ភ្នំពេញ៖ ចាប់ពីថ្ងៃចាប់ផ្តើមអនុវត្តរឹតបន្តឹងច្បាប់ចរាចរណ៍ផ្លូវគោក បុរសម្នាក់នេះ ជាមនុស្សទី៣ហើយដែលសមត្ថកិច្ច នៃស្នងការដ្ឋាននគរបាលរាជធានីភ្នំពេញ បានកោះហៅឲ្យចូលខ្លួន មកបំភ្លឺករណីផុសព័ត៌មានមិនពិត និងជេរប្រមាទ មើលងាយមកលើសមត្ថកិច្ចអនុវត្តច្បាប់ ។
បើតាមសេចក្តីបកស្រាយបំភ្លឺរបស់ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ នៅថ្ងៃទី៦ ខែឧសភា ឆ្នាំ២០២០ បានឲ្យដឹងថា បុរសម្នាក់ឈ្មោះ ហែម ផល្លា ប្រើប្រាស់គណនីហ្វេសប៊ុកឈ្មោះ YVON HEM Phalla បានផុសព័ត៌មានជេរប្រមាទ មើលងាយយ៉ាងខ្លាំងមកលើសមត្ថកិច្ចអនុវត្តច្បាប់ កាលពីថ្ងៃទី៤ ខែឧសភា ឆ្នាំ២០២០ បានធ្វើឲ្យប៉ះពាល់ធ្ងន់ធ្ងរដល់កិត្តិយស របស់សមត្ថកិច្ច ដែលបានខិតខំបំពេញភារកិច្ច ក្នុងការអនុវត្តន៍ រឹតបន្តឹងច្បាប់ចរាចរណ៍ផ្លូវគោក ។
បុរសម្នាក់ឈ្មោះ ហែម ផល្លា បានចូលខ្លួនមកបំភ្លឺ តាមការកោះហៅ របស់សមត្ថកិច្ចការិយាល័យប្រឆាំងបទល្មើសបច្ចេកវិទ្យា ផែនសន្តិសុខ នៃស្នងការដ្ឋាននគរបាលរាជធានីភ្នំពេញ ដើម្បីសួរនាំ ហើយគាត់ក៏បានទទួលកំហុសទាំងស្រុង និងបានថតវីដេអូ សុំទោសជាសាធារណៈ ដល់ប្រជាពលរដ្ឋ ជាពិសេសសុំទោស ដល់សមត្ថកិច្ចនៃស្នងការដ្ឋាននគរបាលរាជធានីភ្នំពេញ ។
ក្រោយពីសមត្ថកិច្ចបានធ្វើការណែនាំ អប់រំ និងធ្វើកិច្ចសន្យាដោយផ្តិតមេដៃរួចមក សមត្ថកិច្ចក៏បានឲ្យគាត់ត្រឡប់ទៅគេហដ្ឋានវិញ ។
សូមផ្សព្វផ្សាយតែព័ត៌មានពិត និងចូលរួមសហការណ៍ទប់ស្កាត់រាល់ព័ត៌មានមិនពិត ។
ស្នងការដ្ឋាននគរបាលរាជធានីភ្នំពេញ នឹងបន្តអនុវត្តតាមច្បាប់ ចំពោះបុគ្គលណា ដែលផុសព័ត៌មានមិនពិត ជាពិសេសផុសព័ត៌មាន ដែលមានលក្ខណៈមើលងាយ និងជេរប្រមាទមកលើច្បាប់ និងសមត្ថកិច្ច ។ បើក្នុងករណីមិនរៀងចាល សមត្ថកិច្ចនិងរៀបចំសំណុំរឿង បញ្ជូនបន្តទៅតុលាការ ដើម្បីអនុវត្តតាមនីតិវិធីច្បាប់ ៕
ដោយ៖កូឡាប
