កំពង់ស្ពឺ ៖ អគ្គស្នងការដ្ឋាននគរបាលជាតិ និងក្រសួងប្រៃសណីយ៍ និងទូរគមនាគមន៍បានបើកកិច្ចប្រជុំស្ដីពីការបង្កើតប្រព័ន្ធទូរស័ព្ទ Hotline ដើម្បីទទួលការហៅចូលពីប្រជាជនក្នុងការសុំអន្តរាគមន៍ផ្សេងៗពីកងកម្លាំងនគរបាលជាតិនៅទូទាំងប្រទេស ពិសេសពាក់ព័ន្ធការអនុវត្តការរឹតបន្តឹងច្បាប់ចរាចរណ៍ផ្លូវគោក ។ ប្រព័ន្ធទូរស័ព្ទ Hotline ដើម្បីឆ្លើយឆ្លងព័ត៌មានជាមួយប្រជាពលរដ្ឋ ” ហៅចូលដោយឥតគិតថ្លៃគ្រប់ប្រព័ន្ធគឺលេខ ១១៧។
កិច្ចប្រជុំដ៏មានសារសំខាន់នេះធ្វើឡើងនៅអគ្គស្នងការដ្ឋាននគរបាលជាតិ នាព្រឹកថ្ងៃទី៥ ខែឧសភា ឆ្នាំ២០២០នេះ ក្រោមអធិបតីភាព ឯកឧត្តម នាយឧត្តមសេនីយ៍ ឆៃ ស៊ីណារិទ្ធ អគ្គស្នងការរងនគរបាលជាតិ និង ឯកឧត្តម ម៉ូវ ចរិយា ប្រធាននិយ័តកម្មទូរគមនាគមន៍កម្ពុជា ព្រមទាំងមានការចូលរួម ពីថ្នាក់ដឹកនាំសេនាធិការដ្ឋាន ប្រធាន អនុប្រធាននាយកដ្ឋានពាក់ព័ន្ធ និងអគ្គនាយករង ប្រធាន អនុប្រធាននាយកដ្ឋាន និងមន្ត្រីជំនាញបច្ចេកទេសពីក្រសួងប្រៃសណីយ៍ និងទូរគមនាគមន៍ រួមជាមួយតំណាងក្រុមហ៊ុនទូរស័ព្ទទាំងអស់នៅកម្ពុជា ។
កិច្ចប្រជុំនេះធ្វើឡើងក្នុងគោលបំណង ឆ្លើយតបព័ត៌មានពីប្រជាពលរដ្ឋមកមន្ត្រីជំនាញតាមរយៈប្រព័ន្ធព័ត៌មានទាន់ហេតុការណ៍ ១១៧ (Hotline-117) ពាក់ព័ន្ធនិងការរឹតបន្តឹងការអនុវត្តន៍ច្បាប់ចរាចរណ៍ផ្លូវគោក និងការស្នើសុំអន្តរាគមន៍នានារបស់ប្រជាជន ។
ក្រុមការងារ Hotline មានភារកិច្ចទទួលការហៅចូលរបស់ប្រជាជន ដើម្បីសុំអន្តរាគមន៍ផ្សេងៗ និងធ្វើអន្តរាគមន៍ឆ្លើយតប តាមខ្សែបណ្តោយការងារ ដើម្បីផ្តល់សេវាជូនប្រជាជនតាមប្រព័ន្ធព័ត៌មានសង្គម Facebook , វិទ្យុ , ទូរទស្សន៍ និងសារព័ត៌មានផ្សេងៗទៀត ពិសេសដោះស្រាយចម្ងល់ទាំងឡាយ របស់ប្រជាពលរដ្ឋពាក់ព័ន្ធទៅនឹងកិច្ចប្រតិបត្តិការការរឹតបន្តឹងអនុវត្តច្បាប់ចរាចរណ៍ផ្លូវគោក ។
ក្នុងកិច្ចប្រជុំនេះផងដែរ អគ្គស្នងការដ្ឋាននគរបាលជាតិ និងក្រសួងប្រៃសណីយ៍ និងទូរគមនាគមន៍ និងតំណាងក្រុមហ៊ុនទូរស័ព្ទទាំងអស់ បានឯកភាពគ្នា លើកិច្ចការមួយចំនួនដូចខាងក្រោម៖ -ទូរគមនាគមន៍កម្ពុជា ផ្តល់ទូរស័ព្ទលើតុ (IP phone Hotline) ចំនួន៣០គ្រឿង ផ្គត់ផ្គង់ការដំឡើងទាំងស្រុង និងផ្តល់សេវាអ៊ីនធឺណិតសម្រាប់ប្រើប្រាស់ ជូនអគ្គស្នងការដ្ឋាននគរបាលជាតិ។ -អំពីបញ្ហា ShortCode ដែលក្រុមហ៊ុនទូរស័ព្ទមួយចំនួន ប្រើប្រាស់កន្លងមក មានផលរំខានដល់ប្រព័ន្ធ Hotline ១១៧ និងប្រព័ន្ធទូរស័ព្ទ Hotlines ផ្សេងទៀតរបស់ស្ថាប័នរដ្ឋ ត្រូវធ្វើការផ្លាស់ប្តូរតាមគោលការណ៍ របស់និយ័តកម្មទូរគមនាគមន៍កម្ពុជា បានកំណត់ ឯកភាពខាងតំណាងក្រុមហ៊ុនទូរស័ព្ទទាំងអស់ បានឯកភាពទទួលយក ប៉ុន្តែសុំពេលវេលា ដើម្បីជូនដំណឹងដល់អតិថិជន របស់ខ្លួនជាមុនសិន។ -អំពីបញ្ហាស៊ីមកាត ដែលក្រុមហ៊ុន បានលក់ជូនអតិថិជនប្រើប្រាស់កន្លងមក ដោយពុំមានភ្ជាប់ឯកសារអត្តសញ្ញាណប័ណ្ណច្បាប់ចម្លងត្រឹមត្រូវ ឯកសារក្លែងក្លាយ ឬ ពុំមានអត្តសញ្ញាណប័ណ្ណពិតប្រាកដនោះ បញ្ហានេះខាងក្រុមហ៊ុនទូរស័ព្ទ នឹងខិតខំកែលម្អតាមបទកំណត់របស់ក្រសួង ស្ថាប័នពាក់ព័ន្ធ៕ដោយ៖កូឡាប