ភ្នំពេញ ៖ សហព័ន្ធកីឡាបាល់ទាត់កម្ពុជា នៅថ្ងៃទី៦ខែឧសភានេះ បានចេញសេចក្តីប្រកាសព័ត៌មាន ព្យួរអតីត និងមន្ត្រីរបស់សហព័ន្ធ ចំនួន៤រូប គ្រប់សកម្មភាពកីឡាបាល់ ទាត់អស់មួយជីវិត។
សហព័ន្ធកីឡាបាល់ទាត់កម្ពុជា បានបញ្ជាក់ថា អតីតនិងមន្ត្រីរបស់សហព័ន្ធទាំង៤រូប បានប្រព្រឹត្តកំហុសធ្ងន់ធ្ងរ ផ្ទុយពីក្រមសីលធម៌ និងវិន័យរបស់ សហព័ន្ធកីឡាបាល់ទាត់។
យោងតាមសេចក្ដីប្រកាសព័ត៌មានរបស់ សហព័ន្ធកីឡាបាល់ទាត់កម្ពុជា បានឲ្យដឹងថា ចំពោះ លោក ម៉ៃ តុលា , លោកទុយ វិច្ឆិកា , លោក ឆាំង ពិសិដ្ឋ និងលោក គល់ សុភារម្យ ត្រូវបានព្យួរគ្រប់សកម្មភាពកីឡាបាល់ទាត់អស់មួយជីវិត។
ចំពោះលោក ម៉ៃ តុលា ត្រូវបញ្ជូនសំណុំរឿងប្រព្រឹត្តពុករលួយទៅតុលាការ មានសមត្ថកិច្ចដើម្បីចាត់វិធានការតាមផ្លូវច្បាប់ ជាធរមានរបស់ព្រះរាជាណាចក្រកម្ពុជា ។
សេចក្តីជូនដំណឹងដែលបង្ហោះលើហ្វេសប៊ុករបស់ខ្លួននៅថ្ងៃទី៦ ខែឧសភា នេះ សហព័ន្ធកីឡាបាល់ទាត់កម្ពុជា(FFC) មិនបានបញ្ជាក់ពីមូលហេតុលម្អិតនៃការព្យួរការងារនេះទេ ៕ដោយ៖កូឡាប
