ភ្នំពេញ៖ សុវត្ថិភាពការងារ និងសុខភាពការងារ ដែលសំដៅលើកន្លែងធ្វើការរបស់កម្មករនិយោជិក ដូចជានៅតាមរោងចក្រ សហគ្រាស និងការដ្ឋានសំណង់នានា កន្លងមក គេសង្កេតឃើញ មានការយកចត្តិទុកដាក់ជាបន្តបន្ទាប់ពីរាជដ្ឋាភិបាលកម្ពុជា ជាពិសេសតាមរយៈក្រសួងការងារ។
ការរាតត្បាតនៃជំងឺឆ្លងកូវីដ ១៩ នៅឆ្នាំ២០២០នេះ ក៏ត្រូវបានភាគីពាក់ព័ន្ធយកចិត្តទុកដាក់ គិតគូរពីសុវត្ថិនៅកន្លែងធ្វើការរបស់និយោជិក។ តាមយៈប្រព័ន្ធអ៊ិនធើណេត វីដេអូ Conference នៅឆ្នាំនេះ គឺជាឆ្នាំទី៥ ដែលក្រសួងការងារ និងបណ្តុះបណ្តាលវិជ្ជាជីវៈ បានរៀបចំទិវាពិភពលោក ដើម្បីសុខភាព និងសុវត្ថិភាពការងារ ក្រោមកិច្ចសហការ ជាមួយអង្គការខាងការងារ (ILO) តាមរយ:គម្រោងរោងចក្រកាន់តែប្រសើរនៅកម្ពុជា (ILO-BFC) និងគម្រោងលើកកម្ពស់ស្តង់ដាសុខភាព និងសុវត្ថិភាពការងារក្នុងវិស័យសំណង់ (ILO-OSH) ក្នុងគោលបំណងជំរុញគ្រប់ភាគីពាក់ព័ន្ធ ដើម្បីរៀបចំផែនការឆ្លើយតប និងវិធានការណ៍ចាំបាច់នានាក្នុងការទប់ស្កាត់ការរីករាលដាលនៃជំងឺកូវីដ-១៩នៅកន្លែងធ្វើការ។
ផ្អែកតាមផែនការយុទ្ធសាស្ត្រអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈឆ្នាំ ២០១៩-២០២៣ ក្រសួងការងារនិងបណ្តុះបណ្តាលវិជ្ជាជីវៈ កំពុងបន្តជំរុញការផ្តោតការយកចិត្តទុកដាក់បន្តទៀត ទៅលើវិស័យសុវត្ថិភាពការងារ និងសុខភាពការងារ ដែលកន្លងមកនេះ ក្រសួងមួយនេះ សម្រេចលទ្ធផលសំខាន់ៗជាច្រើន ក្នុងនោះបានដាក់ឱ្យប្រើប្រាស់នូវផែនការមេលើកទី២ ស្តីពីសុវត្ថិភាព និងសុខភាពការងារឆ្នាំ២០១៨-២០២២ដែលជាផែនទីចង្អុលផ្លូវក្នុងអភិវឌ្ឍវិស័យសុវត្ថិភាព និងសុខភាពការងារនៅក្នុងប្រទេសកម្ពុជា គឺ កម្ពុជា បន្តកិច្ចសហការជាមួយគម្រោងលើកកម្ពស់ស្តង់ដា សុខភាព និងសុវត្ថិភាពការងារ នៃអង្គការអន្តរជាតិខាងការងារ (ILO/OSH Project) នូវផែនការសកម្មភាពដូចខាងក្រោម៖
-បន្តរៀបចំគោលនយោបាយជាតិស្តីពីសុខភាព និងសុវត្ថិភាពការងារ និង កម្រងព័ត៌មានជាតិស្តីពីសុខភាព និងសុវត្ថិភាពការងារ
-ពិនិត្យមើលនូវការវាយតម្លៃការអនុវត្ត ផែនការមេលើកទី២ ស្តីពីសុខភាព និងសុវត្ថិភាពការងារ (២០១៨ – ២០២២)
-បង្កើតនូវបញ្ជីផ្ទៀងផ្ទាត់ ស្តីពីការកែលម្អរបៀបធ្វើការ នៅក្នុងការដ្ឋានសំណង់ខា្នតធំ និងមធ្យម
-បន្ថែមវគ្គបណ្តុះបណ្តាលបំប៉នគ្រូបង្គោលស្តីពី WISCON។
ក្រៅពីនេះ ក្រសួងការងារ បានបន្តយន្តការនៃគណៈកម្មាធិការជាតិសុវត្ថិភាព និងសុខភាពការងារ ដើម្បីសម្របសម្រួល និងផ្តល់យោបល់ដើម្បីពង្រឹងប្រព័ន្ធគ្រប់គ្រងសុវត្ថិភាព និងសុខភាពការងារ ថ្នាក់ជាតិ និងសហគ្រាស គ្រឹះស្ថាន។
– បានកែលម្អប្រព័ន្ធអធិការកិច្ចការងារឱ្យកាន់តែមានប្រសិទ្ធភាព និងគុណភាព តាមរយៈការកែលម្អរបាយការណ៍អធិការកិច្ចការងារ ការពង្រឹងសមត្ថភាពមន្ត្រីទទួលបន្ទុកអធិការកិច្ចការងារ និងការបង្កើនការចុះអធិការកិច្ចការងារបន្ថែមទៀតទៅដល់វិស័យសំណង់ ឡឥដ្ឋ និងសេវាកម្សាន្ត
– បានដាក់ចេញនូវផែនយុទ្ធសាស្ត្រអភិវឌ្ឍន៍វិស័យការងារ និងបណ្តុះ បណ្តាលវិជ្ជាជីវៈឆ្នាំ២០១៩-២០២៣ ដែលសុវត្ថិភាព និងសុខភាពការងារស្ថិតនៅក្នុងកម្មវិធីទី១ “ការអភិវឌ្ឍលក្ខខណ្ឌការងារ និងសុខដុមនីយកម្មនៃទំនាក់ទំនងវិជ្ជាជីវៈ” ដែលផ្តល់នូវកាលានុវត្ត ជាយុទ្ធសាស្ត្រ ដើម្បីពង្រឹងលក្ខខណ្ឌសុវត្ថិភាព និងសុខភាពការងារ ជាពិសេសការរៀបចំច្បាប់ស្តីពីសុវត្ថិភាព និងសុខភាពការងារ ជំរុញ និងលើកទឹកចិត្តដល់សហគ្រាស គ្រឹះស្ថានដែលអនុវត្តតាមបទដ្ឋានការងារស្នូលសុវត្ថិភាព និងសុខភាពការងារ។
– សហការជាមួយទីភ្នាក់ងារជាតិសុខភាព និងសុវត្ថិភាពការងារកូរ៉េ ដើម្បីចាប់ផ្តើមសិក្សា និងរៀបចំ សេចក្តីព្រាងច្បាប់ស្តីពីសុខភាព និងសុវត្ថិភាពការងារ៕ដោយ៖សម្ផស្ស