូវបានគេកំពុងពិភាក្សា ខណៈដែលអាមេរិច និងប្រទេសផ្សេងៗទៀត កំពុងប្រណាំងប្រជែងធ្វើជាប្រទេសដំបូងគេដែលក្នុងការបង្កើតវ៉ាក់សាំងការពារវីរុស COVID-19។
លោកត្រាំ ថ្លែងថា គាត់នឹងសប្បាយចិត្តប្រសិនប្រទេសណាមួយអាចយកឈ្នះអ្នកស្រាវជ្រាវអាមេរិច ក្នុងការផលិតវ៉ាក់សាំងបានមុន។ “ប្រសិនបើប្រទេសផ្សេងផលិតបាន ខ្ញុំសូមកើតសរសើរ”។
លោកលើកឡើងថា “ខ្ញុំមិនខ្វល់ច្រើនទេ ខ្ញុំចង់បានវ៉ាក់សាំងដែលមានប្រសិទ្ធភាព”។
សូមបញ្ជាក់ថា វីរុសកូរ៉ូណា ត្រូវបានគេជឿជាក់ថា បានផ្ទុះចេញពីផ្សារសើមក្នុងទីក្រុងវូហាន ប្រទេសចិនកាលពីឆ្នាំមុន។ រហូតមកដល់ពេលនេះ វីរុសដ៏កាចសាហាវនេះ បានឆក់យកជីវិតមនុស្សច្រើនជាង ២៥០.០០០នាក់ និងឆ្លងទៅកាន់មនុស្សជាង ៣.៥០០.០០០នាក់ជុំវិញពិភពលោក។
បច្ចុប្បន្ន អាមេរិចគឺជាប្រទេសរងគ្រោះខ្លាំងជាងគេពីការផ្ទុះវីរុសនោះ ដោយមានអ្នកស្លាប់ជាង ៦៨.០០០នាក់ និងឆ្លងជិត ១.២០០.០០០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
