អង្គការសុខភាពពិភពលោក (WHO) បាននិយាយកាលពីថ្ងៃចន្ទថា អាមេរិចមិនបានផ្តល់ភស្តុតាងឡើយ ដើម្បីគាំទ្រដល់ការអះអាងបែបស្មានរបស់ប្រធានាធិបតីដូណាល់ ត្រាំថា វីរុសកូរ៉ូណាមានប្រភពចេញពីមន្ទីរពិសោធន៍ចិន។
“យើងមិនបានទទួលទិន្នន័យ ឬភស្ថុតាងជាក់លាក់ណាមួយឡើយ ពីរដ្ឋាភិបាលអាមេរិច ទាក់ទងទៅនឹងការអះអាង ពីប្រភពរបស់វីរុសកូរ៉ូណា ដូច្នេះបើតាមទស្សនៈរបស់ពួកយើង វានៅតែជាការស្មានដដែល”។ នេះជាការបញ្ជាក់របស់លោក Michael Ryan ប្រធានផ្នែកគ្រោះអាសន្នរបស់អង្គការសុខភាពពិភពលោក។
អ្នកវិទ្យាសាស្ត្រជៅជាក់ថា វីរុសមរណៈនោះបានឆ្លងចេញពីសត្វមកកាន់មនុស្ស ដែលគេជឿជាក់ថាវាបានផ្ទុះចេញ ពីផ្សារលក់សត្វព្រៃមួយកន្លែង ក្នុងទីក្រុងវូហាន ប្រទេសចិន កាលពីចុងឆ្នាំមុន។
ប៉ុន្តែ ប្រធានាធិបតីអាមេរិច ដូណាល៉ ត្រាំ ដែលចាប់ផ្តើមធ្វើការរិះគន់ចិនកាន់តែខ្លាំងឡើងៗពីការផ្ទុះវីរុស បានអះអាងថា អាមេរិចមានភស្តុតាងថា វីរុសនោះមានប្រភពចេញ ពីមន្ទីរពិសោធន៍ទីក្រុងវូហាន។
កាលពីថ្ងៃអាទិត្យ រដ្ឋមន្ត្រីការបរទេសអាមេរិច លោក Mike Pompeo បាននិយាយថា “មានភស្តុតាងដ៏ធំ” ដែលគាំទ្រទៅនឹងការអះអាង របស់អាមេរិច។ ការអះអាងនោះ ត្រូវបានបដិសេធដោយចិន។
លោក Michael Ryan បាននិយាយថា “ពួកយើងមានឆន្ទៈក្នុងការទទួលយករាល់ពត៌មានបញ្ជាក់ពីប្រភពនៃវីរុស”។ លោកបញ្ជាក់ថា វាគឺជាព័ត៌មានសុខភាពសាធារណៈដ៏សំខាន់ សម្រាប់ធ្វើការគ្រប់គ្រងទៅថ្ងៃអនាគត។
“ប្រសិនជាទិន្នន័យ និងភស្តុតាងរកមានមែន វាជាពេលសម្រាប់អាមេរិចត្រូវសម្រេចចិត្តថាតើ និងពេលណាដែលខ្លួនអាចចែករំលែកភស្តុតាងនោះបាន ប៉ុន្តែវាពិតជាពិបាកខ្លាំងណាស់ សម្រាប់អង្គការសុខភាពិភពលោក ក្នុងការធ្វើកិច្ចការលើព័ត៌មានដែលខ្វះចន្លោះ”។
វីរុសកូរ៉ូណា ឬ COVID-19 បានផ្ទុះឡើងដំបូងចេញពីប្រទេសចិន កាលពីចុងឆ្នាំ ២០១៩ ហើយរហូតមកដល់ពេលនេះ វាបានឆក់យកជីវិតមនុស្សច្រើនជាង ២៥០.០០០នាក់ និងឆ្លងទៅកាន់មនុស្សជាង ៣.៥០០.០០០នាក់ជុំវិញពិភពលោក។
បច្ចុប្បន្ន មិនទាន់មានថ្នាំព្យាបាល ឬវ៉ាក់សាំងនៅឡើយទេ។ ប្រទេសជាច្រើនកំពុងប្រកួតប្រជែងគ្នា បង្កើតវ៉ាក់សាំងដើម្បីលក់ឲ្យពិភពលោក៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
