ថៃ៖ នារីអាយុវ័យក្មេងម្នាក់ មិនដឹងជាបែកថ្នាំ ឬយ៉ាងណានោះទេ បានឡើងបានឡើងបង្គោលភ្លើងអគ្គិសនី បង្កឲ្យមានការភ្ញាក់ផ្អើលជាខ្លាំង កាលពីវេលាម៉ោង ៤ និង ៣០ នាទី ទៀបភ្លឺថ្ងៃទី០៣ ខែឧសភា ឆ្នាំ២០២០ ស្ថិតនៅក្នុងខេត្ត Udon Thani ។
អាជ្ញាធរមូលដ្ឋាន និងមន្ត្រីអគ្គិសនី នៅខេត្ត Udon Thani បានទទួលការជូនដំណឹងអំពីស្ត្រីម្នាក់នៅលើបង្គោលអគ្គិសនី ហើយពួកគេក៏បានធ្វើដំណើរទៅកាន់តំបន់នោះនៅមុខសាលា Tessaban នៅវេលាថ្ងៃកើតហេតុខាងលើ ។
នៅពេលមន្ត្រីទៅដល់ ពួកគេបានឃើញស្ត្រីវ័យក្មេងម្នាក់ស្លៀកពាក់ខ្មៅ កំពុងកាន់បង្គោលភ្លើង និងស្រែកឡើងថា “ខ្ញុំខ្លាច” ខណៈកំពុងត្រូវបានទ្រទម្ងន់របស់នាងដោយខ្សែភ្លើងស្អេកស្អះពីខាងក្រោម។ បុគ្គលិកអគ្គិសនីបានជួយបិទចរន្តអគ្គិសនីជាបណ្តោះអាសន្ន ដើម្បីជួយសង្គ្រោះនាង។
នៅពេលដែលសមាជិកក្រុមជួយសង្គ្រោះ រួមជាមួយមន្ត្រីប៉ូលិសម្នាក់បានឡើងទៅជួយលើកនាងចុះដី នាងនៅតែបន្តស្រែកដដែលៗថា “ខ្ញុំខ្លាច” ។ មិនថាពួកគេនិយាយអ្វីជាមួយនាងទេ គឺនាងនឹងមិនសុខចិត្តចុះមកដីនោះឡើយ ហើយបន្តដើរលើខ្សែភ្លើងគួររន្ធត់ជំនួសជាខ្លាំង។ ទោះយ៉ាងណា ក្រោយចំណាយពេលជាង ២ ម៉ោង ក្នុងការជួយសង្គ្រោះ នារីរូបនេះដែលហាក់ស្ថិតក្នុងស្ថានភាពស្រវឹង បាននាងយល់ព្រមចុះមកជាមួយប៉ូលិសដោយសុវត្ថិភាព។ នារីរូបនេះ បន្ទាប់មកក៏ត្រូវបានក្រុមជួយសង្គ្រោះ ដឹកយកទៅកាន់មន្ទីរពេទ្យភ្លាមៗផងដែរ។
នារីរូបនេះមានឈ្មោះថា ភី អាយុ ១៩ ឆ្នាំ មកពីភូមិប៉ាក់កូ ស្រុកគូប៉ាវប៉ា ខេត្តឧដុនថានី។
ជុំវិញករណីនេះ លោកវរសេនីយ៍ទោ Charoenchai Nikulkarn បានសួរនាំមិត្តភ័ក្តិរបស់ ភី ដែលបានបញ្ជាក់ថា ពួកគេកំពុងផឹកស៊ីនៅក្នុងផ្ទះមួយនៅលើផ្លូវប្រាចារកា។
បន្ទាប់មក នៅម៉ោង ៤ និង១០ ព្រឹក ភី បានរត់ចេញពីបន្ទប់របស់នាង ខណៈពេលដែលមិត្តភក្តិរបស់នាងដើរតាមស្វែងរក។ នៅពេលដែលមិត្តភក្តិបានមកដល់ ភី បានស្ថិតនៅលើបង្គោលអគ្គិសនីរួចទៅហើយ។ មិត្តភក្តិបានប្រាប់នាងឲ្យចុះមកដីវិញ ប៉ុន្តែ ភី មិនព្រមធ្វើតាមការស្នើសុំរបស់ពួកគេនោះទេ។ ដោយមិនដឹងថាត្រូវធ្វើអ្វីនោះ ដូច្នេះពួកគេបានជូនដំណឹងដល់មន្ត្រីតែម្តងទៅ ៕
ប្រែសម្រួល៖ លឹម ហុង (ប្រភព៖ Sanook)
