ភ្នំពេញ៖ បន្ទាប់ពីបែកធ្លាយសារសំឡេង ឆាតឆ្លើយឆ្លងជាមួយស្ត្រីភេទ កាលពីពេលថ្មីៗនេះ នៅទីបំផុតព្រះតេជគុណ ឡុងចន្ថា គង់នៅវត្តភ្នំបូរី ឃុំព្រែកផ្ទោល ស្រុកអង្គរបូរី បានយល់ព្រមលាចាកសិក្ខាបទ នៅថ្ងៃទី១៤ ខែឧសភា ឆ្នាំ២០២០។
ភិក្ខុ ឡុង ចន្ថា បានចូលខ្លួនតាមការកោះនិមន្តរបស់មេគណខេត្តតាកែវ នៅថ្ងៃទី៤ខែឧសភាឆ្នាំ២០២០។ នៅក្នុងកិច្ចសន្យាដែលសរសេរដោយដៃ ភិក្ខុ ឡុង ចន្ថា មានសង្ឃដីកា ថាដោយពេលថ្មីៗនេះមានសំឡេងបែកធ្លាយតាមហ្វេសប៊ុកជាមួយនឹងស្ត្រីម្នាក់ ដែលនាំឲ្យប៉ះពាល់ដល់វិស័យព្រះពុទ្ធសាសនា និងសង្គមជាតិ។ បើគិតជាទោសក្នុងព្រះវិន័យមិនដល់ថ្នាក់សឹកទេ ប៉ុន្តែកុំឲ្យខូចតម្លៃព្រះពុទ្ធសាសនា ខ្ញុំ ( ឡុង ចន្ថា) ព្រះករុណាអាត្មាភាពសម្រេចលាចាកសិក្ខាបទដោយខ្លួនឯង នៅថ្ងៃទី១៤ ខែឧសភា ឆ្នាំ២០២០ ។
ព្រះតេជគុណបញ្ជាក់ថា ការលាចាកសិក្ខាបទនេះដោយស្ម័គ្រចិត្ត មិនបានបង្ខិតបង្ខំអ្វីទាំងអស់ ក្រែងពុំប្រាកដខ្ញុំព្រះករុណាសូមផ្តិតមេដៃជាសម្គាល់។
គណៈសង្ឃនាយក ព្រះមេគណខេត្តតាកែវ ដោយនិមន្តភិក្ខុ ឡុង ចន្ថា ចូលមកដោះស្រាយនៅសាលាគណខេត្តតាកែវ ដែលភិក្ខុរូបនេះ បានធ្វើទំនាក់ទំនងជាមួយស្ត្រីភេទ តាមប្រព័ន្ធបណ្តាញសង្គមដែលប្រាសចាកធម៌វិន័យរបស់ខ្លួន ធ្វើឲ្យធ្លាក់ចុះតម្លៃព្រះសង្ឃ ហើយក្នុងករណីភិក្ខុរូបនេះ មិនព្រមចូលមកក្នុងសង្ឃសវនាការសាលាគណខេត្ត ត្រូវសហការជាមួយអាជ្ញាធរដែលមានសមត្ថកិច្ច អនុវត្តវិធានការរដ្ឋបាល។
សម្តេចព្រះសង្ឃនាយក នន្ទ ង៉ែត នៅថ្ងៃទី៤ ខែឧសភា ឆ្នាំ២០២០ បានចេញលិខិតមួយច្បាប់ប្រគេនជូនព្រះវិន័យសំវរ កែវ សាវ៉ន ព្រះរាជាគណៈថ្នាក់ចត្វា ព្រះមង្គលទិព្វលោករង្សី ព្រះមេគណខេត្តតាកែវ ដោយនិមន្តភិក្ខុ ឡុង ចន្ថា គង់នៅវត្តភ្នំបូរី ឃុំព្រែកថ្កោល ស្រុកអង្គរបូរី ខេត្តតាកែវ ឲ្យចូលមកដោះស្រាយនៅសាលាគណខេត្តតាកែវ (វត្តតុំ ក្រុងដូនកែវ ខេត្តតាកែវ)។
បើតាមសម្តេចនន្ទ ង៉ែត មានសង្ឃដីកាថា ប៉ុន្មានថ្ងៃមកនេះ ព្រះពុទ្ធសាសនា ទទួលរងផលប៉ះពាល់យ៉ាងខ្លាំង ដោយភិក្ខុ ឡុង ចន្ថា បានធ្វើទំនាក់ទំនងជាមួយស្ត្រីភេទ តាមប្រព័ន្ធបណ្តាញសង្គមដែលប្រាសចាកធម៌វិន័យរបស់ខ្លួន ធ្វើឲ្យធ្លាក់ចុះតម្លៃព្រះសង្ឃ យ៉ាងធ្ងន់ធ្ងរ។
អាស្រ័យហេតុនេះ សូមព្រះមេគន កោះនិមន្ត ភិក្ខូរូបនេះ មកធ្វើការដោះស្រាយបញ្ហានេះ នៅសាលាគណខេត្តជាបន្ទាន់ ក្នុងករណីភិក្ខុរូបនេះ មិនព្រមចូលមកក្នុងសង្ឃសវនាការសាលាគណខេត្ត ត្រូវសហការជាមួយអាជ្ញាធរដែលមានសមត្ថកិច្ចអនុវត្តវិធានការរដ្ឋបាល បន្ទាប់មកធ្វើរបាយការណ៍មកគណៈសង្ឃនាយក។
សូមបញ្ជាក់ថា នាពេលថ្មីៗនេះភិក្ខុ ឡុង ចន្ថា តាមបណ្តាញសង្គមហ្វេសប៊ុកមានការបែកធ្លាយវីដេអូសំឡេងឆាត និងទូរស័ព្ទជាមួយនារីស្រស់ស្អាតម្នាក់ ។ វីដេអូមួយនោះ បានបង្ហាញពីសកម្មភាពភិក្ខុ ឡុង ចន្ថា បានតេទៅនារីម្នាក់ ដែលមានសង្សារហើយរួចទៅហើយ តាមតាមរយៈMessenger ដោយបានផ្លែផ្កាផ្តោះផ្តងពាក្យសម្តី និងបបួលណាត់ជួបនារីនោះនៅវត្តស្អាងភ្នំទៀតផង៕
ដោយ៖កូឡាប
