ភ្នំពេញ៖ ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានជួបពិភាក្សាការងារជាមួយឯក
ឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ ដើម្បីពិភាក្សាការងារ សហការរួមគ្នា រវាងស្ថាប័នទាំងពីរ និងជំរុញវិស័យទេសចរណ៍ នៅក្នុងប្រទេសកម្ពុជា នៅថ្ងៃទី៥ ខែឧសភា ឆ្នាំ២០២០នេះ ។
នៅក្នុងជំនួបពិភាក្សាការងារ ដែលបានប្រព្រឹត្តទៅនៅទីស្តីការក្រសួងទេសចរណ៍ ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា និងឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ បានឯកភាពសហការ អនុវត្តការងាររួមគ្នា លើចំណុចចំនួន៤រួមមាន៖ រៀបចំបណ្តុះបណ្តាលវិជ្ជាជីវៈលើវិស័យទេសចរណ៍តាមស្តង់ដារអាស៊ាន ដោយបណ្តុះបណ្តាលនៅរាជបណ្ឌិត្យសភាកម្ពុជា ។ ដំណើរការបណ្តុះបណ្តាលនេះ នឹងអនុវត្តក្រោយពេលកូវីដ១៩ បញ្ចប់។ បង្កើតមជ្ឈមណ្ឌល China Ready Center នៅរាជបណ្ឌិត្យសភាកម្ពុជា។ ស្ថាប័នទាំងពីរ នឹងចុះអនុស្សរណៈនៃការយោគយល់គ្នា ក្នុងពេលអនាគតដ៏ខ្លីខាងមុខនេះ។ ក្រសួងទេសចរណ៍និងរាជបណ្ឌិត្យសភាកម្ពុជា នឹងបង្តើតឱ្យមាននូវការសិក្សាស្រាវជ្រាវ, បណ្តុះបណ្តាល, និងការអនុវត្តន៍ជាក់ស្តែង ទៅលើវិស័យទេសចរណ៍នេះ។
រាជបណ្ឌិត្យសភាកម្ពុជា (រ.ប.ស.ក.) ជាគ្រឹះស្ថានសាធារណៈរដ្ឋបាល ស្ថិតក្រោមអាណាព្យាបាលបច្ចេកទេស នៃទីស្តីការគណៈរដ្ឋមន្ត្រី និងស្ថិតក្រោមអាណាព្យាបាលហិរញ្ញវត្ថុ នៃក្រសួងសេដ្ឋកិច្ច និងហិរញ្ញវត្ថុ។ រ.ប.ស.ក. មានបេសកកម្មដឹកនាំគ្រប់គ្រង អភិវឌ្ឍការសិក្សាស្រាវជ្រាវវិទ្យាសាស្ត្រ បច្ចេកវិទ្យា បច្ចេកទេស បណ្តុះបណ្តាល និងអភិវឌ្ឍធនធានបញ្ញាញាណជាន់ខ្ពស់របស់ជាតិ។
រាជបណ្ឌិត្យសភាកម្ពុជា មានភារកិច្ចជាអាទិ៍ ដូចតទៅ៖ គ្រប់គ្រងនិងពង្រីកការស្រាវជ្រាវ វិទ្យាសាស្ត្រលើគ្រប់វិស័យ, ធ្វើកិច្ចសហប្រតិបត្តិការលើផ្នែកស្រាវជ្រាវជាមួយក្រសួង ស្ថាប័ន អង្គការជាតិ និងអន្តរជាតិ ព្រមទាំងដៃគូអភិវឌ្ឍនានា ដែលមានគោលបំណងដូចគ្នា, រៀបចំវេទិកាវិទ្យាសាស្ត្រលើគ្រប់វិស័យ ដើម្បីផ្តល់ធាតុចូលក្នុងការរួម ចំណែកអភិវឌ្ឍប្រទេស, បណ្តុះបណ្តាល ដើម្បីអភិវឌ្ឍធនធានមនុស្សលើគ្រប់វិស័យ, ប្រមូល ចងក្រង បោះពុម្ពផ្សាយ និងតម្កល់ឯកសារ ស្នាដៃស្រាវជ្រាវនិងរបកគំហើយនានា, ប្រមូលផ្តុំកម្លាំងបញ្ញាញាណរបស់ជាតិនិងអន្តរជាតិ ដើម្បីជំរុញការអភិវឌ្ឍប្រទេស, លើកសំណើជូនគ្រឿងឥស្សរិយយស ឬគោរមងារវិទ្យាសាស្ត្រ ដល់ឥស្សរជនឆ្នើមជាតិ និងអន្តរជាតិ, អភិរក្សនិងអភិវឌ្ឍការប្រើប្រាស់ភាសា និងអក្សរខ្មែរប្រកបដោយនិរន្តរភាព ព្រមទាំងរក្សាបាននូវអត្តសញ្ញាណជាតិខ្មែរ, ស្រាវជ្រាវ អភិរក្ស និងអភិវឌ្ឍធនធានធម្មជាតិ និងវប្បធម៌, ចូលរួមចំណែក និងធ្វើកិច្ចសហប្រតិបត្តិការ ក្នុងការការពារកម្មសិទ្ធិបញ្ញាខាងផ្នែកវិទ្យាសាស្ត្រគ្រប់វិស័យ, ពិនិត្យនិងវាយតម្លៃស្នាដៃ ស្រាវជ្រាវវិទ្យាសាស្ត្រជាន់ខ្ពស់, អនុវត្តភារកិច្ចផ្សេងៗទៀត ដែលទីស្តីការគណៈរដ្ឋមន្ត្រី និងរាជរដ្ឋាភិបាលប្រគល់ជូន៕ដោយ៖សម្ផស្ស
