បាត់ដំបង៖ ពុំសូវឃើញអ្នកល្មើសច្បាប់ច្រើនទេ ព្រោះពលរដ្ឋកាន់តែយល់ច្បាស់ ពីការគោរពច្បាប់ចរាចរណ៍ ក្រោយពីមានការរឹងបន្តឹងច្បាប់ចរាចរណ៍ផ្លូវគោក ចាប់ពីថ្ងៃទី១ ខែឧសភា ឆ្នាំ២០២០កន្លងមក។
លោក អ៊ឹម អង្សា នាយរងការិយាល័យចរាចរណ៍ផ្លូវគោកខេត្តបាត់ដំបង បានប្រាប់ឲ្យដឹងថា នៅមុនពេលការអនុវត្តច្បាប់ចរាចរណ៍ផ្លូវគោកថ្មី គឺមានរថយន្តល្មើសច្បាប់ជាច្រើន នៅគ្រប់គោលដៅដែលកម្លាំងសមត្ថកិច្ចចម្រុះចុះអនុវត្ត ហើយបានឃាត់រថយន្តបានជាច្រើនគ្រឿង និងផាកពិន័យផងដែរ។ ប៉ុន្តែគឺចាប់ពីការពង្រឹងច្បាប់ចរាចរណ៍ កាលពីដើមខែឧសភាមក គឺមានយានយន្តតិចតួចបំផុត ដែលល្មើសច្បាប់ ដោយអ្នកជិះម៉ូតូមានពាក់មួកសុវត្ថិភាព និងដាក់កញ្ចក់បានជាច្រើន ហើយអ្នកបើកបរថយន្តបានដាក់ខ្សែក្រវ៉ាត់សុវត្ថិភាព ត្រឹមត្រូវ និងចំណុចដែលនៅខ្វះខាត់ គឺការបើកបរខុសល្បឿង នៅមានតែមួយៗ។
គួរបញ្ជាក់ផងដែរថា នៅក្នុងខេត្តបាត់ដំបង ការរឹតបន្តឹងច្បាប់ចរាចរណ៍ផ្លូវគោកនេះ គឺមាននៅគ្រប់គោលដៅតាមបណ្ដាស្រុក សម្រាប់នៅក្នុងក្រុងបាត់ដំបងវិញ មានក្រុមសមត្ថកិច្ចចរាចរណ៍ចល័តចំនួន ៣ក្រុម និងមានក្រុមនៅចំណុចគោលដៅ ដើមទីផងដែរ និងមានមួយក្រុមទៀត ចុះអនុវត្តនៅលើផ្លូវជាតិ ដែលមានការចូលរួមពីនគរបាលចរាចរណ៍ កម្លាំងកងរាជអាវុធហត្ថ និងមន្ត្រីនៃមន្ទីរសាធារណការនិងដឹកជញ្ជូនខេត្តផងដែរ៕ ដោយ ៖ អ៊ុងសារុំ