ភ្នំពេញ៖ នារសៀលថ្ងៃទី៤ ខែឧសភា ឆ្នាំ២០២០ ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយក នៃអគ្គនាយកដ្ឋានអន្តោប្រវេសន៍ បានអញ្ជើញចូលរួមកិច្ចប្រជុំ ស្តាប់របាយការណ៍ ស្តីពីប្រព័ន្ធគ្រប់គ្រងជនបរទេសស្នាក់នៅ ក្នុងព្រះរាជាណាចក្រកម្ពុជា (FPCS) នៅអគ្គនាយកដ្ឋានអន្តោប្រវេសន៍។
កិច្ចប្រជុំនាពេលនេះ ក៏មានការអញ្ជើញចូលរួមពីសំណាក់ ឯកឧត្តម ឧត្តមសេនីយ៍ឯក អគ្គនាយករងអន្តោប្រវេសន៍, ប្រធាន-អនុប្រធាននាយកដ្ឋាន, នាយ-នាយរងការិយាល័យ និងមន្ត្រីពាក់ព័ន្ធមួយចំនួនទៀត។
ឯកឧត្តម ឧត្តមសេនីយ៍ឯក សុខ វាសនា អគ្គនាយករងអន្តោប្រវេសន៍ និងជានាយកដ្ឋានជនបរទេស មិនមែនអន្តោប្រវេសន្ត និងបច្ចេកវិទ្យា បានអានរបាយការណ៍ ដែលបានធ្វើកន្លងមក និងធ្វើការកែសម្រួល ឲ្យមានលក្ខណៈល្អប្រសើរឡើងថែមទៀត។
ក្រោយពីបានស្តាប់របាយការណ៍រួចមក ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ បានកោតសសើរ ដល់ក្រុមការងារ ដែលបានខិតខំប្រឹងប្រែងកន្លងមក ក្នុងការបង្កើតប្រព័ន្ធគ្រប់គ្រងជនបរទេស ស្នាក់នៅក្នុងព្រះរាជាណាចក្រកម្ពុជា (FPCS) នេះឡើង។
ឯកឧត្តម នាយឧត្តមសេនីយ៍ គៀត ច័ន្ទថារិទ្ធ ក៏បានណែនាំឲ្យក្រុមការងារធ្វើការ រៀបចំក្រុមបច្ចេកទេស, ក្រុម Hot Line និងក្រុមស្រាវជ្រាវ ដើម្បីចងក្រង ដោះស្រាយបញ្ហាដែលនៅសេសសល់ និងធ្វើឲ្យមានលក្ខណៈឲ្យកាន់តែល្អប្រសើរឡើង៕
ដោយ៖កូឡាប
