កំពង់ធំ៖ មន្ទីរបរិស្ថានខេត្តកំពង់ធំ បានឲ្យដឹងថា នៅថ្ងៃទី៤ ខែឧសភា ឆ្នាំ២០២០ មន្ត្រីឧទ្យានុរក្សស្នាក់ការច្រកតោល ស្នាក់ការអូរងាវ និងស្នាក់ការព្រះអាទិត្យ នៃដែនជម្រកសត្វព្រៃ «ព្រៃឡង់» បានសហការចុះល្បាតដល់តំបន់អូរទឹកថ្លា ឃាត់គោយន្តកន្ត្រៃ ២គ្រឿង មានដឹកក្ដារផ្ដៀកសរុបចំនួន ១,១០០ម៉ែត្រគូប វត្ថុតាងត្រូវបានយកមករក្សាទុកនៅស្នាក់ការព្រះអាទិត្យ ។
មន្ទីរបរិស្ថានខេត្តកំពង់ធំបានបន្តថា ដោយឡែកមន្ត្រីឧទ្យានុរក្សស្នាក់ការអូរផ្អាវ បានចុះល្បាតពេលយប់ ដល់តំបន់ទួលភូមិក្រាំង ឃាត់គោយន្តកន្ត្រៃ ៣គ្រឿង ដឹកជំនៀឈើប្រភេទឈើទាលបង្កប់សសរពីក្រោម សរុបចំនួន ២,១៦០០ម៉ែត្រគូប ដោយវត្ថុតាងត្រូវបានយមករក្សាទុកនៅស្នាក់ការអូរផ្អាវ។
ចំណែកឯនៅរបៀងអភិរក្សជីវចម្រុះឧត្ត មន្ត្រីឧទ្យានុរក្សស្នាក់ការអូរដៃជ្រៃ បានចុះល្បាតដល់តំបន់អូរត្នោត និងតំបន់អូរអាចម៍ជ្រូកឃាត់គោយន្តកន្ត្រៃ១គ្រឿង បម្រុងដឹកឈើមូលបង្កប់កូនឈើជន្ទល់ ដោយវត្ថុតាងត្រូវបានយកមករក្សាទុកនៅស្នាក់ការអូរដៃជ្រៃ៕
ដោយ៖កូឡាប