ស្ទឹងត្រែង៖ ម៉ូតូមួយគ្រឿងជិះគ្នាបីនាក់ បានជួបឧបទ្ទវហេតុ បុកសត្វបីមួយក្បាលដើរឆ្លងថ្នល់ បណ្តាលឲ្យអ្នកបើកបរម្នាក់បាត់បង់ជីវិត នៅនឹងកន្លែងកើតហេតុ រីឯអ្នករួមដំណើរពីរនាក់ រងរបួសធ្ងន់ ត្រូវបានបញ្ជូនទៅសង្គ្រោះ នៅមន្ទីរពេទ្យទាំងយប់។
គ្រោះថ្នាក់ចរាចរណ៍ខាងលើនេះ បានកើតឡើងនៅលើកំណាត់ផ្លូវជាតិលេខ៩ ត្រង់ចំណុចអូរផ្អៀង ស្ថិតក្នុងភូមិត្រពាំងព្រៃ ឃុំស្រុកថាឡាបរិវ៉ាត់ ខេត្តស្ទឹងត្រែង វេលាម៉ោង១១និង៣៥នាទីយប់ ថ្ងៃទី៤ ខែឧសភា ឆ្នាំ២០២០។
របាយការណ៍សមត្ថភាពកិច្ច បានបញ្ជាក់ថា ជនរងគ្រោះអ្នកបើកបរម៉ូតូ ឈ្មោះធារ៉ា បានស្លាប់នៅកន្លែងកើតហេតុ។ សពត្រូវបានសាច់ញាតិ យកទៅធ្វើបុណ្យនៅភូមិចម្ការលើ ឃុំចម្ការលើ ស្រុកថាឡាបរិវ៉ាត់។ អ្នករួមដំណើរពីរនាក់ កំពុងសង្គ្រោះក្នុងមន្ទីរពេទ្យនៅឡើយ។
ប្រភពដដែលបានបន្តថា មុនពេលកើតហេតុ ម៉ូតូម៉ាកវ៉េវមួយគ្រឿង ជិះគ្នាបីនាក់ ក្នុងដំណើរទិសដៅពីលិចទៅកើត មានល្បឿនលឿន។ លុះមកដល់ចំណុចកើតហេតុ បុកសត្វក្របីមួយក្បាល ដើរឆ្លងកាត់ថ្នល់ បង្កឲមានគ្រោះថ្នាក់កើតឡើង។ ចំណែកសត្វក្របីនោះ បានរងរបួស នៅមិនទាន់ដឹងម្ចាស់នៅឡើយទេ៕ ដោយ ៖ សុខុម