បាត់ដំបង៖ ឯកឧត្តម ងិន ឃន បានថ្លែងថា បញ្ហាជំងឺកូវីដ១៩ នៅតែបន្តធ្វើឲ្យមានការព្រួយបារម្ភយ៉ាងណាក៏ដោយ ជានិច្ចកាល និងគ្រប់កាលៈទេសៈ គឺរាជរដ្ឋាភិបាល នៅតែងតែជួយដោះស្រាយ នូវបញ្ហានិងការលំបាកជូន ដល់បងប្អូននិងឆ្លើយតបបានទាន់ពេលវេលា។
សមាជិករដ្ឋសភាមណ្ឌលខេត្តបាត់ដំបង បានចែកអំណោយជាគ្រឿងឧបភោគបរិភោគ រួមទាំងគ្រឿងសម្ភារមួយចំនួនដល់
ប្រជាពលរដ្ឋក្រីក្រ អ្នកងាយរងគ្រោះ មានស្ត្រីមេម៉ាយ និងចាស់ជរាចំនួន៣០០គ្រួសារ ក្នុងសង្កាត់ទាំង១០ នៅក្នុងក្រុងបាត់ដំបង ដែលរងផលប៉ះពាល់ ដោយសារជំងឺកូវីដ១៩ ។
ការចែកអំណោយដល់ពលរដ្ឋទាំង ៣០០គ្រួសារ បានធ្វើឡើងកាលពីព្រឹកថ្ងៃទី៦ ខែឧសភា ឆ្នាំ២០២០ ក្រោមអធិបតីភាពឯកឧត្តម ងិន ឃន តំណាងរាស្ត្រមណ្ឌលបាត់ដំបង។
ឯកឧត្តម ងិន ឃន តំណាងរាស្ត្រមណ្ឌលបាត់ដំបង បានមានប្រសាសន៍ថា ទោះបីជាស្ថានភាពជំងឺកូវីដ១៩ នៅក្នុងប្រទេសកម្ពុជា មានការធូរស្បើយច្រើន ប៉ុន្តែនៅលើពិភពលោក និងបណ្តាប្រទេសក្នុងតំបន់ នៅមានភាពធ្ងន់ធ្ងរនៅឡើយ ដូច្នេះសូមបងប្អូនប្រជាពលរដ្ឋទាំងអស់ ត្រូវបន្តការប្រុងប្រយ័ត្នជាប់ជានិច្ច កុំមានការធ្វេសប្រហែស។ អ្វីដែលបងប្អូន ត្រូវប្រកាន់ឲ្យខ្ជាប់ខ្ជួននោះ គឺការធ្វើអនាម័យជាប្រចាំ ក្នុងការលាងសម្អាតដៃជាមួយសាប៊ូ អាល់កុលនិងជែល ដើម្បីសុខភាពអាយុជីវិតផ្ទាល់ខ្លួនម្នាក់ៗ និងដើម្បីបញ្ចៀសបានពីការឆ្លង និងការចម្លងនូវមេរោគកូវីដ-១៩ នេះ។ ពេលបញ្ហាជំងឺកូវីដ១៩ នៅតែបន្តធ្វើឲ្យមានការព្រួយបារម្ភយ៉ាងណាក៏ដោយ ជានិច្ចកាល និងគ្រប់កាលៈទេសៈ គឺរាជរដ្ឋាភិបាល នៅតែងតែជួយដោះស្រាយ នូវបញ្ហានិងការលំបាកជូន ដល់បងប្អូននិងឆ្លើយតបបានទាន់ពេលវេលា ដោយមិនប្រកាន់នូវនិន្នាការនយោបាយ ឬពណ៌សម្បុរអ្វីឡើយ។ បើទោះបីពេលនេះ អំណោយទាំងនេះ តិចតួចក៏ពិតមែន តែវាបានជួយសម្រាលដល់ការលំបាក របស់បងប្អូនបានមួយគ្រាផងដែរ។
គួរបញ្ជាក់ផងដែរថា អំណោយដែលយកទៅចែក ផ្ដល់ជូនពលរដ្ឋទាំង ៣០០នាក់ ក្នុងក្រុងបាត់ដំបងនេះ រួមមានអង្ករ មី សាប៊ូ ទឹកត្រីទឹកស៊ីអ៊ីវ ក្រមា និងថវិកាមួយចំនួនទៀត ៕ដោយ៖អ៊ុងសារុំ