ភ្នំពេញ៖ នៅក្នុងសន្និសីទសារព័ត៌មានស្តីពី វឌ្ឍនភាពការងារឆ្នាំ២០១៩ និងទិសដៅការងារឆ្នាំ២០២០ របស់រដ្ឋបាលខេត្តកែប ដែលបានរៀបចំនៅទីស្តីការគណៈរដ្ឋមន្ត្រីនាថ្ងៃទី៥ ខែឧសភា ឆ្នាំ២០២០ ឯកឧត្តម កែន សត្ថា អភិបាលខេត្តកែប បានមានប្រសាសន៍ថា ទំហំសេដ្ឋកិច្ចរបស់ខេត្តកែប សរុបប្រមាណ ពីររយប្រាំពាន់ប្រាំរយម្ភៃប្រាំមួយលាន និងប៉ែតសិបម៉ឺនរៀលគត់ គិតជាដុល្លារ ៥០,៧លានដុល្លារ ស្មើនឹង ០,២០% នៃសេដ្ឋកិច្ចជាតិសរុប និងចំណូលសម្រាប់មនុស្សម្នាក់ចំនួន ១.២១៧ដុល្លារ។
ឯកឧត្តម កែន សត្ថា បានបន្តថា រដ្ឋបាលខេត្ត រក្សាបានសន្តិសុខជូនឥស្សរជនជាតិ និងអន្តរជាតិ, ភ្ញៀវទេសចរជាតិ, អន្តរជាតិ និងប្រជាពលរដ្ឋបានល្អប្រសើរ, ធានាបាននូវការប្រកបមុខរបរបង្កើនប្រាក់ចំណូល កាត់បន្ថយចំណាកស្រុក ពិសេស កាត់បន្ថយភាពក្រីក្ររបស់ប្រជាពលរដ្ឋពី ១៦,៤៩% នៅឆ្នាំ២០១២ មកត្រឹម ៣,១៨% នៅឆ្នាំ២០២០នេះ។
អភិបាលខេត្តកែប បានឲ្យដឹងថា ក្នុងឆ្នាំ២០១៩កន្លងទៅ ចំនួនភ្ញៀវទេសចរសរុបមានចំនួនជាង ១លាន ៧សែននាក់ បើធៀបនឹងឆ្នាំ២០១៨ ភ្ញៀវកើនឡើង ៤,២៤% ក្នុងនោះភ្ញៀវទេសចរជាតិកើនឡើង ៣,៥៨% និងភ្ញៀវទេសចរអន្តរជាតិកើនឡើង ២៥,០១% និងបានផ្តល់កម្លាំងពលកម្មសរុប ៣.៣៨០នាក់ ស្រី ១.២៣០នាក់ មានការងារធ្វើ និងបានបង្កើតប្រាក់ចំណូលជួយដល់គ្រួសារ រួមចំណែកក្នុងការកាត់បន្ថយភាពក្រីក្រ។
សូមបញ្ជាក់ថា កែប ជាខេត្តទេសចរណ៍ធម្មជាតិតំបន់ឆ្នេរ មានស្ថានភាពផ្ទៃដីចែកជា តំបន់ភ្នំ, ជម្រាលភ្នំ, តំបន់មាត់សមុទ្រ, សមុទ្រ និងកោះ មានចម្ងាយប្រមាណ ១៧៥គីឡូម៉ែត្រ ពីរាជធានីភ្នំពេញ។ មានផ្ទៃដីគោកទំហំ ១៨៧,២៤គីឡូម៉ែត្រក្រឡា និងមានផ្ទៃសមុទ្រដែលមានកោះចំនួន ១៣ មានប្រជាពលរដ្ឋជិត ១ម៉ឺនគ្រួសារ។ សក្តានុពលសេដ្ឋកិច្ចរបស់ខេត្ត គឺពឹងផ្អែកលើវិស័យទេសចរណ៍ ដោយមានឆ្នេរខ្សាច់, ឧឡានជាតិ, ព្រៃកោងកាង, ផ្កាថ្ម, ស្មៅសមុទ្រ និងជីវចម្រុះ រួមទាំងធនធានជលផលសមុទ្រជាច្រើនប្រភេទផ្សេងទៀត៕ដោយ៖សម្ផស្ស