បរទេស៖ បងប្អូនប្រុសដ៏ចិត្តសប្បុរសធម៌២នាក់ ត្រូវបានគេរាយការណ៍ បានលះបង់ដ៏ធំធេង ដោយសុខចិត្តលក់ដីរបស់ពួកគាត់ ដើម្បីជួយដល់ប្រជាជនដែលកំពុងតស៊ូជួបការលំបាកយ៉ាងខ្លាំង សម្រាប់ជីវភាពប្រចាំថ្ងៃរបស់ពួកគេ ខណៈប្រទេសជាតិនៅតែកំពុងស្ថិតក្នុងស្ថានភាពជាប់គាំង ដោយសារតែជំងឺឆ្លងរាតត្បាតកូវីដ១៩។
យោងតាមប្រភពព័ត៌មានបានឲ្យដឹងថា Tajammul Pasha អាយុ ៤០ ឆ្នាំ និង Muzammil Pasha អាយុ ៣២ ឆ្នាំ បានសម្រេចដាក់លក់ដីរបស់ពួកគេក្នុងតម្លៃប្រមាណ ៣៣.០០០ ដុល្លារ ហើយបានប្រើប្រាស់លុយទាំងនេះ ដើម្បីទិញស្បៀងអាហារ និងរបស់ចាំបាច់ផ្សេងៗទៀត សម្រាប់សហគមន៍នៅ Kolar ដែលជាស្រុកមួយនៅរដ្ឋ Karnataka ភាគនិរតីនៃប្រទេសឥណ្ឌា។
បងប្អូនប្រុសទាំងពីរ បានទិញអង្ករ ម្សៅ ប្រេង ស្ករស និងរបស់ចាំបាច់សម្រាប់ការពារការឆ្លងដូចជា ម៉ាស និងរបស់អនាម័យ។ ពួកគេក៏បានរៀបចំតង់នៅក្បែរផ្ទះរបស់ពួកគេ ដើម្បីធ្វើជាផ្ទះបាយសហគមន៍ផងដែរ។
Tajammul បាននិយាយទាំងអារម្មណ៍រំជួលចិត្តថា៖ «ឪពុកម្តាយរបស់ពួកខ្ញុំ បានស្លាប់ ។ នៅពេលនោះ ពួកខ្ញុំត្រូវបានផ្លាស់ទៅកាន់កន្លែងជីដូនរបស់ម្តាយពួកខ្ញុំ នៅឯ Kolar ហើយមនុស្សមកពីសហគមន៍ហិណ្ឌូហិក ស៊ីក (Sikhs) និងមូស្លីម បានជួយពួកយើងឱ្យរស់រានដោយគ្មានភាពលំអៀងខាងសាសនាឡើយ”» ។
នេះបើយោងតាម NDTV បានឲ្យដឹងថា កាលពី Tajammul មានអាយុ ៥ ឆ្នាំ ហើយ Muzammil អាយុ ៣ ឆ្នាំ នៅពេលនោះដែលពួកគេបាត់បង់ឪពុកម្តាយ។ រឿងនេះបានបង្ខំឱ្យពួកគេផ្លាស់ពី Chickbalapor ទៅ Kolar ហើយរស់នៅជាមួយជីដូនរបស់ពួកគេ។
នៅពេលដែលពួកគេធំឡើងនៅក្នុងភាពក្រីក្រ បងប្អូនទាំងពីរបាននិយាយថា ពួកគេបានរស់រានមានជីវិតភាគច្រើនដោយសារជំនួយរបស់សហគមន៍។ ឥឡូវនេះពួកគេបើកការដាំដុះចេក និងអាជីវកម្មអចលនៈទ្រព្យ។
ហេតុនេះ ពួកគេត្រូវតែធ្វើអ្វី ដើម្បីជាការតបស្នងដល់សហគមន៍របស់ពួកគេវិញ ។ រហូតមកដល់ពេលនេះ អ្នកទាំងពីរបានជួយដល់គ្រួសារចំនួនជាង ៣.០០០ គ្រួសារ ហើយ ៕
ប្រែសម្រួល៖ លឹម ហុង (ប្រភព៖ nextshark)