បាត់ដំបង៖មន្ត្រីក្រសួងសេដ្ឋកិច្ចនិងហិរញ្ញវត្ថុ បានជំរុញទៅអាជ្ញាធរមូលដ្ឋានទាំងអស់ ត្រូវចុះស្រង់ស្ថិតិកសិករដែលជាអ្នកដាំបន្លែឲ្យពិតប្រាកដច្បាស់លាស់ ដើម្បីរាជរដ្ឋាភិបាលចែកពូជបន្លែជូនដល់ពួកគាត់ឲ្យបានត្រឹមត្រូវ ហើយពួកគាត់អាចយកទៅដាំដុះបានផល សម្រាប់បរិភោគខ្លួនឯងផងនិងសម្រាប់ការផ្គត់ផ្គង់ក្នុងទីផ្សារផង ចៀសវាងផ្ដល់ដល់អ្នកមិនចូលចិត្តដាំបន្លែហើយយកពូជទៅទុកចោល។
ការលើកឡើងនេះ ក្នុងសិក្ខាសាលផ្សព្វផ្សាយការផ្គត់ផ្គង់គ្រាប់ពូជបន្លែនិងដំណាំរួមផ្សំ ដោយឥតគិតថ្លៃដល់កសិករកាលពីថ្ងៃទី០ឮ៥ខែឧសភាឆ្នាំ២០២០ ក្រោមអធិបតីភាពឯកឧត្តម វង់ សណ្ដាប់ អនុរដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ និងជាប្រធានលេខាធិការដ្ឋានគណៈកម្មាធិការគ្រប់គ្រងប្រព័ន្ធស្បៀងបម្រុងកម្ពុជា។
ឯកឧត្តម វង់ សណ្ដាប់ បានមានប្រសាសន៍ថា ដោយសារគ្រាប់ពូជបន្លែមានកំណត់ អាជ្ញាធរត្រូវផ្សព្វផ្សាយ ឲ្យបានទូលំទូលាយដល់កសិករ កម្មករឬពលរដ្ឋចង់ដាំបន្លែពិតប្រាកដ មកទទួលយកគ្រាប់ពូជតាមទីកន្លែង ឬពេលវេលាកំណត់ ដើម្បីចែកដល់ពួកគាត់ ព្រោះគោលដៅរបស់រាជរដ្ឋាភិបាល គឺចង់ឲ្យគ្រាប់ពូជទាំងអស់នោះ យកទៅដាំដុះបន្ត។ ការយកគ្រាប់ពូជបន្លែទៅដាំបានពិតប្រាកដ វាអាចឲ្យកម្ពុជាមានបន្លែសម្រាប់បរិភោគកាន់តែច្រើន ហើយអាចជួយកាត់បន្ថយនូវការនាំចូលពីក្រៅប្រទេស និងបើការដាំបន្លែមានសុវត្ថិភាពទៀតនោះ គឺអាចនាំចេញទៅទីផ្សារអន្តរជាតិបានផងដែរ។
លោក អ៊ុយ សុធាវី អភិបាលរងខេត្តបាត់ដំបង បានមានប្រសាសន៍លើកឡើងថា បច្ចុប្បន្នកសិករនៅក្នុងខត្តបាត់ដំបង បានបង្កើនការដាំបន្លែជាបន្តបន្ទាប់ ដែលមានទាំងការដាំបន្លែសរីរាង្គ បន្លែសុវត្ថិភាពនិងបន្លែរោងសំណាញ់យូវីជាដើម ដែលបន្លែទាំងអស់នេះ អាចផ្គត់ផ្គង់ក្នុងខេត្តផង និងនាំទៅលក់នៅរាជធានីភ្នំពេញ និងតាមបណ្ដាខេត្តមួយចំនួនទៀត។
គួរបញ្ជាក់ផងដែរថា ចាប់ពីឆ្នាំ២០១៦ រហូតដល់ដំណាច់ខែមករាឆ្នាំ២០២០ រាជរដ្ឋាភិបាល បានចែកពូជបន្លែដល់កសិករ ដោយឥតគិតថ្លៃចំនួនជាង២៩៤.០០០គ្រួសារហើយ។ ពាក់ព័ន្ធនឹងការដាំបន្លែនេះដែរ រាជរដ្ឋាភិបាល បានទម្លាក់ឥណទានកម្ចីចំនួន ៥០លានដុល្លារ តាមរយៈធនាគារអភិវឌ្ឍន៍ជនបទកសិកម្ម ដើម្បីឲ្យកសិករខ្ចីក្នុងអត្រាការប្រាក់ទាបបំផុត ក្នុងការយកទុនទៅបង្កើនការដាំដុះបន្លែថែមទៀត ក្នុងគោលបំណងកាត់បន្ថយការនាំចូលបន្លែ មកពីខាងក្រៅប្រទេស ៕ដោយ៖អ៊ុងសារុំ