ព្រះសីហនុ៖ រដ្ឋបាលខេត្តព្រះសីហនុ នៅថ្ងៃទី៤ខែឧសភាឆ្នាំ២០២០ បានចេញលិខិតមួយច្បាប់ ឲ្យបងប្អូនរុះរើតូប ស្តង់ រោង ចេញពីលើដីចំណីឆ្នេរលំហែកាយ ដោយទុករយៈពេល១៥ថ្ងៃ ចាប់ពីថ្ងៃទី៥ដល់ថ្ងៃទី២០ខែឧសភាឆ្នាំ២០២០ ជាកំហិត។
ក្នុងលិខិតនោះ ឯកឧត្តមគួច ចំរើន អភិបាលខេត្ត បានបញ្ជាក់ថា ការដែលឲ្យបងប្អូនរុះរើតូប ស្តង់ រោង ចេញពីលើដីចំណីឆ្នេរលំហែកាយ គឺដើម្បីរៀបចំកែលម្អនិងអភិវឌ្ឍន៍តំបន់ឆ្នេរខ្សាច់កម្សាន្តក្នុងខេត្តព្រះសីហនុ ដើម្បីធានាបាននូវការគ្រប់គ្រងនិងរក្សាបរិស្ថានប្រកបដោយនិរន្តរភាព ស្របទៅតាមខ្លឹមសារនៃសារាចរណែនាំលេខ ០១ សរណន ចុះថ្ងៃទី៣ ខែកុម្ភៈ ឆ្នាំ២០១២ ស្តីពីការអភិវឌ្ឍតំបន់ឆ្នេរសមុទ្រនៃព្រះរាជាណាចក្រកកម្ពុជា។
រដ្ឋបាលខេត្តព្រះសីហនុ សូមជម្រាបជូនដំណឹងដល់បងប្អូនប្រជាពលរដ្ឋដែលកំពុងលក់ដូរ និងអាស្រ័យផលនៅ លើដីឆ្នេរលំហែកាយ ដែលមានទីតាំងស្ថិតនៅភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ ជ្រាបថា ក្នុងរយៈពេលកន្លងមកនេះ រដ្ឋបាលខេត្តសង្កេតឃើញថា មានបងប្អូនប្រជាពលរដ្ឋមួយចំនួន បានកំពុងលក់ដូរ និងអាស្រ័យផលនៅតាមឆ្នេរសមុទ្រ ដោយបានសង់តូប ស្តង់ រោង ធ្វើឲ្យបាត់ដបង់សណ្តាប់ធ្នាប់ របៀបរៀបរយ គ្មានសោភ័ណភាព និងប៉ះពាល់ដល់អនាម័យបរិស្ថាន នៅតំបន់ឆ្នេរសមុទ្រ ដែលជាកន្លែងលំហែកម្សាន្តសម្រាប់ភ្ញៀវទេសចរជាតិ និងអន្តរជាតិ។
ដូច្នេះដើម្បីរៀបចំកែលម្អនិងអភិវឌ្ឍន៍តំបន់ឆ្នេរខ្សាច់កម្សាន្តក្នុងខេត្តព្រះសីហនុ ដើម្បីធានាបាននូវការគ្រប់គ្រងនិងរក្សាបរិស្ថានប្រកបដោយនិរន្តរភាព ស្របទៅតាមខ្លឹមសារនៃសារាចរណែនាំលេខ ០១ សរណន ចុះថ្ងៃទី៣ ខែកុម្ភៈ ឆ្នាំ២០១២ ស្តីពីការអភិវឌ្ឍតំបន់ឆ្នេរសមុទ្រនៃព្រះរាជាណាចក្រកម្ពុជា រដ្ឋបាលខេត្តសូមឲ្យបងប្អូនរុះរើតូប ស្តង់ រោង ចេញពីលើដីចំណីឆ្នេរលំហែកាយ ដោយទុករយៈពេល១៥ថ្ងៃ ចាប់ពីថ្ងៃទី៥ដល់ថ្ងៃទី២០ខែឧសភាឆ្នាំ២០២០ ជាកំហិត។
ក្នុងករណីបងប្អូនមិនរុះរើតាមសេចក្តីជូនដំណឹងនេះ រដ្ឋបាលខេត្តនឹងអនុវត្តវិធានការរដ្ឋបាលដោយមិនទទួលខុសត្រូវចំពោះការខូចខាតសម្ភារ ឬបាត់បង់ទ្រព្យសម្បត្តិរបស់បងប្អូនឡើយ ហើយសង្ឃឹមថាបងប្អូនប្រជាពលរដ្ឋទាំងអស់ នឹងចូលរួមសហការអនុវត្តឲ្យមានប្រសិទ្ធភាព ៕
ដោយ៖កូឡាប
