បាត់ដំបង ៖ កម្លាំងប៉ូលិសការិយាល័យប្រឆាំងគ្រឿងញៀនខេត្តបាត់ដំបង បានចាប់ជនសង្ស័យ៣នាក់ ជួញដូររក្សាទុកនិងថ្នាំម៉ាទឹកកកមួយចំនួន ជញ្ជីងថ្លឹងថ្នាំញៀន សម្ភារប្រើប្រាស់ថ្នាំញៀន នៅកន្លែងផ្សេងគ្នាក្នុងស្រុកសង្កែ កសាងសំណុំរឿងបញ្ជូនទៅតុលាការ ដើម្បីចាត់ការទៅតាមផ្លូវច្បាប់នៅថ្ងៃទី៦ខែឧសភាឆ្នាំ២០២០។
ហេតុការណ៍ចាប់ឃាត់ខ្លួនជនសង្ស័យ៣នាក់នេះ បានធ្វើឡើងកាលពីថ្ងៃទី៤ ខែឧសភា ឆ្នាំ២០២០ នៅចំណុចក្នុងស្រុកសង្កែ ខេត្តបាត់ដំបង។
លោកសុខ និមលនាយការិយាល័យប្រឆាំងបទល្មើសគ្រឿងញៀនខេត្តបាត់ដំបង បានឲ្យដឹងថា ជនសង្ស័យ៣នាក់ ដែលចាប់ឃាត់ខ្លួន មានឈ្មោះព្រីង រដ្ឋាហៅស្រួច ភេទប្រុស អាយុ២៦ឆ្នាំ មានទីលំនៅភូមិតាប៉ុន ឃុំតាប៉ុន ស្រុកសង្កែ ខេត្តបាត់ដំបង
និងឈ្មោះសឹម ប៊ូសត់ ភេទប្រុស អាយុ១៩ឆ្នាំ មានទីលំនៅភូមិបាសែត ឃុំតាប៉ុន ស្រុកសង្កែ ខេត្តបាត់ដំបង។ ក្នុងប្រតិបត្តិការនេះ កម្លាងដកហូតវត្ថុតាង រួមមានថ្នាំញៀនប្រភេទមេតំហ្វេតាមីនម៉ាទឹកកក ចំនួនមួយថង់ ម៉ូតូមួយគ្រឿង សម្ភារសម្រាប់ប្រើប្រាស់ថ្នាំញៀនមួយចំនួនទៀត ហើយចាប់ឃាត់ខ្លួន កាលពីម៉ោង១១និង៣០នាទីថ្ងៃទី៤ ខែឧសភា ឆ្នាំ២០២០ នៅចំណុចក្រុមទី១ ភូមិតាប៉ុន ឃុំតាប៉ុន ស្រុកសង្កែ ខេត្តបាត់ដំបង។ ក្រោយពីសាកសួរឈ្មោះព្រីង រដ្ឋាហៅស្រួច កម្លាំងបានឈានទៅចាប់ស្ត្រីម្នាក់ទៀតឈ្មោះឆាត កុម្ភៈ ហៅស្រីនាង អាយុ៣៦ឆ្នាំ រស់នៅភូមិបាសែត ឃុំតាប៉ុន ស្រុកសង្កែ ខេត្តបាត់ដំបង។ ក្នុងប្រតិបត្តិការនេះ កម្លាងដកហូតវត្ថុតាង រួមមានថ្នាំញៀនប្រភេទមេតំហ្វេតាមីន ម៉ាទឹកកកចំនួនមួយថង់ សម្ភារសម្រាប់ប្រើប្រាស់ថ្នាំញៀនមួយចំនួនទៀត ហើយចាប់ឃាត់ខ្លួន កាលពីម៉ោង១៤និង០០នាទីថ្ងៃទី៤ ខែឧសភា ឆ្នាំ២០២០ នៅចំណុចភូមិបាសែត ឃុំតាប៉ុន ស្រុកសង្កែ ខេត្តបាត់ដំបង។ បច្ចុប្បន្ននេះ កម្លាំងបានកសាងសំណុំរឿង បញ្ជូនជនសង្ស័យ និងវត្ថុតាងទៅតុលាការ ដើម្បីចាត់ការទៅតាមផ្លូវច្បាប់ នៅថ្ងៃទី៦ ខែឧសភា ឆ្នាំ២០២០ហើយ៕ ដោយ ៖ អ៊ុងសារុំ
