ចំនួនអ្នកស្លាប់ដោយសារវីរុសកូរ៉ូណានៅក្នុងប្រទេសបារាំងបានកើនឡើងដល់ ២៥.២០១នាក់កាលពីថ្ងៃចន្ទម្សិលមិញនេះ បន្ទាប់ពីមានអ្នកស្លាប់បន្ថែមចំនួន ៣០៦នាក់ ដែលវាគឺជាតួលេខស្លាប់កើនខ្ពស់បំផុត ក្នុងរយៈពេល ៤ថ្ងៃចុងក្រោយ។
កាលពីថ្ងៃអាទិត្យ មានមនុស្សត្រឹម ១៣៥នាក់ប៉ុណ្ណោះបានស្លាប់។
ក្រសួងសុខាភិបាលបារាំងបាននិយាយក្នុងសេចក្តីប្រកាសថា ចំនួនអ្នកជំងឺនៅក្នុងបន្ទប់សង្គ្រោះបន្ទាន់បានធ្លាក់ចុះពី ៣.៨១៩ មកត្រឹម ៣.៦៩៦នាក់នៅថ្ងៃអាទិត្យ។
ប្រទេសបារាំងមានអ្នកឆ្លងវីរុសកូរ៉ូណាសរុបទាំងអស់ចំនួនជាង ១៣២.០០០នាក់។ ក្នុងនោះ មានមនុស្ស ៥១.៣៧១នាក់បានជាសះស្បើយ។
វីរុសកូរ៉ូណា ឬ COVID-19 បានផ្ទុះចេញដំបូងពីទីក្រុងវូហាន ប្រទេសចិនកាលពីចុងឆ្នាំ ២០១៩។ រហូតមកដល់ពេលនេះ វាបានឆក់យកជីវិតមនុស្សជាង ២៥១.០០០នាក់ និងឆ្លងទៅកាន់មនុស្សជាង ៣,៥៨លាននាក់ទូទាំងពិភពលោក៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia