នៅលើលោកយើងនេះ ប្រភេទត្រីធំៗគឺមានច្រើនណាស់ ដែលយើងគ្រប់គ្នាពុំធ្លាប់បានដឹង ដោយគ្រាន់តែធ្លាប់បានឃើញតាមរយៈអ៊ីនធឺណិតភាគច្រើន តែចំពោះត្រីទឹកប្រៃដូចជា ឆ្លាម និងបាឡែន ជាដើម។ ប៉ុន្តែ ចំពោះត្រីទឹកសាបវិញ គឺកម្របានឃើញណាស់ ។
ដោយឡែក នៅក្នុងប្រទេសកម្ពុជាយើងវិញ ក៏មានពូជត្រីទឹកសាបប្រភេទធំផងដែរ ដែលត្រូវបានឲ្យឈ្មោះថា «ត្រីរាជ» ។ ប្រភេទត្រីដ៏កម្រនេះ គឺត្រូវបានប៉ាន់ស្មានមានទម្ងន់ចន្លោះពី ៧៥ គីឡូ ទៅ ១៥០ គីឡូ និងអាចមានអាយុកាលប្រហែល ៥០ ឆ្នាំ ជាងផងដែរ។
ជាក់ស្តែង វីដេអូមួយដែលត្រូវបានគេផុសនៅលើបណ្តាញសង្គមហ្វេសប៊ុក និងចែករំលែកបន្តទៅកាន់យូធូប បានបង្កឲ្យមានការភ្ញាក់ផ្អើលជាខ្លាំង ដោយបានបង្ហាញពីសកម្មភាពប្រជាពលរដ្ឋ អូសអួនក្នុងស្រះដ៏ធំមួយកន្លែង តែមិនដឹងថានៅក្នុងស្រុកណា និងបានអូសជាប់ពពួកត្រីរាជដ៏ធំៗ ដែលមានទំហំសឹងធំជាងខ្លួនមនុស្សទៅទៀតប្រមាណ ៥ ទៅ ៦ ក្បាល។ ហេតុការណ៍បង្កឲ្យមានការភ្ញាក់ផ្អើលនេះ ឃើញថាមានបងប្អូនប្រជាពលរដ្ឋមកចោមរោមមើលយ៉ាងច្រើនកុះករតែម្តង ព្រោះតែពួកគាត់ចង់ឃើញថាតើត្រីរាជដ៏កម្រនេះមានទំហំធំដូចដែលគេល្បីតៗគ្នាដែរឬទេ។
បើតាមចាស់ៗបានឲ្យដឹងថា ត្រីរាជដ៏កម្រនេះ បានឈានមានទម្ងន់រហូតដល់ជាង១០០ គីឡូក្រាម គឺមិនមែនលូតលាស់ធំក្នុងរយៈពេលខ្លីនោះទេ គឺពួកវាត្រូវការវេលារស់រានមានជីវិតក្នុងរយៈពេលយ៉ាងហោចណាស់ក៏ ២០ ទៅ ៣០ ឆ្នាំ ដែរ ។
យ៉ាងណាមិញ បើតាមការសង្កេតនៅក្នុងវីដេអូ គឺបានបង្ហាញឲ្យឃើញថា សកម្មភាពអូសត្រីនេះ គឺគ្រាន់តែធ្វើឡើងដើម្បីចង់មើលថាតើពួកវាមានទំហំប៉ុណ្ណា ដោយពុំមានចិត្តចង់ចាប់ពូជត្រីដ៏កម្រនេះ យកមកបរិភោគនោះឡើយ។
ហេតុដូច្នេះ យើងទាំងអស់គ្នាគួរតែត្រូវចូលរួមអភិរក្សសត្វដ៏កម្រៗ នៅក្នុងប្រទេសរបស់យើង មិនថាតែត្រីរាជនេះនោះទេ គឺគ្រប់សត្វកម្រដទៃទៀត ដើម្បីទុកឲ្យកូនខ្មែរជំនាន់ក្រោយបានស្គាល់ និងបានឃើញផងដែរ៕ ដោយ៖ លឹម ហុង