ភ្នំពេញ៖ឧត្តមសេនីយ៍ ទី ចំរើនកុសល បានអះអាងថា ករណីយោធាសក្តិ៥ ឈ្មោះ ឈុន សារ៉េត ជិះរថយន្តផ្លាកលេខ ខ.ម បុកបុរសម្នាក់ស្លាប់ក្រោមតំណក់ទឹកភ្លៀង បានលេចឮដល់ នាយឧត្តមសេនីយ៍ ឥត សារ៉ាត់ ហើយនាយឧត្តមសេនីយ៍ បានដាក់បទបញ្ជាយ៉ាងដាច់ណាត់ តាមចាប់បុគ្គលនេះឲ្យខាងតែបាន។
លោកឧត្តមសេនីយ៍ ទី ចំរើនកុសល នៅថ្ងៃទី៤ខែឧសភាឆ្នាំ២០២០ បានសរសេរព័ត៌មានហើយបង្ហោះបណ្តាញសង្គមថា “ដំណឹងបន្ទាន់ !!! មុននេះបន្តិចឯកឧត្តម នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះ នៃកងយោធពលខេមរភូមិន្ទ បានយកចិត្តទុកដាក់សួរនាំរឿងយោធាសក្តិ៥ ឈ្មោះ ឈុន សារ៉េត ជិះរថយន្តផ្លាកលេខ ខ.ម បុកបុរសម្នាក់ស្លាប់ក្រោមតំណក់ទឹកភ្លៀងកាលពីយប់ថ្ងៃទី២៥ ខែមេសា ឆ្នាំ២០២០ និងបានបញ្ជាដាច់ណាត់ តាមចាប់បុគ្គលនេះឲ្យខាងតែបាន ដើម្បីយកមកអនុវត្តន៍ទោសតាមច្បាប់ “។
បើតាមឆាត របស់នាយឧត្តមសេនីយ៍ ឥត សារ៉ាត់ ដែលបង្ហោះដោយឧត្តមសេនីយ៍ទី ចំរើនកុសល មានខ្លឹមសារ ” បាទ មិនអីទេ គេមិនអាចរត់គេចខ្លួន រហូតបាននោះទេ តែធ្វើយ៉ាងណា ត្រូវតែចាប់បុគ្គលម្នាក់ហ្នឹងឲ្យទាល់តែបានណា ប្អូន ឧ.ទី ចំរើនកុសល “។
លោកឧត្តមសេនីយ៍ ទី ចំរើនកុសល បានលើកឡើងថា តើលោកនៅបន្តពួនលាក់ខ្លួនដល់ណាទៀត? ឬមួយរងចាំដល់សមត្ថកិច្ចកាន់ដីកាបង្គាប់ឲ្យចាប់ខ្លួន ទើបបានព្រមចេញ? ខ្ញុំដឹងថាលោកកំពុងឲ្យមេធាវីរបស់លោក ធ្វើកិច្ចការនេះជាមួយភរិយាជនរងគ្រោះជំនួសលោក។ ប៉ុន្តែខ្ញុំចង់ប្រាប់លោកវិញថា ទោះបីមេធាវីទេវតា ក៏ជួយលោកអត់បានដែរ ដ៏រាបណាលោកមិនប្រគល់ខ្លួនដល់សមត្ថកិច្ច។
លោកបានបន្តថា ជុំវិញករណីរថយន្តលេខ ខ.ម បុកមនុស្សស្លាប់កាលពីយប់ថ្ងៃសៅរ៍ ទី២៥ ខែមេសា ឆ្នាំ២០២០ !! !
មកដល់ពេលនេះម៉ោង១៦និង០០នាទី ថ្ងៃទី៣០ ខែមេសា ឆ្នាំ២០២០ ជនបង្កមិនទាន់បង្ហាញខ្លួនទៅសមត្ថកិច្ចនៅឡើយ។ ចំណែកសំណងវិញជនបង្កសុំសងបីពាន់ដុល្លារ សម្រាប់ជីវិតមនុស្សស្លូតត្រង់ម្នាក់ ដែលបានស្លាប់ដោយទង្វើធ្វេសប្រហែសរបស់ខ្លួន។ ចំណែកសមត្ថកិច្ច កំពុងដុតដៃដុតជើង ស្វែងរកជននេះឲ្យខាងតែឃើញដើម្បីយកមកអនុវត្តទោស !
ជីវិតមនុស្សថ្លៃស្មើលុយបីពាន់ដុល្លារ លោកឯងសាហាវណាស់ លោកឯងមិនមែនជាមនុស្សជាតិទេ !! !!៕
ដោយ៖កូឡាប
