បាត់ដំបង៖ មានករណីប្រជាពលរដ្ឋចំនួន០៤នាក់ បានដើររកផ្សិតប៉ក់នៅចំនុចអូរជ្រៅ ភូមិអូរក្រូច ឃុំតាតោក ស្រុកសំឡូត ខេត្តបាត់ដំបង ក៏បានប្រទះឃើញគ្រាប់បេចំនួន១គ្រាប់ រួចយកមកដំលើឈើបណ្តាលឲ្យផ្ទុះស្លាប់ម្នាក់ និងរបួសធ្ងន់ស្រាល៣នាក់ ។
អាជ្ញាធរមីនកម្ពុជា បានឲ្យដឹងថា នៅព្រឹកថ្ងៃទី៥ ខែឧសភា ឆ្នាំ២០២០ វេលាម៉ោង៩និង២០នាទីព្រឹក ប្រជាពលរដ្ឋចំនួន៤នាក់ រស់នៅភូមិកំពេង ឃុំព្រងិល ស្រុកភ្នំក្រវ៉ាញ ខេត្តពោធិ៍សាត់ បានដើររកផ្សិតប៉ក់ នៅចំនុចអូរជ្រៅ ភូមិអូរក្រូច ឃុំតាតោក ស្រុកសំឡូត ខេត្តបាត់ដំបង ក៏ប្រទះឃើញគ្រាប់បេចំនួន១គ្រាប់ រួចយកមកដំលើឈើ បណ្តាលឲ្យផ្ទុះ ស្លាប់ ១នាក់ របួសធ្ងន់០២នាក់ និង របួសស្រាល ០១នាក់ ជនរងគ្រោះមានឈ្មោះ៖ ១- លុច លីណេ ភេទ ប្រុស អាយុ ១៥ឆ្នាំ (ស្លាប់)។ ២- ស្រី ពេជ្រ ភេទស្រី អាយុ ១៦ឆ្នាំ(របួសធ្ងន់លើផ្ទៃមុខ)។ ៣- ពិន ដាវុធ ភេទប្រុស អាយុ ២៥ឆ្នាំ (របួសធ្ងន់ ដាច់ដៃស្តាំត្រឹមកែងដៃ)។ ៤- នី ប៊ុនណាត ភេទប្រុស អាយុ ១៤ឆ្នាំ (របួសស្រាល ដាច់ចុងច្រមុះបន្តិច)។
បច្ចុប្បន្នជនរងគ្រោះកំពុងសម្រាកព្យាបាល នៅមណ្ឌលសុខភាព ទីរួមស្រុកសំឡូត ខេត្តបាត់ដំបង។
អាជ្ញាធរមីន សូមអំពាវនាវដល់បងប្អូនប្រជាពលរដ្ឋទាំងអស់ នៅពេលឃើញគ្រាប់មិនទាន់ផ្ទុះ សូមកុំយកមក ដុំ គប់លេង ឬកែច្នៃផ្សេងៗ វាអាចបណ្តាលឲ្យផ្ទុះស្លាប់ របួស ពិការ គ្រប់ពេល និងសូមរាយការណ៍ទៅអាជ្ញាធរមូលដ្ឋាន និងប្រតិបត្តិករបោសសំអាតមីន ដែលនៅជិតទីនោះ ដើម្បីយកគ្រាប់ទាំងនោះទៅកម្ទេចចោល។
តាមរបាយការណ៍របស់លោកវរសេនីយ៍ឯក កោ ស៊ុនកាំង អធិការនគរបាលស្រុកសំឡូត បានឲ្យដឹងថា នៅព្រឹកកើតហេតុមានប្រជាពលរដ្ឋមួយក្រុម ដែលមានលំនៅដ្ឋានស្ថិតនៅស្រុកភ្នំក្រវាញ ខេត្តពោធិ៍សាត់ បានធ្វើដំណើរចូលក្នុងព្រៃ ចំណុចភូមិសាស្ត្រខាងលើ ដើម្បីរកដកផ្សិតប៉ក់ យកទៅលក់ចិញ្ចឹមជីវិត។ ក្នុងពេលវេលាដូចខាងលើ បុរសម្នាក់ឈ្មោះ លុច លីណេ អាយុ១៥ឆ្នាំ បានប្រទះឃើញគ្រាប់កាំភ្លើងប្រភេទB40មួយគ្រាប់ ដែលជាយុទ្ធភណ្ឌមិនទាន់ផ្ទុះ នៅសេសសល់ពីសម័យសង្គ្រាម។ គាត់បានយកគ្រាប់នេះ ទៅដំលែងនៅលើគល់ឈើនៅក្បែរនោះ។ ពេលកំពុងដំក៏បណ្តាលឲ្យគ្រាប់ផ្ទុះឡើងយ៉ាងកក្រើក បណ្តាលឲ្យស្លាប់បុរសអ្នកដំគ្រាប់នោះភ្លាមៗនៅកន្លែងកើតហេតុ។ ចំណែកអ្នកនៅក្បែរនោះ ចំនួន៣នាក់ផ្សេងទៀតរងរបួសក្នុងនោះមាន១-ឈ្មោះ ស្រីពេជ្រ ភេទ ស្រីអាយុ ១៦ឆ្នាំ(របួសធ្ងន់លើផ្ទៃមុខ)។២-ឈ្មោះ ពិន ដាវុធ ភេទប្រុសអាយុ ២៥ឆ្នាំ (របួសធ្ងន់ដាច់ដៃស្តាំត្រឹមកែងដៃ)។ ៣-ឈ្មោះ នី ប៊ុនណាត ភេទ ប្រុសអាយុ ១៤ឆ្នាំ (របួសស្រាល ដាច់ចុងច្រមុះបន្តិច)។ ជនរងគ្រោះ ត្រូវបាននាំយកទៅសង្គ្រោះបន្ទាន់នៅមន្ទីរពេទ្យភ្លាមៗ។
លោកវរសេនីយ៍ឯក អ៊ុក សារិន មេបញ្ជាការវរសេនាតូចនគរបាលការពារព្រំដែនគោកលេខ៣១០ បានឲ្យដឹងថា ទីកន្លែងដែលមានករណីផ្ទុះគ្រាប់ខាងលើនេះ ស្ថិតនៅចម្ងាយប្រមាណ ៨ គីឡូម៉ែត្រពីប៉ុស្តិ៍នគរបាលព្រំដែនពាមតា ចំណុះឲ្យវរសេនាតូចលេខ៣១០។ ជាទូទៅក្នុងភូមិសាស្ត្រនេះ មានប្រជាពលរដ្ឋលោកចេញ ចូល ប្រកបរបរចិញ្ចឹមជីវិត ដោយការបេះផ្លែឈើព្រៃ ឬដកផ្សិតជាដើម។ ដោយសារភូមិសាស្ត្រនេះ ជាអតីតជាសមរភូមិប្រយុទ្ធពីសម័យសង្គ្រាមសំណល់ជាយុទ្ធភណ្ឌមិនទាន់ផ្ទុះ មាននៅរាយប៉ាយច្រើន ទាំងនៅលើដីនិងបង្កប់ក្នុងជម្រៅដី ហើយយូរៗម្តងមានករណីគ្រោះថ្នាក់ ដោយយុទ្ធភណ្ឌនេះ ពិតជាបានកើតឡើង និងបង្កឲ្យមានមហន្តរាយដល់អាយុជីវិតមនុស្ស ឬពិការភាពផងដែរ៕ដោយ៖អ៊ុង សារុំ
