CAMSOC-ភ្នំពេញ៖ ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា មានប្រសាសន៍ថា ក្រោយបញ្ចប់ការសាងសង់ នាដំណាច់ឆ្នាំ២០២០ ហើយនៅក្រោយដើមឆ្នាំ២០២១តទៅ ពហុកីឡដ្ឋានជាតិមរតកតេជោ នឹងត្រូវបានបើកចំហរទស្សនកិច្ច ស្វែងយល់ ដោយទទួលស្វាគមន៍គ្រប់មជ្ឈដ្ឋានទាំងអស់។
ឯកឧត្តមអះអាងថា នេះជាផែនការកម្មវិធីរបស់ឯកឧត្តម ថោង ខុន ប្រធានគណៈកម្មាធិការជាតិអូឡាំពិកកម្ពុជា ដើម្បីបើកឱកាសទូលាយ ជូនដល់សិស្ស និស្សិត យុវជន មគ្គុទេសក៍ទេសចរណ៍ ក៏ដូចជាប្រជាពលរដ្ឋទូទៅ សម្រាប់កិច្ច ការស្រាវស្រាវស្វែងយល់ កម្សាន្ត ទេសចរណ៍ ដើម្បីធ្វើឲ្យពហុកីឡដ្ឋានជាតិមរតកតេជោ ក្លាយជាតំបន់ទេសចរណ៍ថ្មីមួយ ការសិក្សាថ្មីមួយ កន្លែងអប់រំថ្មីមួយ ដើម្បីបញ្ជ្រាបការយល់ដឹង ឲ្យពួកគាត់ស្រឡាញ់កីឡា ហេដ្ឋារចនាសម្ព័ន្ធកីឡា សម្រាប់គ្រប់គ្រឹះស្ថានសិក្សា គ្រប់ក្រសួងស្ថាប័ន ដែលចង់ទៅធ្វើធ្វើទស្សនកិច្ចស្វែងយល់ ពីភាពលេចធ្លោ ភាពអស្ចារ្យប៉ុណ្ណា ដើម្បីផ្សព្វផ្សាយពីកេរ្តិ៍ដំណែលសម្រាប់កូនចៅជំនាន់ក្រោយៗទៀត។
ឯកឧត្តមអគ្គលេខាធិការបន្ថែមទៀតថា សូមមហាជនរង់ចាំទទួលនូវសមិទ្ធផលដ៏អស្ចារ្យថ្មីមួយនេះទាំងអស់គ្នា នាដើមឆ្នាំ២០២១តទៅ ហើយយើងនឹងធ្វើកម្មវិធីនានា ឲ្យបានល្អប្រសើរ ដើម្បីបញ្ជ្រាបការយល់ដឹងទៅដល់គ្រប់មជ្ឈដ្ឋានទាំងអស់ ក្នុងគោលបំណងឲ្យគាំទ្រដល់ដំណើរការឆ្ពោះទៅទទួលរៀបចំម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣ នៅព្រះរាជាណាចក្រកម្ពុជា។ នេះជាសារដ៏សំខាន់ ដែលយើងខ្ញុំនឹងត្រៀមទទួលស្វាគមន៍ យ៉ាងកក់ក្តៅបំផុត សម្រាប់ប្រជាពលរដ្ឋខ្មែរ។ នៅក្នុងឆ្នាំ២០២១តទៅ យើងមានផែនការច្បាស់លាស់ ដូចជាបង្កើតព្រឹត្តិការណ៍ប្រកួតប្រជែងស្នាដៃគូររូបដោយដៃ នៅពហុកីឡដ្ឋានជាតិមរតកតេជោ ក្នុងក្របខ័ណ្ឌទូទាំងប្រទេស ដើម្បីយកស្នាដៃទាំងនោះ ទៅដាក់តាំងបង្ហាញ នៅក្នុងពិព័រណ៍ នាពេលស៊ីហ្គេម ឆ្នាំ២០២៣ ទៀត។ នេះជាគំនិតបំផុសស្មារតីឲ្យកូនខ្មែរ ចូលរួមចំណែកក្នុងគោលដៅស៊ីហ្គេម ២០២៣ ក្រៅពីនេះយើងក៏មានកម្មវិធីជាច្រើនទៀត ដើម្បីសម្រួចគោលដៅឲ្យគ្រប់ផ្នែកទាំងអស់ ឲ្យទទួលបានជោគជ័យ ជាប្រវត្តិសាស្ត្រ នៃស៊ីហ្គេម ជាលើកដំបូងរបស់កម្ពុជា ក្រោយពីប្រជាពលរដ្ឋខ្មែរទទួល បាននូវមរតកនៃហេដ្ឋារចនាសម្ព័ន្ធ ដ៏មហាសាលនេះ។
សូមបញ្ជាក់ថា បច្ចុប្បន្ន កីឡដ្ឋានធំនៃពហុកីឡដ្ឋានជាតិមរតកតេជោ ស្ថិតនៅខណ្ឌជ្រោយចង្វា រាជធានីភ្នំពេញ កំពុងដំណើរការសាងសង់យ៉ាងសកម្ម ដោយតាមគម្រោងនឹងបញ្ចប់ការសាង់សង់ជាស្ថាពរ នាថ្ងៃទី៣១ ខែធ្នូ ឆ្នាំ២០២០៕ដោយ៖បញ្ញាស័ក្តិ
