ភ្នំពេញ៖ រដ្ឋមន្ត្រីការងារកម្ពុជា ឯកឧត្តម អ៊ិត សំហេង បានស្នើឱ្យវិទ្យាស្ថាន CDRI បន្ថែមនូវការសិក្សាស្រាវជ្រាវ ពីតម្រូវការជំនាញដែលអាចឆ្លើយតបបាន ទៅនឹងការធ្វើពិពិធកម្មសេដ្ឋកិច្ច ដូចជាកសិ-ឧស្សាហកម្ម ការកែច្នៃផលិតផល និងឧស្សាហកម្មផ្សេងៗទៀត ដែលអាចស្រូបយកកម្លាំងពលកម្មមានជំនាញ ដើម្បីងាយស្រួលក្នុងការស្វែងរកឱកាសការងារ និងដើម្បីធានានិរន្តរភាព នៃការអប់រំបណ្តុះបណ្តាលបច្ចេកទេស និងវិជ្ជាជីវៈ សំដៅធានាបានថា «យុវជនម្នាក់មានជំនាញមួយយ៉ាងតិចប្រចាំជីវិត» និងលើកកម្ពស់ចំណេះដឹងជំនាញវិជ្ជាជីវៈ ជាពិសេសដើម្បីជំរុញការអភិវឌ្ឍសេដ្ឋកិច្ច សង្គមឱ្យឈានឡើងមួយកម្រិតទៀត។
ឯកឧត្តម អ៊ិត សំហេង បានបន្តទៀតថា បច្ចុប្បន្នទីផ្សារកម្ពុជា មានតម្រូវការកម្លាំងពលកម្មក្នុងវិស័យ TVET(បច្ចេកទេស និងវិជ្ជាជីវៈ) យ៉ាងច្រើន ប៉ុន្តែយុវជនបែរជាមិនសូវងាកមកសិក្សា ក្នុងវិស័យនេះទៅវិញ ដែលនេះក៏ជាការស្នើរបស់ឯកឧត្តម ទៅកាន់វិទ្យាស្ថាន CDRI ឱ្យធ្វើការសិក្សាស្រាវជ្រាវផងដែរ ដើម្បីជំរុញឱ្យយុវជន បែរមកស្វែងរកការសិក្សាក្នុងវិស័យ TVET នេះវិញ។
រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានស្នើដល់វិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា(CDRI) ជួយសិក្សាស្រាវជ្រាវរកឱ្យឃើញ នូវចំណុចខ្វះខាតក៏ដូចជា ការធ្វើយ៉ាងណាលើកទឹកចិត្តឲ្យវិស័យឯកជន បើកគ្រឹះស្ថានសិក្សាជំនាញបច្ចេកទេស និងវិជ្ជាជីវៈ TVET ឱ្យបានច្រើន ខណៈកម្ពុជាកំពុងត្រូវការកម្លាំងពលកម្ម ក្នុងវិស័យនេះយ៉ាងច្រើន។
គួរបញ្ជាក់ថា រដ្ឋមន្ត្រីក្រសួងការងារ បានគាំទ្រសកម្មភាពស្រាវជ្រាវរបស់វិទ្យាស្ថាន CDRI នាពេលកន្លងមក ដែលកំពុងបន្តការសិក្សា លើគម្រោងមួយចំនួន ពាក់ព័ន្ធការអប់រំ និងបណ្តុះបណ្តាល សម្រាប់២ឆ្នាំខាងមុខ មានដូចជាការលើកកម្ពស់នវានុវត្តន៍ នៃវិស័យអប់រំថ្នាក់ឧត្តមសិក្សានៅកម្ពុជា និងការស្រាវជ្រាវ កិច្ចសន្ទនាគោលនយោបាយ និងកម្មវិធីអភិវឌ្ឍសមត្ថភាព ក្នុងការអប់រំ និងបណ្តុះបណ្តាលបច្ចេកទេស និងវិជ្ជាជីវៈ ព្រមទាំងឲ្យការសិក្សាស្រាវជ្រាវនេះ ទទួលបានលទ្ធផលកាន់តែប្រសើរ និងមានភាពប្រទាក់ក្រឡា ជាមួយគោលនយោបាយអប់រំ របស់រាជរដ្ឋាភិបាល ក៏ដូចជាឯកសារយោងសម្រាប់អ្នកស្រាវជ្រាវ សាស្ត្រាចារ្យ និងនិស្សិត៕ដោយ៖សម្ផស្ស