តាកែវ៖ នៅព្រឹកថ្ងៃទី ៦ ខែឧសភានេះ កម្លាំងកងរាជអាវុធហត្ថខេត្តតាកែវ បានឆ្មក់ចុះឆែកឆេទីតាំងផ្ទះសំណាក់យីហោ ៦៦ នៅភូមិប្រហ៊ូត សង្កាត់រកាក្រៅ ក្រុងដូនកែវ ឃាត់ខ្លួនមនុស្សចំនួន ១៣នាក់ប្រុស ៧នាក់ ស្រី ៦នាក់ ពាក់ព័ន្ធនឹងការប្រើប្រាស់គ្រឿងញៀននៅក្នុងបន្ទប់ ។
លោកមេបញ្ជាការរងកងរាជអាវុធហត្ថខេត្តតាកែវ លោកវរសេនីយ៍ឯក ង៉ែត ចាន់ធី បានឲ្យដឹងថា ការចុះឆែកឆេទីតាំងនៅក្នុងផ្ទះសំណាក់យីហោ៦៦ នេះគឺមានការបញ្ជាផ្ទាល់ពីលោកឧត្តមសេនីយ៍ត្រី ឡា ឡៃ មេបញ្ជាការកងរាជអាវុធហត្ថខេត្តតាកែវ និងមានសម្របសម្រួល នីតិវិធីច្បាប់ដោយលោក ជីវ ចាន់តារ៉ា ព្រះរាជអាជ្ញាអមសាលាតំបូងខេត្តតាកែវ ធ្វើការចុះឆែកឆេនៅក្នុងផ្ទះសំណាក់យីហោ ៦៦ វេលាម៉ោង ៧ព្រឹក ដោយក្នុងនោះយើងបានឆែកឆេចំនួន ១៤បន្ទប់ ធ្វើការឃាត់ខ្លួនមុខសញ្ញាចែកចាយ និងប្រើប្រាស់គ្រឿងញៀន បានយុវជនប្រុសស្រីចំនួន ១៣នាក់ ។ ក្នុងនោះដែរ សមត្ថកិច្ច យើងបានឆែកឆេរកឃើញនៅសម្ភារសេពគ្រឿងញៀន មានដបទុយោបឺត ដែកកេះ និងថ្នាំញៀនប្រភេទម៉ាទឹកកកមួយចំនួន ។
លោកវរសេនីយ៍ឯក ង៉ែត ចាន់ធី បានធ្វើការអំពាវនាវដល់ម្ចាស់ផ្ទះសំណាក់ កុំចូលរួមលាក់កំបាំង ការជួញដូរ ក៏ដូចជាការប្រើប្រាស់គ្រឿងញៀន ពីព្រោះសកម្មភាពនេះ គឺជាអំពើខុសច្បាប់ ៕ដោយ៖ តាកែវ