ប្រទេសចិនបានរកឃើញអ្នកផ្ទុកវីរុសកូរ៉ូណាថ្មីចំនួន ១នាក់ប៉ុណ្ណោះកាលពីថ្ងៃចន្ទ ដែលតួលេខនៃអ្នកឆ្លងថ្មីនេះធ្លាក់ចុះពី ៣ករណីកាលពីថ្ងៃអាទិត្យ។ នេះបើតាមទិន្នរបស់អាជ្ញាធរសុខាភិបាលជាតិចិននៅថ្ងៃអង្គារនេះ។
ករណីឆ្លងថ្មីនេះ ជាការឆ្លងនាំចូលមកពីក្រៅប្រទេស។
គណៈកម្មការសុខាភិបាលចិន ក៏បានប្រកាសថាមានមនុស្សចំនួន ១៥នាក់មានរោគសញ្ញា កាលពីថ្ងៃចន្ទ ដែលតួលេខនេះមានការកើនឡើង ២ករណី បើធៀបទៅនឹងថ្ងៃអាទិត្យ។
ចំនួនអ្នកឆ្លងវីរុសសរុបនៅចិនបានកើនឡើងដល់ ៨២.៨៨១ករណី ហើយមិនមានករណីស្លាប់ថ្មីនោះឡើយ។ ចំនួនអ្នកស្លាប់ដោយសារវីរុសនេះមានចំនួន ៤.៦៣៣នាក់ដដែល។
វីរុសកូរ៉ូណា ឬ COVID-19 បានផ្ទុះឡើងដំបូងចេញពីទីក្រុងវូហាន ប្រទេសចិនកាលពីចុងឆ្នាំ ២០១៩ ហើយរហូតមកដល់ពេលនេះ វាបានឆក់យកជីវិតមនុស្សច្រើនជាង ២៥០.០០០នាក់ និងឆ្លងទៅកាន់មនុស្សជាង ៣.៥០០.០០០នាក់ជុំវិញពិភពលោក។
បច្ចុប្បន្ន មិនទាន់មានថ្នាំព្យាបាល ឬវ៉ាក់សាំងនៅឡើយទេ។ ប្រទេសជាច្រើនកំពុងប្រកួតប្រជែងគ្នាបង្កើតវ៉ាក់សាំងដើម្បីលក់ឲ្យពិភពលោក។
អាមេរិចបានប្រកាសថាខ្លួនប្រហែលជានឹងមានវ៉ាក់សាំងនៅចុងឆ្នាំ ២០២០នេះ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia